ആലുവ: എറണാകുളം ആലുവയിൽ 12 വയസുകാരിയെ കാണാതായിട്ട് നാല് ദിവസം പിന്നിട്ടിട്ടും അന്വേഷണത്തിൽ കാര്യമായ പുരോഗതിയില്ലെന്ന് കുടുംബം. പൊലീസ് അന്വേഷണം തൃപ്തികരമല്ലെന്നും കേസുമായി ബന്ധപ്പെട്ട വിവരങ്ങൾ കുടുംബവുമായി പങ്കുവയ്ക്കുന്നില്ലെന്നുമാണ് ബന്ധുക്കളുടെ ആരോപണം.
കാണാതാകുമ്പോൾ കുട്ടിയുടെ കൈവശമുണ്ടായിരുന്ന അമ്മയുടെ മൊബൈൽ ഫോൺ ഇടയ്ക്കിടെ ഓണായതായി പൊലീസ് കണ്ടെത്തി. ഫോൺ ലൊക്കേഷൻ ആദ്യം കാസർകോട്, പിന്നീട് മംഗളൂരു, തുടർന്ന് മുംബൈ എന്നിവിടങ്ങളിൽ ലഭിച്ചെങ്കിലും അന്വേഷണത്തിൽ നിർണായക പുരോഗതി ഉണ്ടായിട്ടില്ല.
സംഭവത്തിൽ വിശദമായ അന്വേഷണം തുടരുകയാണെന്ന് ആലുവ വെസ്റ്റ് പൊലീസ് അറിയിച്ചു. ഫോൺ ലൊക്കേഷൻ കേന്ദ്രീകരിച്ച് അന്വേഷണം കേരളത്തിന് പുറത്തേക്കും വ്യാപിപ്പിച്ചിട്ടുണ്ടെന്നും ഒന്നിലധികം പൊലീസ് സംഘങ്ങളെ ഇതിനായി നിയോഗിച്ചിട്ടുണ്ടെന്നും അധികൃതർ വ്യക്തമാക്കി. ഫോൺ ഇടയ്ക്കിടെ സ്വിച്ച് ഓഫ് ആകുന്നത് അന്വേഷണത്തിന് വെല്ലുവിളിയാകുന്നതായും പൊലീസ് അറിയിച്ചു.
കുട്ടി സഞ്ചരിച്ച വഴികളിലെ സി.സി.ടി.വി ദൃശ്യങ്ങൾ ശേഖരിക്കാൻ ശ്രമിച്ചെങ്കിലും പ്രസക്തമായ ദൃശ്യങ്ങൾ ലഭിച്ചിട്ടില്ല. ലൊക്കേഷൻ വിവരങ്ങളുടെ അടിസ്ഥാനത്തിൽ ചില സംശയങ്ങൾ പരിശോധിച്ചുവരികയാണെന്നും പൊലീസ് അറിയിച്ചു.
കഴിഞ്ഞ ശനിയാഴ്ച രാവിലെ കൂട്ടുകാരിയുടെ വീട്ടിൽ നിന്ന് പുസ്തകം വാങ്ങാനായി പുറത്തിറങ്ങിയ കുട്ടി പിന്നീട് തിരിച്ചെത്തിയിരുന്നില്ല. വൈകുന്നേരമായിട്ടും കുട്ടിയെ കണ്ടെത്താനാകാതിരുന്നതോടെ കുടുംബം സ്വമേധയാ തിരച്ചിൽ നടത്തിയ ശേഷം പൊലീസിൽ പരാതി നൽകി.
കാണാതായി ഒരു ദിവസം കഴിഞ്ഞപ്പോഴാണ് കുട്ടിയുടെ കൈവശമുണ്ടായിരുന്ന ഫോൺ ആദ്യമായി ഓണായത്. കാസർകോട് ലൊക്കേഷൻ ലഭിച്ചതിനെ തുടർന്ന് കുട്ടിയെ കണ്ടെത്താമെന്ന പ്രതീക്ഷ ഉണ്ടായിരുന്നെങ്കിലും പിന്നീട് ഫോൺ വീണ്ടും സ്വിച്ച് ഓഫ് ആയതോടെ അന്വേഷണം കൂടുതൽ സങ്കീർണമായി. തുടർന്ന് മംഗളൂരും മുംബൈയും ഉൾപ്പെടെയുള്ള സ്ഥലങ്ങളിലേക്കും അന്വേഷണം വ്യാപിപ്പിച്ചിരിക്കുകയാണ്.