തിരുവനന്തപുരം: സംസ്ഥാന ബജറ്റിൽ വീര്യം കുറഞ്ഞ മദ്യത്തിന് നൽകിയ നികുതിയിളവിന് പിന്നിൽ അഴിമതിയുണ്ടെന്ന് ആരോപിച്ച് പ്രതിപക്ഷ നേതാവ് പിണറായി വിജയൻ. ഒരു സ്വകാര്യ മദ്യ കമ്പനിക്ക് അനുകൂലമായി സർക്കാർ നടപടിയെടുത്തുവെന്നാണ് അദ്ദേഹം നിയമസഭയിൽ ആരോപിച്ചത്.
പ്രതിപക്ഷം നൽകിയ അടിയന്തര പ്രമേയ നോട്ടീസുമായി ബന്ധപ്പെട്ട ചർച്ചയ്ക്കിടെയായിരുന്നു ആരോപണം. വീര്യം കുറഞ്ഞ മദ്യത്തിന് നികുതിയിളവ് നൽകിയത് ഒരു സ്വകാര്യ കമ്പനിക്ക് അമിത ലാഭം ഉണ്ടാക്കാനുള്ള ശ്രമമാണെന്നും, അതിനായി ബജറ്റിൽ പ്രത്യേക നികുതി നിർദേശം ഉൾപ്പെടുത്തിയതാണെന്നും പ്രതിപക്ഷ നേതാവ് ആരോപിച്ചു.
പുതിയ നികുതി നിർദേശം ബജറ്റ് ഷെഡ്യൂളിൽ മുൻകൂട്ടി ആലോചിച്ചതായി തോന്നുന്നില്ലെന്നും അദ്ദേഹം ചൂണ്ടിക്കാട്ടി. ഈ തീരുമാനത്തിലൂടെ സ്വകാര്യ മദ്യ കമ്പനിക്ക് വലിയ സാമ്പത്തിക നേട്ടമുണ്ടാകുമെന്നും അദ്ദേഹം പറഞ്ഞു. കർണാടക ആസ്ഥാനമായുള്ള ബക്കാഡി കമ്പനിക്ക് വേണ്ടിയാണ് നികുതി കുറച്ചതെന്നും പ്രതിപക്ഷ നേതാവ് ആരോപിച്ചു.
2023-ൽ ബക്കാഡി കമ്പനി സംസ്ഥാന നികുതി വകുപ്പിന് അപേക്ഷ നൽകിയിരുന്നുവെന്നും, മുൻ സർക്കാർ വിഷയത്തിൽ തിടുക്കപ്പെട്ട് തീരുമാനമെടുത്തില്ലെന്നും അദ്ദേഹം പറഞ്ഞു. എന്നാൽ പുതിയ സർക്കാർ അധികാരത്തിലെത്തിയതിന് പിന്നാലെ ഫയൽ അതിവേഗത്തിൽ നീങ്ങിയതായി അദ്ദേഹം ആരോപിച്ചു. ഏഴ് ഉദ്യോഗസ്ഥർ വളരെ വേഗത്തിൽ ഫയൽ പരിശോധിച്ചെന്നും, പുതിയ സർക്കാർ വന്നതിന് ശേഷം ഫയൽ നീക്കത്തിൽ അസാധാരണ വേഗത ഉണ്ടായിരുന്നുവെന്നും അദ്ദേഹം പറഞ്ഞു.
സഭയിൽ ബഹളവും ഇറങ്ങിപ്പോക്കും
നാടിന് ഗുരുതര പ്രത്യാഘാതങ്ങൾ ഉണ്ടാക്കാൻ സാധ്യതയുള്ള വിഷയമാണിതെന്നും അടിയന്തര പ്രമേയം അനുവദിക്കണമെന്നും പ്രതിപക്ഷ നേതാവ് ആവശ്യപ്പെട്ടു. എന്നാൽ ഇത് ബജറ്റ് ചർച്ചയുടെ പരിധിയിലുള്ള വിഷയമായതിനാൽ അടിയന്തര പ്രമേയ നോട്ടീസ് അനുവദിക്കാനാകില്ലെന്ന് സ്പീക്കർ തിരുവഞ്ചൂർ രാധാകൃഷ്ണൻ വ്യക്തമാക്കി.
സ്പീക്കറുടെ തീരുമാനത്തെ ചോദ്യം ചെയ്ത പ്രതിപക്ഷ നേതാവ് ശക്തമായ പ്രതിഷേധം രേഖപ്പെടുത്തി. തുടർന്ന് പ്രതിപക്ഷ അംഗങ്ങൾ മുദ്രാവാക്യം വിളിച്ച് സഭയുടെ നടുത്തളത്തിലിറങ്ങി പ്രതിഷേധിക്കുകയും പിന്നീട് സഭയിൽ നിന്ന് ഇറങ്ങിപ്പോകുകയും ചെയ്തു.
എന്ത് പ്രതിഷേധമുണ്ടായാലും വാച്ച് ആൻഡ് വാർഡിനെ വിളിക്കില്ലെന്ന് സ്പീക്കർ വ്യക്തമാക്കി. വിഷയത്തിൽ ബജറ്റ് ചർച്ചയ്ക്ക് ശേഷം സർക്കാരിന് മറുപടി നൽകാനുള്ള അവസരം ലഭിക്കുമെന്നും അദ്ദേഹം കൂട്ടിച്ചേർത്തു.