യുകെയിലെ പ്രമുഖ ബീച്ചുകളിൽ ലക്ഷക്കണക്കിന് നീല നിറത്തിലുള്ള കടൽജീവികൾ കരയ്ക്കടിഞ്ഞത് ആശങ്കയ്ക്കിടയാക്കി. വെലെല്ല വെലെല്ല (Velella velella) എന്നറിയപ്പെടുന്ന ഈ ജീവികൾ യഥാർഥ ജെല്ലിഫിഷുകളല്ല. ശക്തമായ കാറ്റും അസാധാരണമായ ചൂടും മൂലമാണ് ഇവ വൻതോതിൽ തീരത്തേക്ക് അടിഞ്ഞെത്തിയതെന്നാണ് വിദഗ്ധരുടെ വിലയിരുത്തൽ. കാലാവസ്ഥാ വ്യതിയാനവും ഈ പ്രതിഭാസത്തിന് കാരണമായിരിക്കാമെന്ന സംശയവും ഉയരുന്നുണ്ട്.
ഇംഗ്ലണ്ടിലെ കംബ്രിയയിലെ സെന്റ് ബീസ് ബീച്ചിൽ അടുത്തിടെയാണ് ഇലക്ട്രിക് ബ്ലൂ നിറത്തിലുള്ള ഈ കടൽജീവികളെ വൻതോതിൽ കണ്ടെത്തിയത്. ഇതിന് മുമ്പ് വെയിൽസ് തീരങ്ങളിലും സമാനമായ സംഭവം റിപ്പോർട്ട് ചെയ്തിരുന്നു. കഴിഞ്ഞ ഒരു പതിറ്റാണ്ടിനിടയിലെ ഏറ്റവും വലിയ കരയ്ക്കടിയൽ സംഭവങ്ങളിലൊന്നാണിതെന്നാണ് വിദഗ്ധർ ചൂണ്ടിക്കാട്ടുന്നത്.
എന്താണ് വെലെല്ല വെലെല്ല?
കാഴ്ചയിൽ ജെല്ലിഫിഷുകളോട് സാമ്യമുണ്ടെങ്കിലും ‘ബൈ-ദി-വിൻഡ് സെയിലേഴ്സ്’ (By-the-wind sailors) എന്നറിയപ്പെടുന്ന വെലെല്ല വെലെല്ല യഥാർഥ ജെല്ലിഫിഷുകളല്ല. ആയിരക്കണക്കിന് സൂക്ഷ്മജീവികൾ ഒരുമിച്ച് ജീവിക്കുകയും പ്രവർത്തിക്കുകയും ചെയ്യുന്ന കൊളോണിയൽ ഹൈഡ്രോയിഡുകളുടെ കൂട്ടായ്മയാണ് ഇവ.
ഏകദേശം രണ്ട് ഇഞ്ച് (അഞ്ച് സെന്റീമീറ്റർ) മാത്രം വലിപ്പമുള്ള ഇവയുടെ ശരീരത്തിന് മുകളിലുള്ള സുതാര്യമായ ‘പായ’ പോലെയുള്ള ഭാഗത്താണ് കാറ്റ് തട്ടി കടലിലൂടെ സഞ്ചരിക്കുന്നത്. ശരീരത്തിന്റെ അടിഭാഗത്തുള്ള നേർത്ത സ്പർശിനികൾ ഉപയോഗിച്ചാണ് ഇവ സൂക്ഷ്മജീവികളെ ഇരയാക്കുന്നത്.
തീരത്തടിഞ്ഞ ഈ കടൽജീവികളെ നേരിട്ട് സ്പർശിക്കാതിരിക്കാനും കുട്ടികളെയും വളർത്തുമൃഗങ്ങളെയും ഇവയിൽ നിന്ന് അകറ്റി നിർത്താനും തീരദേശവാസികൾക്ക് ജാഗ്രതാ നിർദേശം നൽകിയിട്ടുണ്ട്. കാലാവസ്ഥാ വ്യതിയാനത്തിന്റെ സ്വാധീനത്തെക്കുറിച്ച് കൂടുതൽ പഠനങ്ങൾ ആവശ്യമാണെന്നും സമുദ്രവിദഗ്ധർ അഭിപ്രായപ്പെടുന്നു.