തമിഴ് സിനിമാ ലോകത്ത് അരങ്ങേറ്റ ചിത്രത്തിന്റെ റിലീസിനായി കാത്തിരിക്കെ, വിജയിയുടെ മകൻ ജേസൺ സഞ്ജയ് വീണ്ടും ചർച്ചകളിൽ. ജേസൺ സംവിധാനം ചെയ്യുന്ന സിഗ്മ എന്ന ചിത്രത്തിലെ പ്രമോഷണൽ ഗാനമായ ‘സിഗ്മ സ്റ്റൈൽ’ പുറത്തിറങ്ങിയതോടെയാണ് അദ്ദേഹത്തിന്റെ പ്രകടനം സാമൂഹ്യമാധ്യമങ്ങളിൽ ശ്രദ്ധ നേടിയത്.
ഗാനത്തിൽ സ്റ്റൈലിഷ് ലുക്കിലും ആത്മവിശ്വാസം നിറഞ്ഞ പ്രകടനത്തോടെയും ജേസൺ പ്രത്യക്ഷപ്പെടുന്നുണ്ട്. റാപ്പ് സംഗീതത്തിന്റെ പശ്ചാത്തലത്തിൽ അവതരിപ്പിച്ച ഗാനത്തിൽ ചെറിയ നൃത്തച്ചുവടുകളും പ്രത്യേക ഭാവപ്രകടനങ്ങളും ഉൾപ്പെടുത്തിയിട്ടുണ്ട്. ഇതോടെ സംവിധായകൻ മാത്രമല്ല, അഭിനയത്തിലും ഭാവിയിൽ ജേസൺ ശ്രദ്ധ കേന്ദ്രീകരിക്കുമോയെന്ന ചർച്ചകൾ ആരാധകർക്കിടയിൽ സജീവമായിരിക്കുകയാണ്.
നേരത്തെ വിജയ് നായകനായ വേട്ടൈക്കാരൻ സിനിമയിലെ ഒരു ഗാനരംഗത്തിൽ ജേസൺ പ്രത്യക്ഷപ്പെട്ടിരുന്നു. ആ ചിത്രത്തിലെ നൃത്തപ്രകടനം ഏറെ ശ്രദ്ധിക്കപ്പെട്ടതും ആരാധകർ ഇന്നും ഓർത്തുപറയുന്നതുമാണ്. സിഗ്മ സ്റ്റൈൽ ഗാനത്തിലൂടെ വീണ്ടും ജേസൺ തന്റെ സാന്നിധ്യം അറിയിച്ചതായി ആരാധകർ വിലയിരുത്തുന്നു.
സിഗ്മ ചിത്രത്തിന് സംഗീതം ഒരുക്കിയിരിക്കുന്നത് തമൻ എസ് ആണ്. ലൈക പ്രൊഡക്ഷൻസിന്റെ ബാനറിൽ സുബാസ്കരൻ നിർമ്മിക്കുന്ന ചിത്രത്തിൽ സന്ദീപ് കൃഷ്ണൻ നായകനായി എത്തുന്നു. ഫാരിയ അബ്ദുള്ള, രാജു സുന്ദരം, സമ്പത്ത് രാജ്, ശിവ് പണ്ഡിറ്റ്, യോഗ് ജാപ്പി, അൻബു താസൻ, കിരൺ കൊണ്ട, മഹാലക്ഷ്മി സുദർശൻ എന്നിവർ പ്രധാന കഥാപാത്രങ്ങളെ അവതരിപ്പിക്കുന്നു.
2024 നവംബറിലാണ് ജേസൺ സഞ്ജയുടെ ആദ്യ സംവിധാന സംരംഭം ഔദ്യോഗികമായി പ്രഖ്യാപിച്ചത്. ചിത്രം ഈ വർഷം തന്നെ തിയേറ്ററുകളിലെത്തുമെന്നാണ് സൂചന. സംവിധായകനെന്ന നിലയിലെ ആദ്യ പരീക്ഷണത്തിനൊപ്പം, സിഗ്മ സ്റ്റൈൽ ഗാനത്തിലൂടെ ജേസൺ സഞ്ജയ് തന്റെ പ്രകടനശേഷിയും പ്രേക്ഷകർക്കു മുന്നിൽ അവതരിപ്പിച്ചിരിക്കുകയാണ്.