ബെംഗളൂരു: കര്ണാടക കോണ്ഗ്രസില് മുഖ്യമന്ത്രിസ്ഥാനവുമായി ബന്ധപ്പെട്ട രാഷ്ട്രീയ നീക്കങ്ങള് വീണ്ടും സജീവമാകുന്നതിനിടെ, അധികാരമാറ്റ സാധ്യതകളെ ചുറ്റിപ്പറ്റി പുതിയ ചര്ച്ചകള്ക്ക് തുടക്കമായി. മുഖ്യമന്ത്രി സിദ്ധരാമയ്യ സ്ഥാനമൊഴിയേണ്ട സാഹചര്യം ഉണ്ടായാല് ഉപമുഖ്യമന്ത്രി ഡി.കെ. ശിവകുമാറിന് പകരം മറ്റൊരു മുഖത്തെ ഉയര്ത്തിക്കാട്ടാനുള്ള ശ്രമത്തിലാണ് അദ്ദേഹമെന്ന സൂചനകളാണ് രാഷ്ട്രീയ കേന്ദ്രങ്ങളില് നിന്ന് പുറത്തുവരുന്നത്.
ഇതിന്റെ ഭാഗമായാണ് മുതിര്ന്ന കോണ്ഗ്രസ് നേതാവും മന്ത്രിയുമായ ജി. പരമേശ്വരയെ ഒപ്പം കൂട്ടി സിദ്ധരാമയ്യ ദില്ലിയിലെത്തിയതെന്നാണ് റിപ്പോര്ട്ടുകള്. കോണ്ഗ്രസ് ഹൈക്കമാന്ഡുമായി നടക്കുന്ന കൂടിക്കാഴ്ചകളില് സംസ്ഥാനത്തെ രാഷ്ട്രീയ സാഹചര്യം, നേതൃത്വമാറ്റ സാധ്യത, മന്ത്രിസഭാ പുനഃസംഘടന എന്നിവ ചര്ച്ചയാകുമെന്നാണ് സൂചന.
സര്ക്കാരിന്റെ മൂന്നാം വാര്ഷികം അടുത്തെത്തുന്ന സാഹചര്യത്തില് മുഖ്യമന്ത്രി സ്ഥാനത്ത് മാറ്റമുണ്ടാകുമെന്ന അഭ്യൂഹങ്ങള് ശക്തമായിട്ടുണ്ട്. അധികാര പങ്കിടല് സംബന്ധിച്ച് തിരഞ്ഞെടുപ്പിന് പിന്നാലെ ധാരണയുണ്ടായിരുന്നുവെന്നും രണ്ടര വര്ഷം പൂര്ത്തിയാകുമ്പോള് നേതൃത്വമാറ്റം ഉണ്ടാകണമെന്നുമാണ് ഡി.കെ. ശിവകുമാര് അനുകൂലികളുടെ നിലപാട്.
അതേസമയം, താന് പൂര്ണ കാലാവധി മുഖ്യമന്ത്രിയായി തുടരുമെന്ന നിലപാടാണ് സിദ്ധരാമയ്യ ഇതുവരെ ആവര്ത്തിച്ച് പറഞ്ഞത്. എന്നാല് പാര്ട്ടി നേതൃത്വം ആവശ്യപ്പെട്ടാല് രാഷ്ട്രീയ സാഹചര്യം വിലയിരുത്തി തീരുമാനം എടുക്കുമെന്ന സൂചനയും അദ്ദേഹത്തോട് അടുത്ത വൃത്തങ്ങള് നല്കുന്നുണ്ട്.
ജി. പരമേശ്വരയെ മുഖ്യമന്ത്രി സ്ഥാനത്തേക്ക് പരിഗണിക്കാനുള്ള ചര്ച്ചകള് ശക്തമാകുന്നത് ദളിത് സമൂഹത്തില്നിന്നുള്ള നേതൃപ്രാതിനിധ്യം മുന്നിര്ത്തിയുള്ള രാഷ്ട്രീയ നീക്കമായാണ് വിലയിരുത്തപ്പെടുന്നത്. ഇതിലൂടെ ഡി.കെ. ശിവകുമാറിന്റെ സാധ്യതയെ രാഷ്ട്രീയമായി പ്രതിരോധിക്കാനാകുമെന്ന കണക്കുകൂട്ടലും കോണ്ഗ്രസ് വൃത്തങ്ങളില് ചര്ച്ചയാകുന്നു.
മുഖ്യമന്ത്രി സ്ഥാനവുമായി ബന്ധപ്പെട്ട ചര്ച്ചകള്ക്കൊപ്പം മന്ത്രിസഭയിലും വലിയ അഴിച്ചുപണി ഉണ്ടാകുമെന്ന സൂചനകളുണ്ട്. പാര്ട്ടിക്കുള്ളില് അസന്തുഷ്ടരായ മുതിര്ന്ന നേതാക്കളെ മന്ത്രിസഭയില് ഉള്പ്പെടുത്താനുള്ള ആലോചനകളും സജീവമാണ്.
ഇതിനിടെ, കോണ്ഗ്രസ് ആഭ്യന്തര തര്ക്കങ്ങള് ഭരണത്തെ ബാധിക്കുന്നുവെന്ന് ആരോപിച്ച് ബിജെപി രംഗത്തെത്തി. അധികാര പോരാട്ടം സംസ്ഥാന വികസനത്തെ പിന്നോട്ടടിക്കുകയാണെന്നും മുഖ്യമന്ത്രിസ്ഥാനത്തെ ചുറ്റിപ്പറ്റിയുള്ള ചര്ച്ചകള് ജനങ്ങളുടെ പ്രതീക്ഷകളെ നിരാശപ്പെടുത്തുന്നതാണെന്നും പ്രതിപക്ഷം വിമര്ശിച്ചു.