തിരുവനന്തപുരം: സംസ്ഥാനത്ത് നിലനിൽക്കുന്നത് അതീവ ഗുരുതരമായ മഴക്കെടുതി പ്രതിസന്ധിയാണെന്നും ദുരന്തമുഖത്ത് പകച്ചുനിൽക്കുന്ന ജനങ്ങളെയാണ് എങ്ങും കാണാൻ കഴിഞ്ഞതെന്നും പ്രതിപക്ഷ നേതാവ് പിണറായി വിജയൻ. മഴക്കെടുതിയിൽ ജീവൻ പൊലിഞ്ഞവർക്ക് ആദരാഞ്ജലികൾ അർപ്പിച്ച അദ്ദേഹം, മുൻകരുതലുകൾ എടുക്കുന്നതിൽ സർക്കാരിന് കടുത്ത വീഴ്ച സംഭവിച്ചതായി കുറ്റപ്പെടുത്തി. എങ്കിലും പ്രതിസന്ധി ഘട്ടത്തിൽ സർക്കാരിന്റെ ദുരിതാശ്വാസ പ്രവർത്തനങ്ങൾക്ക് പ്രതിപക്ഷത്തിന്റെ പൂർണ്ണ പിന്തുണ ഉണ്ടാകുമെന്നും കേരളം ഒറ്റക്കെട്ടായി നിൽക്കേണ്ട സമയമാണിതെന്നും അദ്ദേഹം വ്യക്തമാക്കി.
ചെറുപുഴയിലും പേരാവൂരിലും ജനങ്ങൾ വലിയ പ്രയാസത്തിലാണ്. ചെറുപുഴ ജോസ് ഗിരിയിൽ പ്രകൃതിദുരന്തമുണ്ടായി ഒരാഴ്ച കഴിഞ്ഞിട്ടും റോഡ് പുനഃസ്ഥാപിക്കാൻ സർക്കാരിന് കഴിഞ്ഞിട്ടില്ല. 2018-ലേത് നൂറ്റാണ്ടിലെ വലിയ പ്രളയമായിരുന്നു, സമാനമായ സാഹചര്യമാണ് 2019-ലും ഉണ്ടായത്. എന്നാൽ കൃത്യമായ കാലാവസ്ഥാ മുന്നറിയിപ്പുകൾ ഉണ്ടായിട്ടും മുൻകരുതലുകൾ എടുക്കുന്നതിൽ നിലവിലെ ഭരണകൂടം പരാജയപ്പെട്ടു. വയനാട് തുരങ്ക പാതയിൽ ഉണ്ടായ ദുരന്തവും മണ്ണിടിച്ചിൽ മുന്നറിയിപ്പുകൾ അവഗണിച്ചതിന്റെ ഉദാഹരണമാണ്.
മരിച്ച രാജേഷിന്റെ മൃതദേഹത്തോട് സർക്കാർ കാണിച്ച അനാദരവ് വലിയ വീഴ്ചയാണ്. മൃതദേഹം കൊണ്ടുപോകാൻ ഒരു ഫ്രീസർ ആംബുലൻസ് പോലും വിട്ടുനൽകാൻ കഴിഞ്ഞില്ല. മൂഴിയാർ ഡാം യാതൊരു മുന്നറിയിപ്പുമില്ലാതെ തുറന്നുവിട്ടതാണ് റാന്നി മുങ്ങാൻ കാരണമായത്. വ്യാപാരികൾക്കുണ്ടായ നഷ്ടപരിഹാരം അടിയന്തരമായി നൽകണം. മുൻ സർക്കാർ പുഴയിലെ മണലും ചെളിയും നീക്കാൻ പദ്ധതിയിട്ടപ്പോൾ അതിനെതിരെ കോടതിയിൽ പോയവരാണ് അന്നത്തെ പ്രതിപക്ഷമെന്നും പിണറായി വിജയൻ ഓർമ്മിപ്പിച്ചു.
കടലിൽ പോയി കാണാതായ മത്സ്യത്തൊഴിലാളികളെ കണ്ടെത്താൻ ഒരാഴ്ച പിന്നിട്ടിട്ടും സാധിച്ചിട്ടില്ല. അവരെ ചേർത്തുപിടിക്കേണ്ടതിന് പകരം ഉത്തരവാദപ്പെട്ടവരിൽ നിന്ന് മോശം സമീപനമാണ് ഉണ്ടാകുന്നത്. പത്തനംതിട്ടയിൽ ജില്ലാ അവലോകന യോഗത്തിൽ നിന്ന് ഭരണപക്ഷത്തെ തെറ്റുകൾ ചൂണ്ടിക്കാണിക്കുമെന്ന് ഭയന്നാണോ കെ.യു. ജനീഷ് കുമാർ എം.എൽ.എയെ മാറ്റിനിർത്തിയത് എന്ന് വ്യക്തമാക്കണം. സംസ്ഥാന ചരിത്രത്തിൽ ആദ്യമായിട്ടായിരിക്കും ഇത്തരം ഒരു നടപടിയെന്ന് അദ്ദേഹം വിമർശിച്ചു.
മുൻ സർക്കാർ ഒന്നും ചെയ്തില്ലെന്ന മുഖ്യമന്ത്രി വി.ഡി. സതീശന്റെ വിമർശനത്തിന്, “ഭാവനയിലുള്ള കാര്യങ്ങൾ പറയാൻ മിടുക്കനാണ് സതീശൻ, അതിനെയാണ് നുണ എന്ന് പറയുന്നത്” എന്ന് പിണറായി വിജയൻ പരിഹസിച്ചു. നിലവിലെ സാഹചര്യത്തിൽ കൂടുതൽ പറയുന്നില്ലെന്നും കൂട്ടിച്ചേർത്തു.
ക്ഷേമ പെൻഷൻ ബാങ്ക് അക്കൗണ്ട് വഴിയാക്കുന്നതിനോട് ആരോഗ്യമുള്ളവരുടെ കാര്യത്തിൽ വിയോജിപ്പില്ലെങ്കിലും കിടപ്പുരോഗികളായ പാവപ്പെട്ട മനുഷ്യർക്ക് ഇത് വലിയ തിരിച്ചടിയാകും. പഠനം നടത്താതെ എടുത്ത തീരുമാനം പെൻഷൻ വിതരണത്തെ ബാധിക്കും. കൂടാതെ, പ്രളയ സമയത്തെ മുഖ്യമന്ത്രിയുടെ വിരുന്ന് പോലുള്ള സംഭവങ്ങളിൽ സർക്കാരിന്റെ ഭാഗത്തുനിന്ന് ഔചിത്യം ഉണ്ടാകേണ്ടതായിരുന്നുവെന്നും പിണറായി വിജയൻ ചൂണ്ടിക്കാട്ടി.