ബെംഗളൂരു ഐഎസ്ആർഒ ആസ്ഥാനത്ത് ബോംബ് ഭീഷണി; ജീവനക്കാരെ ഒഴിപ്പിച്ചു, പരിശോധന തുടരുന്നു

ബെംഗളൂരു: ബെംഗളൂരു ഐഎസ്ആർഒ ആസ്ഥാനത്ത് ബോംബ് ഭീഷണി. ഇമെയിലിലൂടെയാണ് ഭീഷണി സന്ദേശം ലഭിച്ചത്. ഇതേത്തുടർന്ന് ജീവനക്കാരെ ഓഫീസുകളിൽ നിന്ന് ഒഴിപ്പിക്കുകയും സുരക്ഷാ നടപടികൾ ശക്തമാക്കുകയും ചെയ്തു.

ഉച്ചയോടെയാണ് ഭീഷണി സന്ദേശം ലഭിച്ചത്. ആസ്ഥാനത്ത് ബോംബ് സ്ഥാപിച്ചിട്ടുണ്ടെന്നും സ്ഥാപനം തകർക്കുമെന്നും പറയുന്ന ഇമെയിലാണ് അധികൃതർക്ക് ലഭിച്ചത്.

സംഭവത്തെ തുടർന്ന് പൊലീസ്, ബോംബ് സ്‌ക്വാഡ് എന്നിവർ സ്ഥലത്തെത്തി പരിശോധന ആരംഭിച്ചു. ആസ്ഥാനത്ത് വിശദമായ പരിശോധന പുരോഗമിക്കുകയാണ്.

അതേസമയം, ലഭിച്ച ഭീഷണി സന്ദേശം വ്യാജമാണോ എന്ന കാര്യത്തിലും പൊലീസ് സംശയം പ്രകടിപ്പിച്ചിട്ടുണ്ട്. സംഭവത്തിൽ അന്വേഷണം തുടരുകയാണ്.