തിരുവനന്തപുരം: നിയമസഭാ തിരഞ്ഞെടുപ്പിനോടനുബന്ധിച്ച് തിരുവനന്തപുരം ജില്ലയിൽ കോൺഗ്രസിന്റെ സാധ്യതാ സ്ഥാനാർഥി പട്ടികയ്ക്ക് രൂപം ലഭിക്കുന്നു. നേമം മണ്ഡലത്തിൽ കെ.എസ്. ശബരീനാഥൻ മത്സരിക്കാനാണ് സാധ്യത. സിപിഐയിൽ നിന്ന് കോൺഗ്രസിലേക്കെത്തിയ മീനാങ്കൽ കുമാറിനെ നെടുമങ്ങാട് മണ്ഡലത്തിലെ സ്ഥാനാർഥിയാക്കാനാണ് പാർട്ടി പരിഗണിക്കുന്നത്. വാമനപുരത്ത് പാലോട് രവിയുടെ പേരിനും മുൻതൂക്കം ലഭിക്കുന്നതായി സൂചനയുണ്ട്. അരുവിക്കരയും നെയ്യാറ്റിൻകരയും മണ്ഡലങ്ങളിലെ സ്ഥാനാർഥി കാര്യത്തിൽ ഇതുവരെ അന്തിമ ധാരണയായിട്ടില്ല.
നഗരസഭാ തിരഞ്ഞെടുപ്പിൽ കവടിയാർ വാർഡിൽ നിന്ന് മത്സരിച്ച് കോൺഗ്രസിന് വിജയമെത്തിക്കാൻ നിർണായക പങ്കുവഹിച്ച നേതാവാണ് കെ.എസ്. ശബരീനാഥൻ. ആദ്യം തിരുവനന്തപുരം സെൻട്രൽ മണ്ഡലത്തിൽ നിന്ന് മത്സരിക്കാനായിരുന്നു അദ്ദേഹത്തിന്റെ തീരുമാനം. എന്നാൽ ആ സീറ്റ് സി.എം.പി സ്ഥാനാർഥിയായ സി.പി. ജോണിന് അനുവദിച്ചതോടെ ശബരീനാഥനായി മറ്റൊരു മണ്ഡലം പരിഗണിക്കുകയായിരുന്നു.
ഇതിനിടെ കോൺഗ്രസ് സ്ഥാനാർഥി നിർണയവുമായി ബന്ധപ്പെട്ട് സ്ക്രീനിങ് കമ്മിറ്റി ഇന്ന് വീണ്ടും ഡൽഹിയിൽ യോഗം ചേരും. കെ.പി.സി.സി അധ്യക്ഷൻ സണ്ണി ജോസഫും പ്രതിപക്ഷ നേതാവ് വി.ഡി. സതീശനും ഉൾപ്പെടെയുള്ള നേതാക്കൾ യോഗത്തിൽ പങ്കെടുക്കും. രണ്ടാംഘട്ട സ്ഥാനാർഥി പട്ടിക തയ്യാറാക്കുന്നതിനായാണ് യോഗം.
സിറ്റിംഗ് എം.എൽ.എമാരെ ഉൾപ്പെടുത്തി ഏറ്റവും വിജയസാധ്യതയുള്ള 31 പേരുടെ ആദ്യ പട്ടിക നേരത്തെ അംഗീകരിച്ചിരുന്നു. തിങ്കളാഴ്ച വീണ്ടും കേന്ദ്ര തിരഞ്ഞെടുപ്പ് സമിതി യോഗം ചേരാനാണ് സാധ്യത. ഭൂരിഭാഗം മണ്ഡലങ്ങളിലെ സ്ഥാനാർഥി കാര്യത്തിൽ അന്ന് തന്നെ തീരുമാനം ഉണ്ടാകുമെന്നാണ് സൂചന.
ഇതിനിടെ സ്വയം സ്ഥാനാർഥിത്വം പ്രഖ്യാപിച്ച കെ. സുധാകരൻ എം.പി.യെ കെ.പി.സി.സി അധ്യക്ഷൻ സണ്ണി ജോസഫ് അദ്ദേഹത്തിന്റെ വസതിയിൽ സന്ദർശിച്ചു. അടൂർ പ്രകാശുമായും അദ്ദേഹം കൂടിക്കാഴ്ച നടത്തി. എംപിമാർ തിരഞ്ഞെടുപ്പിൽ മത്സരിക്കുന്നതുമായി ബന്ധപ്പെട്ട അന്തിമ തീരുമാനം ഹൈക്കമാൻഡിനാണെന്ന് ഇരുവർക്കും അറിയിച്ചതായി പാർട്ടി വൃത്തങ്ങൾ അറിയിച്ചു.