ദുബായ്: ഒത്തുകളി ശ്രമങ്ങളിൽ പങ്കാളിയായതിനെ തുടർന്ന്, ഇന്ത്യൻ വംശജനായ അമേരിക്കൻ ക്രിക്കറ്റ് താരം ബോഡുഗും അഖിലേഷ് റെഡ്ഡിക്കെതിരെ അന്താരാഷ്ട്ര ക്രിക്കറ്റ് കൗൺസിലിന്റെ (ICC) കടുത്ത നടപടി. എല്ലാത്തരം ക്രിക്കറ്റ് മത്സരങ്ങളിൽ നിന്നും താരത്തിന് 8 വർഷത്തേക്കാണ് വിലക്കേർപ്പെടുത്തിയിരിക്കുന്നത്. ഐ.സി.സി. അഴിമതി വിരുദ്ധ ട്രിബ്യൂണൽ താരത്തെ കുറ്റക്കാരനാണെന്ന് കണ്ടെത്തിയതിനെ തുടർന്നാണ് ഈ നിർണ്ണായക തീരുമാനം. ഐ.സി.സി. ആന്റി കറപ്ഷൻ കോഡിന്റെ മൂന്ന് ഗുരുതരമായ ലംഘനങ്ങൾ നടത്തിയതായി കണ്ടെത്തിയതിനെത്തുടർന്നാണ് 26 കാരനായ താരത്തിന് എട്ട് വർഷത്തെ വിലക്ക് ലഭിച്ചതെന്ന് ഐ.സി.സി. ഔദ്യോഗിക പ്രസ്താവനയിലൂടെ സ്ഥിരീകരിച്ചിട്ടുണ്ട്.
2025-ൽ നടന്ന അബുദാബി ടി10 ടൂർണമെന്റുമായി ബന്ധപ്പെട്ടാണ് അഖിലേഷ് റെഡ്ഡിക്കെതിരെ അഴിമതി വിരുദ്ധ ചട്ടപ്രകാരം കുറ്റങ്ങൾ ചുമത്തിയത്. എമിറേറ്റ്സ് ക്രിക്കറ്റ് ബോർഡിന് വേണ്ടി ഐ.സി.സി. ആയിരുന്നു ഈ ടൂർണമെന്റിന്റെ ആന്റി കറപ്ഷൻ ഒഫീഷ്യലായി പ്രവർത്തിച്ചിരുന്നത്. കുറ്റാരോപണത്തെ തുടർന്ന് 2025 നവംബർ 21 മുതൽ താരം താൽക്കാലിക സസ്പെൻഷനിലായിരുന്നു. അബുദാബി ടി10 മത്സരങ്ങളുടെ ഫലത്തെയോ ഗതിയെയോ സ്വാധീനിക്കാനോ ഒത്തുകളിക്കാനോ താരം സജീവമായി ശ്രമിച്ചെന്ന് വിശദമായ പരിശോധനയിൽ വ്യക്തമായി. ടൂർണമെന്റിലെ മത്സരങ്ങളിൽ കോഡ് ലംഘിക്കാൻ മറ്റൊരു പങ്കാളിയെ പ്രേരിപ്പിക്കുകയോ അതിനായി സഹായിക്കുകയോ ചെയ്തുവെന്നും കണ്ടെത്തിയിട്ടുണ്ട്. കൂടാതെ, അന്വേഷണവുമായി ബന്ധപ്പെട്ട നിർണ്ണായക വിവരങ്ങളും സന്ദേശങ്ങളും മൊബൈൽ ഫോണിൽ നിന്ന് ഡിലീറ്റ് ചെയ്ത് ഐ.സി.സി. അന്വേഷണം വഴിതെറ്റിക്കാനും തടസ്സപ്പെടുത്താനും താരം ശ്രമിച്ചതായും അന്വേഷണത്തിൽ തെളിഞ്ഞു.
ഹൈദരാബാദ് സ്വദേശിയായ അഖിലേഷ് റെഡ്ഡി, മികച്ച അന്താരാഷ്ട്ര അവസരങ്ങൾ തേടിയാണ് അമേരിക്കൻ ക്രിക്കറ്റിലേക്ക് ചേക്കേറിയത്. അമേരിക്കയ്ക്കുവേണ്ടി 4 ടി20 അന്താരാഷ്ട്ര മത്സരങ്ങൾ കളിച്ചിട്ടുള്ള താരം ഒരു വിക്കറ്റും വീഴ്ത്തിയിട്ടുണ്ട്. ഇന്ത്യയിൽ ആഭ്യന്തര ക്രിക്കറ്റിൽ വിജയ് ഹസാരെ ട്രോഫി സ്ക്വാഡിന്റെ ഭാഗമായിരുന്ന അദ്ദേഹം, ഐ.പി.എൽ. ഫ്രാഞ്ചൈസിയായ സൺറൈസേഴ്സ് ഹൈദരാബാദിനായി നെറ്റ് ബൗളറായും തന്റെ സേവനം അനുഷ്ഠിച്ചിട്ടുണ്ട്. വലംകൈയൻ ബാറ്ററും ഓഫ് സ്പിന്നറുമാണ് അഖിലേഷ്.
സമീപകാലത്തായി ഐ.സി.സി.യുടെ അഴിമതി വിരുദ്ധ നടപടി നേരിടുന്ന രണ്ടാമത്തെ അമേരിക്കൻ ക്രിക്കറ്റ് താരമാണ് അഖിലേഷ് റെഡ്ഡി എന്നത് ശ്രദ്ധേയമാണ്. 2024-ലെ ടി20 ലോകകപ്പിൽ അമേരിക്കൻ ടീമിനായി മികച്ച പ്രകടനം പുറത്തെടുത്ത ആരോൺ ജോൺസും സമാനമായ ഒത്തുകളി ആരോപണങ്ങളെത്തുടർന്ന് ഈ വർഷത്തിന്റെ തുടക്കത്തിൽ സസ്പെൻഷനിലായിരുന്നു.