മലയാളികളുടെ പ്രിയതാരം മമ്മൂട്ടി എട്ട് വർഷത്തെ ഇടവേളയ്ക്ക് ശേഷം തമിഴിലേക്ക് തിരിച്ചെത്തുന്ന പാൻ-ഇന്ത്യൻ ചിത്രമാണ് ധനുഷ് നായകനാകുന്ന ‘ഓം’. രണ്ട് ഭാഗങ്ങളായി ഒരുങ്ങുന്ന ചിത്രത്തിന്റെ ആദ്യഭാഗം ഒക്ടോബർ 16ന് റിലീസ് ചെയ്യും.
മമ്മൂട്ടി വീണ്ടും തമിഴ് സിനിമയിൽ അഭിനയിക്കുന്നു എന്നതാണ് ‘ഓം’ എന്ന ചിത്രത്തിലേക്ക് മലയാളി പ്രേക്ഷകരെ ആകർഷിക്കുന്ന പ്രധാന ഘടകം. ധനുഷ് നായകനാകുന്ന ചിത്രത്തിൽ ഏറെ പ്രാധാന്യമുള്ള കഥാപാത്രത്തെയാണ് മമ്മൂട്ടി അവതരിപ്പിക്കുന്നത്. അതിനാൽ തന്നെ ചിത്രത്തിന്റെ ഓരോ അപ്ഡേറ്റും വലിയ ആവേശത്തോടെയാണ് ആരാധകർ ഏറ്റെടുക്കുന്നത്.
ഇപ്പോഴിതാ ചിത്രത്തിലെ പുതിയ ഗാനം അണിയറ പ്രവർത്തകർ പുറത്തിറക്കിയിരിക്കുകയാണ്. ധനുഷിന്റെ പിറന്നാളിനോടനുബന്ധിച്ചാണ് ഗാനം റിലീസ് ചെയ്തത്. ധനുഷിന് മമ്മൂട്ടി ആശംസകളും നേർന്നു.
സായ് അഭയങ്കർ സംഗീത സംവിധാനം നിർവഹിച്ച ഗാനത്തിന് വരികൾ എഴുതിയിരിക്കുന്നത് രോകേഷാണ്. ഗാനത്തിന്റെ ആലാപനവും സായ് അഭയങ്കർ തന്നെയാണ് നിർവഹിച്ചിരിക്കുന്നത്. ഗാനത്തിന്റെ ആദ്യ ഭാഗത്തിൽ നൃത്തച്ചുവടുകളുമായി നിറഞ്ഞാടുന്ന ധനുഷിനെയാണ് കാണാനാകുന്നത്. എന്നാൽ അവസാന ഭാഗത്തേക്ക് എത്തുമ്പോൾ മമ്മൂട്ടിയുടെ മാസ് എൻട്രിയാണ് ശ്രദ്ധ നേടുന്നത്. പശ്ചാത്തലത്തിൽ തീയുടെ അകമ്പടിയോടെ എത്തുന്ന മമ്മൂട്ടിയുടെ രംഗം ഇതിനകം തന്നെ ആരാധകർ ഏറ്റെടുത്തുകഴിഞ്ഞു.
ധനുഷിനും മമ്മൂട്ടിക്കും പുറമെ നസീറുദ്ദീൻ ഷായും ചിത്രത്തിൽ അഭിനയിക്കുന്നുണ്ട്. 32 വർഷത്തെ ഇടവേളയ്ക്ക് ശേഷമാണ് മമ്മൂട്ടിയും നസീറുദ്ദീൻ ഷായും വീണ്ടും ഒന്നിക്കുന്നത്. മമ്മൂട്ടി ടൈറ്റിൽ കഥാപാത്രത്തെ അവതരിപ്പിച്ച 1994ലെ ‘പൊന്തൻമാട’ എന്ന ചിത്രത്തിലും നസീറുദ്ദീൻ ഷാ പ്രധാന വേഷത്തിൽ എത്തിയിരുന്നു.
2018ൽ റാം സംവിധാനം ചെയ്ത ‘പേരൻപ്’ എന്ന ചിത്രത്തിന് ശേഷം എട്ട് വർഷത്തെ ഇടവേളയ്ക്കുശേഷമാണ് മമ്മൂട്ടി തമിഴിൽ അഭിനയിക്കുന്നത്. രണ്ട് ഭാഗങ്ങളായാണ് ‘ഓം’ എത്തുന്നത്. ‘ഓം ചാപ്റ്റർ 1: ഉധിരം – ദി ബ്ലഡ് വുഡ്’ എന്നാണ് ആദ്യ ഭാഗത്തിന് നൽകിയിരിക്കുന്ന പേര്.
ധനുഷിന്റെ വണ്ടർ ബാർ ഫിലിംസും ആർ ടേക്ക് സ്റ്റുഡിയോസും ചേർന്നാണ് ഈ പാൻ-ഇന്ത്യൻ ചിത്രം നിർമ്മിക്കുന്നത്. സായ് പല്ലവി നായികയായി എത്തുന്ന ചിത്രത്തിൽ ശ്രീലീലയും പ്രധാന സ്ത്രീ കഥാപാത്രത്തെ അവതരിപ്പിക്കുന്നുണ്ട്. സായ് അഭയങ്കറാണ് സംഗീത സംവിധാനം നിർവഹിക്കുന്നത്.
ധനുഷിന്റെ കരിയറിലെ 55-ാമത്തെ ചിത്രമാണ് ‘ഓം’. നേരത്തെ ചിത്രത്തിന് ‘ഡി 55’ എന്നായിരുന്നു താൽക്കാലിക പേര് നൽകിയിരുന്നത്. തമിഴ്, തെലുങ്ക്, ഹിന്ദി ഭാഷകളിലായി ചിത്രം റിലീസ് ചെയ്യും. ഒക്ടോബർ 16നാണ് ചിത്രത്തിന്റെ റിലീസ്.