കൊച്ചി: എറണാകുളം ബോട്ട് ജെട്ടി കെഎസ്ആർടിസി സ്റ്റാൻഡിൽ നിന്ന് വരാപ്പുഴ, പറവൂർ, കൊടുങ്ങല്ലൂർ വഴി ഗുരുവായൂരിലേക്കും പൊന്നാനിയിലേക്കും സർവീസ് നടത്തുന്ന പ്രിയദർശിനി ബസുകളുടെ സർവീസ് മുടക്കം പതിവാകുന്നതായി യാത്രക്കാരുടെ പരാതി. പ്രത്യേകിച്ച് വൈകുന്നേരം മൂന്ന് മണിക്ക് ശേഷമുള്ള തിരക്കേറിയ സമയങ്ങളിലാണ് സർവീസുകൾ കൂടുതലായും റദ്ദാക്കപ്പെടുന്നതെന്നാണ് ആക്ഷേപം.
സ്ത്രീകൾക്ക് സൗജന്യ യാത്ര അനുവദിച്ചിരിക്കുന്ന ഓർഡിനറി വിഭാഗത്തിലെ പ്രിയദർശിനി ബസുകളാണ് നിരന്തരം സർവീസ് മുടക്കുന്നതെന്ന് യാത്രക്കാർ പറയുന്നു. ഗുരുവായൂർ, കൊടുങ്ങല്ലൂർ, പൊന്നാനി ഡിപ്പോകളിൽ നിന്നുള്ള ബസുകളാണ് ഈ റൂട്ടുകളിൽ സർവീസ് നടത്തുന്നത്. ജോലിക്കാരും വിദ്യാർഥികളും ഉൾപ്പെടെ നൂറുകണക്കിന് ആളുകൾ ദിവസേന ഈ സർവീസുകളെ ആശ്രയിച്ചാണ് യാത്ര ചെയ്യുന്നത്.
സാധാരണയായി 10 മുതൽ 20 മിനിറ്റ് വരെ ഇടവേളകളിൽ ബസുകൾ ലഭിക്കാറുണ്ടെങ്കിലും അടുത്തിടെ പല സർവീസുകളും മുൻകൂട്ടി അറിയിപ്പില്ലാതെ റദ്ദാക്കപ്പെടുന്നതായി യാത്രക്കാർ ആരോപിക്കുന്നു. ഇതുമൂലം ബസ് സ്റ്റാൻഡുകളിൽ മണിക്കൂറുകളോളം കാത്തുനിൽക്കേണ്ട അവസ്ഥയാണ് ഉണ്ടാകുന്നത്.
വൈകുന്നേരം നാല് മണിക്ക് എറണാകുളം ബോട്ട് ജെട്ടിയിൽ നിന്ന് ഗുരുവായൂരിലേക്ക് പോകുന്ന കൊടുങ്ങല്ലൂർ ഡിപ്പോ ബസ് പലപ്പോഴും സർവീസ് നടത്താറില്ലെന്നാണ് പരാതി. ഇതോടൊപ്പം 4.10-നുള്ള പൊന്നാനി സർവീസും 4.20-നുള്ള ഗുരുവായൂർ സർവീസും സ്ഥിരമായി മുടങ്ങുന്നതായും യാത്രക്കാർ ചൂണ്ടിക്കാട്ടുന്നു. ഇതിന്റെ ഫലമായി 3.40-നുള്ള ബസിന് ശേഷം ഗുരുവായൂരിലേക്കുള്ള അടുത്ത സർവീസ് 4.50-നാണ് ലഭിക്കുന്നത്.
സർവീസുകൾ റദ്ദാകുന്നതിനാൽ പിന്നീട് എത്തുന്ന ബസുകളിൽ അമിത തിരക്ക് അനുഭവപ്പെടുന്നതായും യാത്രക്കാർ പറയുന്നു. സ്ത്രീകൾക്കായുള്ള സൗജന്യ യാത്രാ പദ്ധതി നിലവിൽ വന്നതിന് ശേഷം യാത്രക്കാരുടെ എണ്ണം ഗണ്യമായി വർധിച്ച സാഹചര്യത്തിൽ സർവീസ് മുടക്കങ്ങൾ കൂടുതൽ ബുദ്ധിമുട്ടുകൾ സൃഷ്ടിക്കുന്നതായും അവർ അഭിപ്രായപ്പെടുന്നു. യാത്രക്കാരുടെ ദുരിതത്തിന് അടിയന്തര പരിഹാരം കാണാൻ കെഎസ്ആർടിസി നടപടി സ്വീകരിക്കണമെന്നാണ് പൊതുവായ ആവശ്യം.