ഐശ്വര്യത്തിന്റെയും സമ്പൽസമൃദ്ധിയുടെയും സന്ദേശമോതി ഇന്ന് മലയാളി ലോകം വിഷു ആഘോഷിക്കുന്നു. പ്രകൃതിയുടെ പുതുജന്മവും മനുഷ്യന്റെ പുതുആരംഭവും ഒരുമിക്കുന്ന ഈ ദിനം, ഒരു ഉത്സവമാത്രമല്ല-ജീവിതത്തെക്കുറിച്ചുള്ള ഒരു ദർശനമാണ്. ഓണത്തെപ്പോലെ തന്നെ കാർഷിക സംസ്കാരത്തിന്റെ അടിത്തറയിൽ പിറന്ന വിഷു, ഭൂമിയോടും പ്രകൃതിയോടും മനുഷ്യന്റെ ആത്മബന്ധം വീണ്ടും ഓർമ്മിപ്പിക്കുന്ന വസന്തോത്സവമാണ്. വിഷുവിന്റെ ആദ്യപ്രഭയിൽ കണ്ണുതുറന്ന് കാണുന്ന ‘കണി’യിൽ ഒളിഞ്ഞിരിക്കുന്നത് വെറും വസ്തുക്കൾ മാത്രമല്ല; വിശ്വാസവും പ്രതീക്ഷയും തലമുറകളുടെ പാരമ്പര്യവുമാണ്. കണിക്കൊന്നയുടെ സ്വർണനിറവും നിലവിളക്കിന്റെ പ്രകാശവും കൃഷ്ണവിഗ്രഹത്തിന്റെ ശാന്തതയും നാണയങ്ങളുടെ മിനുക്കും- എല്ലാം ചേർന്ന് ‘ഇനി വരുന്ന കാലം നന്മയാകട്ടെ’ എന്ന ആത്മവിശ്വാസത്തിന്റെ പ്രതീകമായി മാറുന്നു.
കണി കാണുന്ന ആ നിമിഷം, ജീവിതത്തിലെ എല്ലാ ഇരുളുകളെയും മറികടന്ന് പ്രകാശത്തിലേക്കുള്ള യാത്രയുടെ തുടക്കമായി മലയാളി കാണുന്നു. ഒരു കാലത്ത് വിഷു എന്നത് ഗ്രാമീണ ജീവിതത്തിന്റെ ഉത്സവമേളയായിരുന്നു. വീടുതോറും കണി ഒരുക്കം, അയൽവീടുകളിൽ പോയി കൈ നീട്ടം വാങ്ങുന്ന കുട്ടികൾ, അടുക്കളയിൽ പൊങ്ങിയൊരുങ്ങുന്ന വിഷുസദ്യയുടെ മണവും, വൈകുന്നേരങ്ങളിൽ പടക്കങ്ങളുടെ പൊട്ടിത്തെറിയുമെല്ലാം ചേർന്ന് ഒരു സമൂഹത്തിന്റെ സന്തോഷഭാഷയായിരുന്നു. ചെറിയ നാണയങ്ങൾ കൈയിൽ കിട്ടിയ സന്തോഷം പോലും വലിയൊരു സമ്പാദ്യമായി കരുതിയിരുന്ന ആ നാളുകൾ, ഇന്നും ഗൃഹാതുരത്വമായി മനസ്സിൽ തെളിഞ്ഞുനിൽക്കുന്നു. കാലം മാറിയപ്പോൾ ആഘോഷരീതികളും മാറി. കൂട്ടുകുടുംബ വ്യവസ്ഥ ചുരുങ്ങി ന്യൂക്ലിയർ കുടുംബങ്ങളായി മാറിയെങ്കിലും, വിഷു പോലുള്ള ആഘോഷങ്ങളാണ് വീണ്ടും ആ ബന്ധങ്ങളെ കൂട്ടിയിണക്കുന്നത്. നഗരജീവിതത്തിന്റെ തിരക്കുകൾക്കിടയിലും, ഒരുമിച്ചിരിക്കാൻ ഒരു കാരണം തേടുന്ന മനുഷ്യന് വിഷു ഒരു അവസരമാണ്.
