36 വർഷത്തെ നീണ്ട കാത്തിരിപ്പിന് ഒടുവിൽ സ്കോട്ലൻഡ് വീണ്ടും ലോകകപ്പ് വേദിയിൽ വിജയത്തിന്റെ മധുരം അറിഞ്ഞു. അമേരിക്കയിലെ മസാച്യുസെറ്റ്സിലെ ഫോക്സ്ബറോയിലെ ബോസ്റ്റൺ സ്റ്റേഡിയത്തിൽ നടന്ന ഗ്രൂപ്പ് സി പോരാട്ടത്തിൽ ഹൈറ്റിയെ ഏകപക്ഷീയമായ ഒരു ഗോളിന് കീഴടക്കിയാണ് ടാർട്ടൻ ആർമി ചരിത്രവിജയം സ്വന്തമാക്കിയത്. 1990 ലോകകപ്പിന് ശേഷം ആദ്യ ലോകകപ്പ് ജയവും, 1998-ലെ അവസാന ലോകകപ്പ് മത്സരത്തിന് ശേഷം ടൂർണമെന്റിലേക്കുള്ള തിരിച്ചുവരവിൽ ലഭിച്ച സ്വപ്നതുടക്കവുമായിരുന്നു ഇത്.മത്സരത്തിന്റെ ആദ്യ പകുതിയിൽ സ്കോട്ലൻഡാണ് വ്യക്തമായ മേൽക്കൈ നേടിയത്. സ്റ്റീവ് ക്ലാർക്കിന്റെ ശിഷ്യർ തുടക്കം മുതൽ തന്നെ ആക്രമണ ഫുട്ബോൾ പുറത്തെടുത്തു. മധ്യനിരയിൽ സ്കോട്ട് മക്ടോമിനെയും ജോൺ മക്ഗിന്നും ചേർന്ന് കളിയുടെ നിയന്ത്രണം ഏറ്റെടുത്തു.16-ാം മിനിറ്റിൽ സ്റ്റേഡിയം മുഴുവൻ എഴുന്നേറ്റ് നിന്ന നിമിഷം പിറന്നു. ദൂരത്തുനിന്ന് മക്ടോമിനി ഉതിർത്ത അതിശക്തമായ ഷോട്ട് ഹൈറ്റി ഗോൾകീപ്പർ പ്ലാസിഡെയെ മറികടന്നെങ്കിലും പോസ്റ്റിന്റെ അടിഭാഗത്ത് തട്ടി മടങ്ങി. ഗോൾ നഷ്ടമായെങ്കിലും സ്കോട്ലൻഡിന്റെ ആക്രമണതീവ്രതയ്ക്ക് അതായിരുന്നു ഏറ്റവും വലിയ മുന്നറിയിപ്പ്.എന്നാൽ ആരാധകർക്ക് ഗോൾ കാണാൻ അധികം കാത്തിരിക്കേണ്ടി വന്നില്ല.27-ാം മിനിറ്റിൽ ജോൺ മക്ഗിന്നിന്റെ ഇടതുകാലൻ ശ്രമമാണ് മത്സരത്തിന്റെ വിധി നിർണയിച്ചത്.
ബോക്സിനുള്ളിൽ ലഭിച്ച അവസരം അതിസുന്ദരമായി ഉപയോഗിച്ച മക്ഗിന്നിന്റെ ഷോട്ട് ഗോൾലൈൻ കടന്നതോടെ ടാർട്ടൻ ആർമിയുടെ ആഘോഷം പൊട്ടിപ്പുറപ്പെട്ടു. ലോകകപ്പിൽ സ്കോട്ലൻഡിന്റെ 36 വർഷത്തെ വിജയവരൾച്ച അവസാനിപ്പിച്ച ഗോൾ പിന്നീട് ചരിത്രത്തിന്റെ ഭാഗമായി.ഗോൾ വഴങ്ങിയതോടെ ഹൈറ്റി ഉണർന്നു. കോൺകകാഫ് മേഖലയിലെ പ്രതിനിധികൾ ഉടൻ തന്നെ തിരിച്ചടിക്കാനുള്ള ശ്രമങ്ങൾ തുടങ്ങി. ഡക്ക്ൻസ് നാസോൺ, പ്രൊവിഡൻസ്, ഫ്രാൻറ്റ്സ്ഡി പിയറോ എന്നിവർ ചേർന്ന് സ്കോട്ലൻഡ് പ്രതിരോധത്തെ സമ്മർദത്തിലാക്കി. എന്നാൽ ഗോൾകീപ്പർ ആംഗസ് ഗൺ മികച്ച രക്ഷാപ്രവർത്തനങ്ങളിലൂടെ ടീമിന്റെ ലീഡ് നിലനിർത്തി.രണ്ടാം പകുതിയിൽ കളിയുടെ ചിത്രം പൂർണമായും മാറി. ഹൈറ്റിയാണ് കൂടുതൽ പന്ത് കൈവശം വെച്ചതും മത്സരത്തിന്റെ വേഗം നിയന്ത്രിച്ചതും.
