ദില്ലി: മൈക്രോഫിനാൻസ് തട്ടിപ്പ് കേസും കെ.കെ. മഹേശന്റെ മരണവുമായി ബന്ധപ്പെട്ട് ഉയരുന്ന ആരോപണങ്ങൾക്ക് മറുപടിയുമായി എസ്.എൻ.ഡി.പി യോഗം ജനറൽ സെക്രട്ടറി വെള്ളാപ്പള്ളി നടേശൻ. തനിക്കെതിരെ വർഷങ്ങളായി നിരവധി ആരോപണങ്ങളും അന്വേഷണങ്ങളും നടന്നിട്ടുണ്ടെങ്കിലും ഒന്നും തെളിയിക്കാനായിട്ടില്ലെന്ന് അദ്ദേഹം പറഞ്ഞു.
തന്നെ ലക്ഷ്യമിട്ട് പലതവണ ശ്രമങ്ങൾ നടന്നിട്ടുണ്ടെന്നും, വിവിധ വിഷയങ്ങൾ സിബിഐയും സുപ്രീംകോടതിയും വരെ പരിശോധിച്ചതാണെന്നും വെള്ളാപ്പള്ളി വ്യക്തമാക്കി. തെറ്റ് ചെയ്തതായി തെളിഞ്ഞാൽ ശിക്ഷ സ്വീകരിക്കാൻ തയ്യാറാണെന്നും അദ്ദേഹം പറഞ്ഞു. സമുദായത്തിനുള്ളിലെ ചിലരടക്കം തനിക്കെതിരെ പ്രവർത്തിക്കുന്നുണ്ടെന്നും അദ്ദേഹം ആരോപിച്ചു.
കോൺഗ്രസ് നേതാവ് വി.എം. സുധീരനെതിരെയും വെള്ളാപ്പള്ളി രൂക്ഷ വിമർശനം ഉന്നയിച്ചു. കഴിഞ്ഞ മൂന്ന് പതിറ്റാണ്ടായി സുധീരൻ തന്നെ രാഷ്ട്രീയമായി വേട്ടയാടുകയാണെന്നും, ഇപ്പോൾ വീണ്ടും ആരോപണങ്ങളുമായി രംഗത്തെത്തുകയാണെന്നും അദ്ദേഹം പറഞ്ഞു.
മാൻഹോളിൽ വീണ് മരിച്ച ഒരാൾക്ക് നഷ്ടപരിഹാരം നൽകിയ സംഭവത്തെക്കുറിച്ചുള്ള തന്റെ പഴയ പരാമർശങ്ങളും വെള്ളാപ്പള്ളി വിശദീകരിച്ചു. സമാന സാഹചര്യങ്ങളിൽ മറ്റ് കുടുംബങ്ങൾക്കും ഒരേ രീതിയിലുള്ള പരിഗണന ലഭിക്കണമെന്ന ചോദ്യമാണ് താൻ ഉന്നയിച്ചതെന്നും, അതിനെ തെറ്റായി വ്യാഖ്യാനിച്ചുവെന്നുമാണ് അദ്ദേഹത്തിന്റെ നിലപാട്.
കെ.കെ. മഹേശനുമായി ബന്ധപ്പെട്ട വിവാദങ്ങളിലും വെള്ളാപ്പള്ളി പ്രതികരിച്ചു. നിലവിൽ ഉയരുന്ന ആരോപണങ്ങൾ രാഷ്ട്രീയ പ്രേരിതമാണെന്നാണ് അദ്ദേഹത്തിന്റെ ആരോപണം. തനിക്ക് ഒരു രാഷ്ട്രീയ പാർട്ടിയോടും പ്രത്യേക വിധേയത്വമില്ലെന്നും, സ്വതന്ത്ര നിലപാടുകളാണ് സ്വീകരിക്കുന്നതെന്നും അദ്ദേഹം പറഞ്ഞു.
തനിക്ക് ലഭിച്ച പത്മഭൂഷൺ ബഹുമതി വ്യക്തിപരമായ നേട്ടമല്ലെന്നും, എസ്.എൻ.ഡി.പി യോഗത്തിനും സമുദായത്തിനുമുള്ള അംഗീകാരമാണെന്നും വെള്ളാപ്പള്ളി പറഞ്ഞു. സമുദായത്തിന്റെ സാമൂഹികവും സാമ്പത്തികവുമായ പുരോഗതിക്കായാണ് താൻ പ്രവർത്തിച്ചതെന്നും അദ്ദേഹം കൂട്ടിച്ചേർത്തു.
പത്മഭൂഷൺ പുരസ്കാരം തിരിച്ചുനൽകണമെന്ന ആവശ്യങ്ങളും പുതിയ ആരോപണങ്ങളും ഉയരുന്നതിനിടെയാണ് വെള്ളാപ്പള്ളി നടേശന്റെ പ്രതികരണം.