വാഷിങ്ടൺ: രണ്ടാഴ്ചയോളം നീണ്ടുനിന്ന അമേരിക്ക–ഇറാൻ പരസ്പര വ്യോമാക്രമണങ്ങൾക്ക് താൽക്കാലിക വിരാമമായതോടെ ആഗോള വിപണിയിൽ ക്രൂഡ് ഓയിൽ വിലയിൽ വൻ ഇടിവ് രേഖപ്പെടുത്തി. സംഘർഷം ശമിക്കുന്നതും ഹോർമൂസ് കടലിടുക്കിലൂടെയുള്ള കപ്പൽ ഗതാഗതം സാധാരണ നിലയിലാകുമെന്ന പ്രതീക്ഷയും വിപണിക്ക് ആശ്വാസമായി.
തിങ്കളാഴ്ച വ്യാപാരത്തിന്റെ തുടക്കത്തിൽ അന്താരാഷ്ട്ര വിപണിയിൽ ബ്രെന്റ് ക്രൂഡ് വില ബാരലിന് 4.1 ശതമാനം (3.96 ഡോളർ) ഇടിഞ്ഞ് 92.82 ഡോളറിലെത്തി. വ്യാപാരത്തിനിടെ ഒരു ഘട്ടത്തിൽ വില 90 ഡോളറിന് താഴെയും എത്തിയിരുന്നു.
അതേസമയം, യുഎസ് വെസ്റ്റ് ടെക്സസ് ഇന്റർമീഡിയറ്റ് (WTI) ക്രൂഡ് വില ബാരലിന് 4.5 ശതമാനം (4.02 ഡോളർ) കുറഞ്ഞ് 85.29 ഡോളറിലേക്കാണ് ഇടിഞ്ഞത്. കഴിഞ്ഞ മൂന്ന് ആഴ്ചകളായി തുടർച്ചയായി ഉയർന്നിരുന്ന എണ്ണവില ഇപ്പോൾ ഒരാഴ്ചയ്ക്കിടയിലെ ഏറ്റവും താഴ്ന്ന നിലയിലേക്കാണ് എത്തിയത്.
ഹോർമൂസ് കടലിടുക്കിലൂടെയുള്ള എണ്ണക്കടത്ത് തടസ്സപ്പെടുകയും ചെങ്കടലിലേക്കും സംഘർഷം വ്യാപിക്കുകയും ചെയ്തതോടെ സൗദി അറേബ്യയിൽ നിന്ന് ബാബ് എൽ-മന്ദെബ് കടലിടുക്ക് വഴി ഏഷ്യയിലേക്കുള്ള എണ്ണക്കയറ്റുമതി നേരത്തെ പ്രതിസന്ധിയിലായിരുന്നു. ഇതോടെ ബ്രെന്റ് ക്രൂഡ് വില ഒരു ഘട്ടത്തിൽ ബാരലിന് 100 ഡോളർ വരെ ഉയർന്നിരുന്നു.
നയതന്ത്ര ചർച്ചകൾക്ക് കൂടുതൽ സമയം നൽകുന്നതിനായി ആക്രമണങ്ങൾ താൽക്കാലികമായി നിർത്തിവെക്കാൻ യുഎസ് പ്രസിഡന്റ് ഡൊണാൾഡ് ട്രംപ് തീരുമാനിച്ചതായി ഐക്യരാഷ്ട്രസഭയിലെ യുഎസ് അംബാസഡർ മൈക്ക് വാൾട്സ് അറിയിച്ചു.
എന്നാൽ ആക്രമണങ്ങൾ നിർത്തിവെച്ചിട്ടും ഹോർമൂസ് കടലിടുക്കിലൂടെ പ്രതിദിനം പത്തിൽ താഴെ ചരക്കുകപ്പലുകൾ മാത്രമാണ് സഞ്ചരിക്കുന്നതെന്ന് ഷിപ്പിംഗ് ഡാറ്റ വ്യക്തമാക്കുന്നു. സുരക്ഷാ സാഹചര്യം പൂർണമായും മെച്ചപ്പെടാതെ ഭൂരിഭാഗം കപ്പൽ കമ്പനികളും സർവീസുകൾ സാധാരണ നിലയിലേക്ക് പുനരാരംഭിക്കാൻ തയ്യാറാകില്ലെന്നാണ് സാമ്പത്തിക വിദഗ്ധരുടെ വിലയിരുത്തൽ.
ഇതിനിടെ, ചെങ്കടൽ തീരത്തെ സൗദി എണ്ണകേന്ദ്രങ്ങൾക്ക് നേരെ യെമനിലെ ഹൂതികൾ നടത്തിയ ആക്രമണത്തെ തുടർന്ന് ബാബ് എൽ-മന്ദെബ് കടലിടുക്കിലൂടെയുള്ള കപ്പൽ ഗതാഗതത്തിലും വീണ്ടും കുറവ് രേഖപ്പെടുത്തി. എന്നിരുന്നാലും ഈ മാർഗത്തിലൂടെ മൂന്നാമത്തെ ചൈനീസ് സൂപ്പർടാങ്കറും യാത്ര പൂർത്തിയാക്കിയിട്ടുണ്ട്.
മിഡിൽ ഈസ്റ്റിലെ സുരക്ഷാ ഭീഷണികളും റഷ്യ–ഉക്രെയ്ൻ യുദ്ധവും തുടരുന്നതിനാൽ ആഗോള എണ്ണവിതരണത്തിൽ അനിശ്ചിതത്വം നിലനിൽക്കുകയാണെന്ന് വിദഗ്ധർ ചൂണ്ടിക്കാട്ടുന്നു. വാരാന്ത്യത്തിൽ റഷ്യൻ എണ്ണകേന്ദ്രങ്ങൾ ലക്ഷ്യമാക്കി ഡ്രോൺ ആക്രമണം നടത്തിയതായി ഉക്രെയ്ൻ സ്ഥിരീകരിച്ചിട്ടുണ്ട്. വിതരണ ശൃംഖലയിൽ വീണ്ടും തടസ്സമുണ്ടായാൽ എണ്ണവില വീണ്ടും ഉയരാനും ആഗോള പണപ്പെരുപ്പത്തിന് പുതിയ വെല്ലുവിളി ഉയരാനുമുള്ള സാധ്യതയുണ്ടെന്നാണ് സാമ്പത്തിക വിദഗ്ധരുടെ വിലയിരുത്തൽ.