ഡിജിറ്റൽ ലോകം കൈനീട്ടത്തെയും ആശംസകളെയും പുതിയ രൂപത്തിലേക്ക് മാറ്റിയിട്ടുണ്ടെങ്കിലും, മനസ്സുകൾ തമ്മിലുള്ള ബന്ധത്തിന്റെ ചൂട് ഇന്നും അതേപോലെ നിലനിൽക്കുന്നു എന്നതാണ് ആശ്വാസം. ഐതിഹ്യങ്ങളാലും വിഷു സമ്പന്നമാണ്. നരകാസുരന്റെ അതിക്രമങ്ങളിൽ നിന്ന് ലോകത്തെ രക്ഷിക്കാൻ ശ്രീകൃഷ്ണനും സത്യഭാമയും നടത്തിയ പോരാട്ടവും, തിന്മയ്ക്ക് മേൽ നന്മ നേടിയ വിജയവും വിഷുവിന്റെ ആത്മാവിൽ പ്രതിഫലിക്കുന്നു. അതുകൊണ്ടുതന്നെ വിഷു ഒരു ആചാരമല്ല-നീതിയും നന്മയും ഒടുവിൽ ജയിക്കും എന്ന വിശ്വാസത്തിന്റെ പ്രതീകമാണ്. എന്നാൽ ഈ ആഘോഷത്തിന്റെ പ്രകാശത്തിനിടയിൽ നമ്മെ അലട്ടുന്ന ചില ഇരുണ്ട സത്യങ്ങളും ഉണ്ട്. വർത്തമാനകാലത്ത് മനുഷ്യർ തമ്മിലുള്ള ബന്ധങ്ങളിൽ സത്യസന്ധതയും ആത്മാർത്ഥതയും കുറയുന്നു. ലോകം മുഴുവൻ അശാന്തിയും സംഘർഷവും നിറഞ്ഞിരിക്കുമ്പോൾ, സമാധാനം തേടിയുള്ള മനുഷ്യന്റെ യാത്ര തുടരുകയാണ്. സ്വാർത്ഥതയും അധികാരലാലസയും മനുഷ്യനെ തമ്മിലടിപ്പിക്കുമ്പോൾ നഷ്ടമാകുന്നത് ബന്ധങ്ങളും വിശ്വാസവും സഹോദര്യവുമാണ്. ഒരു ആവേശത്തിൽ തകർന്നുപോകുന്ന ബന്ധങ്ങൾ വീണ്ടും പണിയാൻ കഴിയാതെ പോകുന്ന സാഹചര്യങ്ങളാണ് നാം ചുറ്റും കാണുന്നത്. ഉത്സവങ്ങളുടെ ആഘോഷാരവങ്ങൾക്കിടയിൽ പോലും മനസ്സുകൾ തമ്മിലുള്ള അകലം വർദ്ധിക്കാതിരിക്കാനുള്ള ജാഗ്രത അത്യാവശ്യമാണ്. ചേർത്തുനിർത്തലിന്റെയും പങ്കിടലിന്റെയും കരുതലിന്റെയും നിമിഷങ്ങളാകണം ഓരോ വിഷുവും. കാരണം, സമ്പത്ത് എന്നത് പണമല്ല-ബന്ധങ്ങളാണ്, സ്നേഹമാണ്, മനുഷ്യത്തമാണ്. വിഷു നമ്മെ പഠിപ്പിക്കുന്നത് ഒരു വലിയ സത്യം തന്നെയാണ്-ജീവിതത്തിലെ യഥാർഥ സമൃദ്ധി പുറത്തല്ല, ഉള്ളിലാണ്. മനസ്സിലെ വെളിച്ചം കെടുത്താതെ സൂക്ഷിക്കുമ്പോഴാണ് ജീവിതം അർഥവത്താകുന്നത്. ഈ പൊന്നിൻ മേടമാസം, പുതിയ പ്രതീക്ഷകൾക്ക് തുടക്കം കുറിക്കട്ടെ… പഴയ ബന്ധങ്ങളെ പുതുക്കിപ്പണിയട്ടെ… മനുഷ്യരെ തമ്മിൽ ചേർത്ത് നിർത്തുന്ന സ്നേഹത്തിന്റെ പാലമായി മാറട്ടെ…