Home Top Stories10 ലക്ഷം രൂപ വാങ്ങുന്നതിനിടെ പിടിയിൽ; സുഹൈൽ ഷാജഹാനെ കോൺഗ്രസ് പുറത്താക്കി

10 ലക്ഷം രൂപ വാങ്ങുന്നതിനിടെ പിടിയിൽ; സുഹൈൽ ഷാജഹാനെ കോൺഗ്രസ് പുറത്താക്കി

by news_desk1
0 comments

തിരുവനന്തപുരം: സാമ്പത്തിക തട്ടിപ്പ് കേസിൽ അറസ്റ്റിലായ തിരുവനന്തപുരം ഡിസിസി അംഗം സുഹൈൽ ഷാജഹാനെ കോൺഗ്രസ് പുറത്താക്കി. പാർട്ടിയുടെ പ്രാഥമിക അംഗത്വത്തിൽ നിന്നാണ് പുറത്താക്കിയത്. കെപിസിസിയുടെ നിർദേശത്തെ തുടർന്ന് തിരുവനന്തപുരം ഡിസിസി അധ്യക്ഷൻ എൻ. ശക്തനാണ് നടപടി സ്വീകരിച്ചത്.

ഡോക്ടറിൽ നിന്ന് 10 ലക്ഷം രൂപ വാങ്ങുന്നതിനിടെ സുഹൈൽ ഷാജഹാൻ പിടിയിലായ സംഭവമാണ് നടപടിക്ക് പിന്നാലെ. ഡോ. സബൈൻ ശിവദാസനിൽ നിന്ന് പണം വാങ്ങുന്ന ദൃശ്യങ്ങൾ പൊലീസ് രഹസ്യകാമറയിൽ പകർത്തിയിരുന്നു. ചൊവ്വാഴ്ച രാവിലെ ആശുപത്രിയിലെത്തിയാണ് സുഹൈൽ പണം വാങ്ങിയത്. തുടർന്ന് പേട്ട പൊലീസ് ഇയാളെ പിടികൂടി.

ആശുപത്രിയെ അപകീർത്തിപ്പെടുത്തുന്ന വാർത്ത പിൻവലിക്കണമെങ്കിൽ 10 ലക്ഷം രൂപ നൽകണമെന്ന് സുഹൈൽ ഷാജഹാനും സംഘവും ഭീഷണിപ്പെടുത്തിയെന്നായിരുന്നു ഡോക്ടറുടെ പരാതി. കഴിഞ്ഞ ശനിയാഴ്ച ‘ചങ്ങാതിക്കൂട്ടം’ എന്ന ചാനലിൽ ആശുപത്രിയെക്കുറിച്ച് വാർത്ത വന്നതിന് പിന്നാലെയാണ് പണം ആവശ്യപ്പെട്ടതെന്നാണ് ആരോപണം. ആദ്യം പണം നൽകാൻ വിസമ്മതിച്ച ഡോക്ടറെ സംഘം വീണ്ടും ബന്ധപ്പെട്ടു. ഭയന്നതോടെ 10 ലക്ഷം രൂപ നൽകാമെന്ന് സമ്മതിക്കുകയും ചൊവ്വാഴ്ച എത്താൻ ആവശ്യപ്പെടുകയുമായിരുന്നു.

ആശുപത്രിയെക്കുറിച്ചുള്ള പോസ്റ്റ് ഇതിനിടെ ചാനലിൽ നിന്ന് നീക്കം ചെയ്തിരുന്നു. പണം കൈമാറാൻ സുഹൈൽ എത്തിയപ്പോൾ ഡോക്ടറും സംഘവും ഇയാളെ തടഞ്ഞുവച്ച് പൊലീസിനെ വിളിക്കുകയായിരുന്നു. പൊലീസിന്റെ നിർദേശപ്രകാരമാണ് പണം കൈമാറിയതെന്നും തെളിവുകൾ സഹിതം പ്രതിയെ പിടികൂടിയതെന്നും റിപ്പോർട്ടുണ്ട്.

എകെജി സെന്റർ ആക്രമണക്കേസിലെ പ്രതി കൂടിയാണ് സുഹൈൽ ഷാജഹാൻ. കൊച്ചിയിൽ കാപ്പ കേസ് പ്രതികളുടെ വിവാദ യോഗം സംഘടിപ്പിച്ചതും സുഹൈൽ ഷാജഹാനായിരുന്നു. യോഗത്തിൽ കെ. സുധാകരൻ പങ്കെടുത്തത് വലിയ വിവാദമായിരുന്നു. കെ. സുധാകരന്റെ വിശ്വസ്തനായി അറിയപ്പെടുന്ന സുഹൈൽ ഷാജഹാനെതിരായ നടപടി കോൺഗ്രസ് നേതൃത്വത്തിന്റെ നിർദേശപ്രകാരമാണ് ഉണ്ടായത്.

You may also like