തിരുവനന്തപുരം: വീര്യം കുറഞ്ഞ മദ്യത്തിന്റെ നികുതി കുറയ്ക്കാനുള്ള യുഡിഎഫ് സർക്കാർ തീരുമാനത്തിന് മുൻപേ തന്നെ മദ്യനിർമാതാക്കൾക്ക് അനുകൂലമായി ഫയൽ നീക്കം നടന്നുവെന്ന ആരോപണത്തിൽ മുഖ്യമന്ത്രി വി.ഡി. സതീശൻ കടുത്ത പ്രതിരോധത്തിൽ. സർക്കാർ അധികാരത്തിലെത്തി ഒരു മാസം തികയുന്നതിനുമുമ്പ് ഉയർന്ന ഈ വിവാദത്തിൽ കോൺഗ്രസിനകത്തും യുഡിഎഫ് നേതൃത്വത്തിനകത്തും അതൃപ്തി ശക്തമാകുകയാണ്.
എക്സൈസ് മന്ത്രിയുമായി കൂടിയാലോചന നടത്താതെയാണ് നടപടികൾ മുന്നോട്ടുപോയതെന്ന വിമർശനം ഉയരുന്നതിനിടെ മത-സമുദായ സംഘടനകളും മുതിർന്ന കോൺഗ്രസ് നേതാവ് വി.എം. സുധീരനും ഉൾപ്പെടെ നിരവധി പേർ പ്രതിഷേധം അറിയിച്ചിട്ടുണ്ട്. ഇതോടെ വിഷയത്തിൽ മുഖ്യമന്ത്രി ഒറ്റപ്പെട്ട അവസ്ഥയിലാണെന്ന രാഷ്ട്രീയ വിലയിരുത്തലും ശക്തമാണ്.
മദ്യവിൽപ്പനയുമായി ബന്ധപ്പെട്ട നടപടികൾ അതിവേഗത്തിൽ പൂർത്തിയാക്കിയതായി സൂചിപ്പിക്കുന്ന രേഖകൾ പുറത്തുവന്നതോടെയാണ് സർക്കാർ പ്രതിരോധത്തിലായത്. തീരുമാനം ഒരു പ്രമുഖ മദ്യനിർമാണ കമ്പനിക്ക് അനുകൂലമാണെന്ന ആരോപണവും പ്രതിപക്ഷം ഉയർത്തിയിട്ടുണ്ട്.
പ്രതിപക്ഷത്തിന്റെ ആരോപണമനുസരിച്ച്, 2023 ഫെബ്രുവരി 2-ന് സമർപ്പിക്കപ്പെട്ട അപേക്ഷയിൽ എൽഡിഎഫ് സർക്കാർ രണ്ട് വർഷത്തോളം തീരുമാനമെടുത്തിരുന്നില്ല. തുടർന്ന് 2026 മേയ് 18-ന് പുതിയ സർക്കാർ അധികാരത്തിലെത്തി. മേയ് 19-ന് ഫയൽ വീണ്ടും സജീവമായി. മേയ് 21-ന് ഫയൽ മുഖ്യമന്ത്രിയുടെ പരിഗണനയ്ക്കായി എത്തി.
ജൂൺ 14-ന് രാത്രി 10.12-ന് മുഖ്യമന്ത്രി ഫയലിൽ തീരുമാനം രേഖപ്പെടുത്തി അഡീഷണൽ ചീഫ് സെക്രട്ടറിക്ക് കൈമാറി. തുടർന്ന് ജൂൺ 15-ന് രാവിലെ ഓഫീസ് സമയം ആരംഭിക്കുന്നതിന് മുമ്പ് തന്നെ ഫയൽ മുന്നോട്ടുനീക്കപ്പെട്ടു. പിന്നാലെ ജൂൺ 19-ന് ബജറ്റിൽ വീര്യം കുറഞ്ഞ മദ്യത്തിന് നികുതി ഇളവ് പ്രഖ്യാപിക്കുകയായിരുന്നു.
വിവാദം ശക്തമാകുന്നതിനിടെ കോൺഗ്രസ് ദേശീയ നേതൃത്വത്തിലും അസ്വസ്ഥത പ്രകടമായിട്ടുണ്ട്. വിഷയത്തിൽ എ.ഐ.സി.സി ജനറൽ സെക്രട്ടറി കെ.സി. വേണുഗോപാലിന്റെ പ്രതികരണവും മുഖ്യമന്ത്രിയെ പ്രതിരോധത്തിലാക്കുന്നതായി രാഷ്ട്രീയ നിരീക്ഷകർ വിലയിരുത്തുന്നു.
ഇന്ന് നിയമസഭയിൽ ബജറ്റ് ചർച്ചകൾക്ക് മുഖ്യമന്ത്രി മറുപടി പറയാനിരിക്കെ, സർക്കാരിന്റെ നിലപാട് എന്തായിരിക്കുമെന്നത് ശ്രദ്ധേയമാണ്. ഉയർന്നിരിക്കുന്ന ആരോപണങ്ങൾക്കിടയിൽ തീരുമാനത്തിൽ മാറ്റമുണ്ടാകുമോ എന്നതും രാഷ്ട്രീയ കേന്ദ്രങ്ങൾ ഉറ്റുനോക്കുകയാണ്.