ന്യൂഡൽഹി: പ്രതിപക്ഷ നേതാവ് പിണറായി വിജയന്റെ മകൾ വീണ വിജയനെതിരായ എൻഫോഴ്സ്മെന്റ് ഡയറക്ടറേറ്റ് നടപടിയിൽ പ്രതികരണവുമായി ആഭ്യന്തര മന്ത്രി രമേശ് ചെന്നിത്തല. നിയമം നിയമത്തിന്റെ വഴിക്ക് പോകുമെന്ന് ചെന്നിത്തല പറഞ്ഞു. വീണയുടെ ഹവാല ഇടപാടുമായി ബന്ധപ്പെട്ട വിഷയം സംസ്ഥാന ആഭ്യന്തര വകുപ്പിന്റെ പരിഗണനയിൽ വന്നിട്ടില്ലെന്നും അദ്ദേഹം വ്യക്തമാക്കി.
ലഹരിക്കേസുകളിൽ ഡിവൈഎഫ്ഐ നേതാക്കൾ പിടിയിലായതിൽ രാഷ്ട്രീയമില്ലെന്നും ചെന്നിത്തല പറഞ്ഞു. ഓപ്പറേഷൻ തൂഫാനിലും രാഷ്ട്രീയമില്ല. യൂത്ത് കോൺഗ്രസായാലും യൂത്ത് ലീഗായാലും ഡിവൈഎഫ്ഐ ആയാലും തെറ്റ് ചെയ്താൽ നടപടി ഉണ്ടാകുമെന്നും അദ്ദേഹം വ്യക്തമാക്കി.
ഒരു തലമുറയെ രക്ഷിക്കാനുള്ള നീക്കമാണ് ഓപ്പറേഷൻ തൂഫാനെന്നും രാജ്യത്തെ ഏറ്റവും വലിയ നാർക്കോ ഹണ്ടാണ് തൂഫാനെന്നും ചെന്നിത്തല പറഞ്ഞു.
വീണക്കെതിരായ അന്വേഷണം ശക്തമാക്കി ഇഡി
അതേസമയം, വീണ വിജയനെതിരായ അന്വേഷണം ഇഡി ശക്തമാക്കുകയാണ്. വീണ ഉപയോഗിച്ചുവെന്ന് കണ്ടെത്തിയ വ്യാജ സിം കാർഡുമായി ബന്ധപ്പെട്ട അന്വേഷണവും വ്യാപിപ്പിക്കാനാണ് നീക്കം.
കോഴിക്കോട്ടെ ഡിടിപിസി ഡെസ്റ്റിനേഷൻ മാനേജരായ നന്ദുലാലിന്റെ പേരിലാണ് സിം കാർഡ് എടുത്തതെന്നാണ് ഇഡി കണ്ടെത്തൽ. 2024 മുതൽ വീണ നന്ദുലാലിന്റെ പേരിലുള്ള സിം ഉപയോഗിച്ചിരുന്നതായും അന്വേഷണത്തിൽ വ്യക്തമാക്കിയിട്ടുണ്ട്.
വീണയും മുഹമ്മദ് റിയാസും ആവശ്യപ്പെട്ടതിനെ തുടർന്നാണ് സിം എടുത്തുനൽകിയതെന്ന് നന്ദുലാൽ മൊഴി നൽകിയതായി ഇഡി അറിയിച്ചു. എന്നാൽ സിം കാർഡ് എന്തിനാണ് ആവശ്യപ്പെട്ടതെന്ന് തനിക്ക് അറിയില്ലെന്നും നന്ദുലാൽ മൊഴി നൽകിയിട്ടുണ്ട്.
വ്യാജ സിം ഉപയോഗിച്ചത് ഇന്റർനെറ്റ് കോളുകൾക്കായിരുന്നുവെന്നും അനധികൃത പണമിടപാടുകൾക്കാണ് ഇത്തരം ഇന്റർനെറ്റ് കോളുകൾ ഉപയോഗിച്ചതെന്നുമാണ് ഇഡിയുടെ കണ്ടെത്തൽ.
വീണ വിജയനെ വീണ്ടും ചോദ്യം ചെയ്യാനും ഇഡി നീക്കം നടത്തുന്നുണ്ട്. ഇതിനായി അടുത്തയാഴ്ച വീണയ്ക്ക് നോട്ടീസ് നൽകുമെന്നാണ് വിവരം.