കേന്ദ്ര റെയിൽവേ മന്ത്രാലയത്തിന് കീഴിലുള്ള പൊതുമേഖലാ സ്ഥാപനമായ റൈറ്റ്സ് ലിമിറ്റഡിൽ 281 അപ്രന്റിസ് ഒഴിവുകളിലേക്ക് അപേക്ഷ ക്ഷണിച്ചു. ബിരുദധാരികൾക്കും ഡിപ്ലോമ, ഐ.ടി.ഐ യോഗ്യതയുള്ളവർക്കുമാണ് അവസരം. രാജ്യത്തുടനീളമുള്ള വിവിധ പദ്ധതികളിലും ഓഫീസുകളിലുമായി ഒരു വർഷത്തെ പരിശീലനമാണ് ലഭിക്കുക. നവംബർ 25 ആണ് അപേക്ഷിക്കാനുള്ള അവസാന തീയതി. ബിരുദ, ഡിപ്ലോമ യോഗ്യതകൾ 2021 നവംബർ അഞ്ചിനോ അതിനുശേഷമോ നേടിയവർക്കാണ് അപേക്ഷിക്കാനാവുക.
ഗ്രാജ്വേറ്റ് അപ്രന്റിസ്: 168 ഒഴിവുകൾ
എൻജിനീയറിങ് വിഭാഗത്തിൽ 125ഉം നോൺ എൻജിനീയറിങ് വിഭാഗത്തിൽ 43ഉം ഒഴിവുകളാണുള്ളത്. പ്രതിമാസം 15,650 രൂപ സ്റ്റൈപ്പൻഡ് ലഭിക്കും. സിവിൽ, ആർക്കിടെക്ചർ, ഇലക്ട്രിക്കൽ, സിഗ്നൽ ആൻഡ് ടെലികോം, മെക്കാനിക്കൽ, കെമിക്കൽ, മെറ്റലർജിക്കൽ, ഐ.ടി വിഷയങ്ങളിൽ ബി.ഇ/ബി.ടെക് യോഗ്യതയുള്ളവർക്ക് അപേക്ഷിക്കാം. ബി.എ, ബി.ബി.എ, ബി.കോം, ബി.എസ്സി, ബി.സി.എ ബിരുദധാരികൾക്കും അവസരമുണ്ട്. കുറഞ്ഞത് 60 ശതമാനം മാർക്കാണ് വേണ്ടത്. എസ്.സി, എസ്.ടി, ഒ.ബി.സി-എൻ.സി.എൽ, ഭിന്നശേഷി വിഭാഗക്കാർക്ക് 50 ശതമാനം മാർക്ക് മതിയാകും.
ഡിപ്ലോമ അപ്രന്റിസ്: 62 ഒഴിവുകൾ
സിവിൽ, ഇലക്ട്രിക്കൽ, മെക്കാനിക്കൽ, കെമിക്കൽ, മെറ്റലർജിക്കൽ എൻജിനീയറിങ് വിഭാഗങ്ങളിലാണ് ഒഴിവുകൾ. 60 ശതമാനം മാർക്കോടെ ഡിപ്ലോമ നേടിയിരിക്കണം. സംവരണ വിഭാഗക്കാർക്കും ഭിന്നശേഷിക്കാർക്കും 50 ശതമാനം മാർക്ക് മതിയാകും. പ്രതിമാസ സ്റ്റൈപ്പൻഡ് 13,450 രൂപ.
ഐ.ടി.ഐ ട്രേഡ് അപ്രന്റിസ്: 51 ഒഴിവുകൾ
ഐ.ടി.ഐ യോഗ്യതയുള്ളവർക്ക് അപേക്ഷിക്കാം. പ്രതിമാസ സ്റ്റൈപ്പൻഡ് 10,560 രൂപയാണ്.
പ്രായവും തിരഞ്ഞെടുപ്പും
2026 നവംബർ അഞ്ചിന് 18 വയസ്സ് പൂർത്തിയായിരിക്കണം. യോഗ്യതാ പരീക്ഷയിലെ മാർക്കിന്റെ അടിസ്ഥാനത്തിൽ മെറിറ്റ് പട്ടിക തയ്യാറാക്കിയാണ് തിരഞ്ഞെടുപ്പ്. എഴുത്തുപരീക്ഷയോ അഭിമുഖമോ ഉണ്ടായിരിക്കില്ല.
അപേക്ഷിക്കേണ്ട വിധം
ബിരുദ, ഡിപ്ലോമ വിഭാഗങ്ങളിലുള്ളവർ എൻ.എ.ടി.എസ് പോർട്ടലിലും ഐ.ടി.ഐ വിഭാഗത്തിലുള്ളവർ എൻ.എ.പി.എസ് പോർട്ടലിലും ആദ്യം രജിസ്റ്റർ ചെയ്യണം. തുടർന്ന് റൈറ്റ്സിന്റെ വെബ്സൈറ്റിലെ അപേക്ഷാ ഫോം പൂരിപ്പിച്ച് സർട്ടിഫിക്കറ്റുകളുടെ സ്കാൻ ചെയ്ത പകർപ്പുകൾ പി.ഡി.എഫ് രൂപത്തിൽ അപ്ലോഡ് ചെയ്യണം.
നിലവിൽ അപ്രന്റിസ്ഷിപ്പ് ചെയ്യുന്നവർക്കും മുമ്പ് പരിശീലനം പൂർത്തിയാക്കിയവർക്കും അപേക്ഷിക്കാനാവില്ല. നവംബർ 25നകം അപേക്ഷ സമർപ്പിക്കണം.
