തിരുവനന്തപുരം: ജില്ലയിൽ പനി ബാധിതരുടെ എണ്ണം വർധിച്ചിട്ടും തിരുവനന്തപുരം മെഡിക്കൽ കോളേജിൽ മതിയായ സൗകര്യങ്ങൾ ഒരുക്കാത്തതായി പരാതി. ഷിഗെല്ല അടക്കമുള്ള പകർച്ചവ്യാധികൾ വർധിക്കുന്ന സാഹചര്യത്തിൽ രോഗികൾ നിലത്തും ഒരു കിടക്കയിൽ രണ്ട് പേർ വീതവും ചികിത്സ തേടേണ്ട അവസ്ഥ തുടരുകയാണ്.
അധികാരത്തിലെത്തിയതിന് പിന്നാലെ മെഡിക്കൽ കോളേജുകളിൽ ആരും നിലത്ത് കിടക്കുന്ന സാഹചര്യം ഉണ്ടാകില്ലെന്ന് ആരോഗ്യവകുപ്പ് മന്ത്രി കെ മുരളീധരൻ വ്യക്തമാക്കിയിരുന്നു.
“നമ്മൾ ഒരുമിച്ച് നിന്നാലേ ഇത് നേരെയാക്കാൻ കഴിയൂ. മെഡിക്കൽ കോളേജുകളിൽ നിലത്ത് കിടക്കുന്ന രീതി ഇല്ലാതാക്കണം. ആശുപത്രികൾ ശരിയാക്കിയാലേ രോഗികളുടെ ബുദ്ധിമുട്ട് കുറയൂ. വെറുതെ സിസ്റ്റത്തെ കുറ്റം പറഞ്ഞിട്ട് കാര്യമില്ല, സിസ്റ്റത്തെ നേരെയാക്കണം,” എന്നായിരുന്നു മന്ത്രിയുടെ പ്രതികരണം.
എന്നാൽ അധികാരത്തിലെത്തി ഒരു മാസം പിന്നിട്ടിട്ടും പ്രാഥമിക സൗകര്യങ്ങൾ പോലും ഉറപ്പാക്കിയിട്ടില്ലെന്നാണ് ആരോപണം. വരാന്തകളിലും സ്ട്രെച്ചറുകളിലും വരെ രോഗികൾ കിടന്ന് ചികിത്സ തേടേണ്ട സാഹചര്യമാണുള്ളത്.
മാനസിക വെല്ലുവിളി നേരിടുന്ന രോഗികളെ പോലും നിലത്താണ് കിടത്തുന്നത്. ചില സാഹചര്യങ്ങളിൽ ഇത്തരം രോഗികളെ കിടക്കയിൽ കെട്ടിയിട്ട് ചികിത്സ നൽകേണ്ട അവസ്ഥയും ഉണ്ടായതായി റിപ്പോർട്ടുകളുണ്ട്.
അഞ്ച് വാർഡുകളിലായാണ് രോഗികളെ തിങ്ങിപ്പാർപ്പിച്ചിരിക്കുന്നത്. പകരം സംവിധാനം ഒരുക്കുമെന്ന് അറിയിച്ച് ആരോഗ്യവകുപ്പ് കണക്കെടുപ്പുകൾ നടത്തിയിരുന്നെങ്കിലും ഇതുവരെ കാര്യമായ നടപടികൾ സജ്ജമാക്കിയിട്ടില്ലെന്നാണ് പരാതി.