ന്യൂഡൽഹി: ലോക്സഭയിൽ തൃണമൂൽ കോൺഗ്രസിനെ (ടിഎംസി) പിളർത്തി ബിജെപി നയിക്കുന്ന എൻഡിഎ സഖ്യത്തിലേക്ക് ചേക്കേറാൻ ഒരുങ്ങുന്ന വിമത എംപിമാരുടെ കത്ത് പുറത്തുവിടണമെന്ന ആവശ്യവുമായി പാർട്ടി നേതൃത്വം രംഗത്ത്. മുതിർന്ന നേതാവ് കാക്കോലി ഘോഷ് ദാസ്തിദാറിന്റെ നേതൃത്വത്തിൽ 20 ടിഎംസി ലോക്സഭാംഗങ്ങൾ ഒപ്പിട്ട കത്ത് സ്പീക്കർ ഓം ബിർളയ്ക്ക് കൈമാറിയെന്ന വാദത്തെ തൃണമൂൽ ഔദ്യോഗികമായി ചോദ്യം ചെയ്തു. കത്ത് സമർപ്പിച്ചെന്ന് പ്രഖ്യാപിച്ച് 24 മണിക്കൂർ പിന്നിട്ടിട്ടും ഒപ്പുകളടങ്ങിയ അത്തരം ഒരു രേഖ ആരും കണ്ടിട്ടില്ലെന്ന് ലോക്സഭയിലെ ടിഎംസി ചീഫ് വിപ്പ് കല്യാൺ ബാനർജി ഡൽഹിയിൽ വാർത്താസമ്മേളനത്തിൽ തുറന്നടിച്ചു.
ബർദമാൻ – ദുർഗാപൂർ ലോക്സഭ എംപി കീർത്തി ആസാദിനൊപ്പമാണ് കല്യാൺ ബാനർജി മാധ്യമങ്ങളെ കണ്ടത്. “സ്പീക്കർക്ക് മുന്നിൽ അങ്ങനെയൊരു കത്ത് എത്തിയിട്ടില്ലെന്ന് എനിക്ക് കൃത്യമായി പറയാൻ കഴിയും. ഇത്രയും വലിയൊരു അവകാശവാദം ഉന്നയിക്കുന്ന കാക്കോലി ദാസ്തിദാർ എന്തുകൊണ്ടാണ് എംപിമാരുടെ കയ്യൊപ്പുള്ള കത്ത് പുറത്തു കാണിക്കാത്തത്? കൂറുമാറ്റ നിരോധന നിയമം മറികടക്കണമെങ്കിൽ പാർലമെന്ററി പാർട്ടിയുടെ മൂന്നിൽ രണ്ട് ഭൂരിപക്ഷം (20 എംപിമാർ) വിമതർക്ക് വേണം. എന്നാൽ 12 ലോക്സഭ എംപിമാർ ഇപ്പോഴും മമതാ ബാനർജിക്കൊപ്പം ഉറച്ചുനിൽക്കുകയാണ്. പരമാവധി 16 പേർ മാത്രമാണ് വിമതർക്കൊപ്പമുള്ളത്. അതുകൊണ്ടുതന്നെ ബിജെപിയിൽ ലയിക്കുകയല്ലാതെ അവർക്ക് മറ്റ് മാർഗമില്ല,” കല്യാൺ ബാനർജി വ്യക്തമാക്കി.
ബിജെപി കേന്ദ്ര നേതൃത്വത്തിന്റെ നേരിട്ടുള്ള ഇടപെടലിലൂടെയാണ് തൃണമൂലിൽ പിളർപ്പുണ്ടാക്കാൻ ശ്രമം നടക്കുന്നതെന്ന് ടിഎംസി ആരോപിച്ചു. പശ്ചിമ ബംഗാൾ മുഖ്യമന്ത്രി സുവേന്ദു അധികാരി വിമത എംപിമാരുമായി കൂടിക്കാഴ്ച നടത്തിയത് അതിരുകടന്ന രാഷ്ട്രീയ കളിയാണ്. കേന്ദ്രത്തിൽ പുതിയ ബിജെപി സർക്കാർ അധികാരമേറ്റ് ഒരു മാസം പിന്നിട്ടിട്ടും മന്ത്രിമാർക്ക് വകുപ്പുകൾ പോലും വിഭജിച്ചു നൽകാൻ കഴിയാത്ത പ്രതിസന്ധിക്കിടയിലാണ് പ്രതിപക്ഷ പാർട്ടികളെ തകർക്കാനുള്ള ഈ നീക്കമെന്നും തൃണമൂൽ കുറ്റപ്പെടുത്തി. വിമതരായി മാറിയ എംപിമാർക്ക് ധൈര്യമുണ്ടെങ്കിൽ സ്വന്തം മണ്ഡലങ്ങളിലെ പാർട്ടി പ്രവർത്തകരെ നേരിട്ട് ചെന്ന് കാണട്ടെയെന്നും ചീഫ് വിപ്പ് വെല്ലുവിളിച്ചു. കത്തുമായി ബന്ധപ്പെട്ട വിവാദം വരും ദിവസങ്ങളിൽ പാർലമെന്റിലും ബംഗാൾ രാഷ്ട്രീയത്തിലും വലിയ കൊടുങ്കാറ്റ് ഉയർത്തുമെന്നുറപ്പാണ്.