ന്യൂഡൽഹി: കേന്ദ്ര സർക്കാരിന്റെ വിദ്യാഭ്യാസ നയങ്ങൾക്കും രാജ്യത്തെ ജനാധിപത്യ സ്ഥാപനങ്ങളിലെ വീഴ്ചകൾക്കുമെതിരെ ശക്തമായ പ്രതികരണവുമായി സി.ജെ.പി (CJP). “പൊതുജനം എന്ത് പറയുന്നു” എന്ന പേരിൽ സെപ്റ്റംബറിൽ രാജ്യവ്യാപകമായി വമ്പൻ ക്യാമ്പയിൻ സംഘടിപ്പിക്കുമെന്ന് ഭാരവാഹികൾ വാർത്താസമ്മേളനത്തിൽ അറിയിച്ചു. ക്യാമ്പയിന്റെ ഭാഗമായി സംഘടനയുടെ അംഗത്വ വിതരണത്തിന് തുടക്കമായിട്ടുണ്ട്.
വിദ്യാഭ്യാസ രംഗത്ത് സമഗ്രമായ മാറ്റങ്ങൾ ലക്ഷ്യമിട്ടാണ് സംഘടന മുന്നോട്ടുപോകുന്നത്. സർക്കാർ സ്കൂളുകൾ അടച്ചുപൂട്ടുകയും സ്വകാര്യ സ്കൂളുകൾക്ക് സർക്കാർ ഒത്താശ ചെയ്യുകയുമാണ്. പഠനച്ചെലവും ഫീസും സാധാരണ കുടുംബങ്ങൾക്ക് താങ്ങാൻ കഴിയുന്നതിനും അപ്പുറമാണ്. വിദ്യാഭ്യാസം കച്ചവടമല്ല, മറിച്ച് പൗരന്റെ അടിസ്ഥാന അവകാശമാണെന്ന് സി.ജെ.പി വ്യക്തമാക്കി.
ഇലക്ഷൻ കമ്മീഷനിൽ (EC) ജനങ്ങൾക്ക് വിശ്വാസം നഷ്ടപ്പെട്ടു. നീതിപീഠത്തിലും മാധ്യമരംഗത്തും കടുത്ത നിരാശയാണുള്ളത്. സർക്കാരിനെ രക്ഷിക്കാനുള്ള കേസുകൾ അർദ്ധരാത്രിയിൽ പോലും പരിഗണിക്കുമ്പോൾ സാധാരണക്കാരന് നീതി അകലെയാണ്. ചില ജഡ്ജിമാർ നടത്തുന്ന പരാമർശങ്ങൾ പോലും ഞെട്ടിക്കുന്നതാണെന്നും മാധ്യമങ്ങൾ സർക്കാരിന് വഴങ്ങി പ്രവർത്തിക്കുകയാണെന്നും ഭാരവാഹികൾ കുറ്റപ്പെടുത്തി.
സി.ജെ.പിയുടെ ഔദ്യോഗിക വെബ്സൈറ്റ് വഴിയും ക്യു.ആർ (QR) കോഡ് സ്കാൻ ചെയ്തും പൊതുജനങ്ങൾക്ക് അംഗത്വമെടുക്കാം. സംഘടന യാതൊരുവിധ ഫണ്ട് ശേഖരണവും നടത്തുന്നില്ലെന്നും വ്യാജ പ്രചാരണങ്ങളിൽ വീഴരുതെന്നും വക്താക്കൾ മുന്നറിയിപ്പ് നൽകി. നിലവിൽ രാഷ്ട്രീയ പാർട്ടിയാകുന്നതിൽ പ്രസക്തിയില്ലെന്നും അവർ വ്യക്തമാക്കി.
സംഘടനയുടെ പുതിയ ഭാരവാഹികളെയും പ്രഖ്യാപിച്ചിട്ടുണ്ട്. അഞ്ച് സോണുകളിലും പ്രത്യേക കമ്മിറ്റികൾ രൂപീകരിക്കും. അഭിജിത്ത് ദീപ്കെ കൺവീനറായും, അശുതോഷ് റങ്ക, സൗരവ് ദാസ് എന്നിവർ കോ-കൺവീനർമാരായും പ്രവർത്തിക്കും.
സി.ജെ.പി ഒരു മതനിരപേക്ഷ ജനാധിപത്യ കൂട്ടായ്മയാണെന്നും രാജ്യത്തെ വിദ്യാർത്ഥികളുടെയും യുവാക്കളുടെയും ശബ്ദമായി മാറുമെന്നും കൺവീനർ അഭിജിത്ത് ദീപ്കെ പറഞ്ഞു. ധർമ്മേന്ദ്ര പ്രധാന്റെ രാജി വലിയ നേട്ടമാണെന്നും അതിനേക്കാൾ വലിയ നേട്ടം ജനങ്ങളുടെ ഉള്ളിലെ ഭയം ഇല്ലാതായതാണെന്നും അദ്ദേഹം കൂട്ടിച്ചേർത്തു.