ആലപ്പുഴ: എസ്.എൻ.ഡി.പി യോഗം കണിച്ചുകുളങ്ങര യൂണിയൻ സെക്രട്ടറിയും മൈക്രോഫിനാൻസ് കോ-ഓർഡിനേറ്ററുമായിരുന്ന കെ.കെ. മഹേശന്റെ മരണവുമായി ബന്ധപ്പെട്ട അന്വേഷണത്തിൽ തുടക്കം മുതൽ തന്നെ ഗുരുതര വീഴ്ചകൾ സംഭവിച്ചുവെന്ന ആരോപണം ശക്തമാകുന്നു. കേസിൽ പ്രതിപ്പട്ടികയിൽ ഉൾപ്പെട്ടവരിലേക്ക് അന്വേഷണം കാര്യക്ഷമമായി എത്തിയില്ലെന്നും, അവരുടെ വീടുകളിലോ വ്യാപാര സ്ഥാപനങ്ങളിലോ പരിശോധന നടത്താൻ അന്വേഷണസംഘം തയ്യാറായില്ലെന്നും ആക്ഷേപമുണ്ട്.
അതേസമയം, മരിച്ച മഹേശന്റെ വീടും ബാങ്ക് അക്കൗണ്ടുകളും വ്യാപാര സ്ഥാപനങ്ങളുമാണ് അന്വേഷണത്തിന്റെ പ്രധാന കേന്ദ്രങ്ങളായതെന്ന് കുടുംബം ആരോപിക്കുന്നു. കേസിന്റെ പ്രാഥമിക അന്വേഷണം നടത്തിയ ഡിഐജി ഹർഷിത, മരണത്തിൽ അസ്വാഭാവികതയില്ലെന്നും ഇത് സാധാരണ ആത്മഹത്യയാണെന്നും റിപ്പോർട്ട് നൽകിയിരുന്നു.
എന്നാൽ, കൂടുതൽ അന്വേഷണം ആവശ്യപ്പെട്ട് മഹേശന്റെ കുടുംബം അന്നത്തെ മുഖ്യമന്ത്രി പിണറായി വിജയന് പരാതി നൽകി. തുടർന്ന് 2022-ൽ കേസ് ക്രൈംബ്രാഞ്ചിന് കൈമാറി. മഹേശൻ എഴുതിയതായി പറയപ്പെടുന്ന 34 പേജുള്ള ആത്മഹത്യാക്കുറിപ്പിൽ ഉയർന്ന നിരവധി ആരോപണങ്ങളിൽ ക്രൈംബ്രാഞ്ച് വിശദമായ അന്വേഷണം നടത്തിയിട്ടില്ലെന്നാണ് ആക്ഷേപം.
മരണവുമായി ബന്ധപ്പെട്ട നിർണായക വ്യക്തികളെ ഇതുവരെ ചോദ്യം ചെയ്തിട്ടില്ലെന്നും പരാതിയുണ്ട്. മഹേശന്റെ സാമ്പത്തിക ഇടപാടുകളെ കേന്ദ്രീകരിച്ചായിരുന്നു അന്വേഷണത്തിന്റെ വലിയൊരു ഭാഗമെന്നും കുടുംബം ചൂണ്ടിക്കാട്ടുന്നു.
2022-ൽ ജാമ്യമില്ലാ വകുപ്പുകൾ ചുമത്തി കേസെടുക്കാൻ കോടതി നിർദേശിച്ചിരുന്നെങ്കിലും, കേസിലെ പ്രധാന പ്രതികൾക്കെതിരെ അറസ്റ്റ് നടപടികളോ നോട്ടീസ് നൽകലോ ഇതുവരെ ഉണ്ടായിട്ടില്ലെന്നും ആരോപണം ഉയരുന്നു. കേസിന്റെ അന്വേഷണം കാര്യക്ഷമമല്ലെന്ന വിമർശനങ്ങൾക്കിടയിൽ കൂടുതൽ നടപടികൾ ആവശ്യപ്പെട്ട് കുടുംബം രംഗത്തുണ്ട്.