സ്കോട്ലൻഡ് പ്രതിരോധത്തിലേക്ക് പിൻവാങ്ങി ലീഡ് കാക്കാനുള്ള ശ്രമത്തിലായിരുന്നു.തുടർച്ചയായി ആക്രമിച്ച ഹൈറ്റിക്ക് നിരവധി അവസരങ്ങൾ ലഭിച്ചെങ്കിലും അവസാന സ്പർശത്തിൽ കൃത്യത കുറവായിരുന്നു. അധികസമയത്തിന് അഞ്ച് മിനിറ്റ് ബാക്കി നിൽക്കെ ഫ്രാൻറ്റ്സ്ഡി പിയറോയ്ക്ക് ലഭിച്ച ഹെഡറായിരുന്നു അവരുടെ ഏറ്റവും മികച്ച അവസരം. എന്നാൽ പന്തിനെ കൃത്യമായി ഗോൾമുഖത്തേക്ക് തിരിച്ചുവിടാൻ അദ്ദേഹത്തിന് സാധിച്ചില്ല.
മത്സരത്തിന്റെ കണക്കുകൾ പോലും ഹൈറ്റിയുടെ നിർഭാഗ്യം വ്യക്തമാക്കുന്നു. പ്രതീക്ഷിക്കപ്പെട്ട ഗോളുകളുടെ കണക്കിൽ ഹൈറ്റി 1.21 എന്ന നിലയിലെത്തിയപ്പോൾ സ്കോട്ലൻഡിന്റെ കണക്ക് 1.05 മാത്രമായിരുന്നു. അതായത് അവസരങ്ങളുടെ ഗുണനിലവാരത്തിൽ ഹൈറ്റി മുന്നിലായിരുന്നെങ്കിലും ഫിനിഷിംഗിലെ പരാജയം അവരെ തോൽവിയിലേക്ക് തള്ളിവിട്ടു.ലോകകപ്പിലേക്ക് വർഷങ്ങൾക്കുശേഷം തിരിച്ചെത്തിയ ഹൈറ്റിക്ക് ഈ തോൽവി നിരാശാജനകമാണെങ്കിലും അവരുടെ പ്രകടനം പ്രതീക്ഷ നൽകുന്നതായിരുന്നു. മറുവശത്ത് സ്കോട്ലൻഡിന് ഈ വിജയം മൂന്ന് പോയിന്റിനേക്കാൾ വലിയ അർത്ഥമാണ് നൽകുന്നത്. ലോകകപ്പ് വേദിയിൽ വീണ്ടും വിജയിക്കാൻ തങ്ങൾക്ക് കഴിയുമെന്ന് തെളിയിച്ചിരിക്കുകയാണ് അവർ.
ഈ വിജയത്തോടെ ഗ്രൂപ്പ് സിയിലെ പോരാട്ടം കൂടുതൽ ആവേശകരമായി. അടുത്ത മത്സരത്തിൽ സ്കോട്ലൻഡ് അതേ വേദിയിൽ തന്നെ ശക്തരായ മൊറോക്കോയെ നേരിടും. അതേസമയം ലോക ഫുട്ബോളിലെ വമ്പന്മാരായ ബ്രസീലിനെ നേരിടുക എന്ന ദുഷ്കരമായ ദൗത്യമാണ് ഹൈറ്റിയെ കാത്തിരിക്കുന്നത്.ഫോക്സ്ബറോയിലെ ഈ രാത്രി സ്കോട്ലൻഡ് ഫുട്ബോൾ ചരിത്രത്തിൽ എന്നും ഓർമ്മിക്കപ്പെടും. മൂന്ന് പതിറ്റാണ്ടിലേറെ നീണ്ട കാത്തിരിപ്പിനൊടുവിൽ ലോകകപ്പ് വേദിയിൽ വീണ്ടും വിജയഗാനം പാടിയ ടാർട്ടൻ ആർമി, 2026 ലോകകപ്പിൽ തങ്ങൾ വെറും പങ്കാളികളല്ലെന്നും പോരാളികളാണെന്നും ലോകത്തോട് പ്രഖ്യാപിച്ചിരിക്കുകയാണ്.