കോഴിക്കോട്: വീര്യം കുറഞ്ഞ മദ്യത്തിന് നികുതി കുറച്ച സർക്കാർ തീരുമാനത്തിൽ മുഖ്യമന്ത്രിക്ക് പിന്തുണയുമായി കെ.പി. നൗഷാദ് അലി എംഎൽഎ. ഇത് പുരോഗമനപരമായ ചുവടുവെയ്പ്പാണെന്നും മദ്യമെന്ന വാക്ക് കേൾക്കുമ്പോൾ മുൻവിധിയോടെ സമീപിക്കുന്നതുകൊണ്ടാണ് തെറ്റിദ്ധാരണകൾ ഉണ്ടാകുന്നതെന്നും അദ്ദേഹം പറഞ്ഞു.
“ആരോപണം ഉന്നയിക്കുന്നവർക്ക് വിഷയം വ്യക്തമായി മനസ്സിലായിട്ടില്ലെന്നാണ് എനിക്ക് തോന്നുന്നത്. ശാസ്ത്രീയമായ നികുതി ഘടനയാണ് ബജറ്റിൽ അവതരിപ്പിച്ചിരിക്കുന്നത്. വീര്യം കുറഞ്ഞ മദ്യത്തെ പ്രോത്സാഹിപ്പിക്കുകയെന്നത് അബ്കാരി നയത്തിന്റെ പ്രഖ്യാപിത ലക്ഷ്യമാണ്. അത് മുൻ സർക്കാർ കാലത്ത് രൂപീകരിച്ച അബ്കാരി നയത്തിലുമുണ്ടായിരുന്നു. ഇപ്പോൾ അത് നടപ്പിലാക്കിയെന്നതാണ് പ്രത്യേകത,” എന്ന് കെ.പി. നൗഷാദ് അലി വ്യക്തമാക്കി.
വീര്യം കൂടിയ മദ്യം ഉപയോഗിക്കുന്നവരെ വീര്യം കുറഞ്ഞ മദ്യത്തിലേക്ക് ആകർഷിക്കുകയാണ് ഈ തീരുമാനത്തിന്റെ ലക്ഷ്യമെന്നും അദ്ദേഹം പറഞ്ഞു. “അതിനെ പ്രോത്സാഹിപ്പിക്കുന്നു എന്നതുകൊണ്ട് നിർബന്ധിച്ച് കുടിപ്പിക്കുന്നു എന്നല്ല അർഥം. മദ്യപാനരീതിയിൽ മാറ്റം കൊണ്ടുവരാനുള്ള ശ്രമമാണ് ഇത്,” എന്നും അദ്ദേഹം കൂട്ടിച്ചേർത്തു.
ആരോപണങ്ങൾക്ക് അടിസ്ഥാനമെന്താണെന്ന് വ്യക്തമല്ലെന്നും ഇത് ചരിത്രപരമായ ചുവടുവെയ്പ്പാണെന്നും എംഎൽഎ അഭിപ്രായപ്പെട്ടു. “മദ്യവർജനം എന്ന ദീർഘകാല ലക്ഷ്യം മുൻനിർത്തി, വീര്യം കുറഞ്ഞ മദ്യത്തിലേക്ക് ആളുകളെ കൊണ്ടുവന്ന് ക്രമാനുഗതമായി ലഹരിയിൽ നിന്ന് മോചിപ്പിക്കുകയെന്ന വിശാലമായ ലക്ഷ്യമാണ് ഈ തീരുമാനത്തിന് പിന്നിൽ. മനസ്സ് തുറന്ന് വിഷയത്തെ സമീപിക്കണം,” അദ്ദേഹം പറഞ്ഞു.
വിഷയത്തെ സർക്കാർ ശാസ്ത്രീയമായാണ് സമീപിച്ചതെന്നും പുരോഗമനപരമായ ഒരു തീരുമാനം നടപ്പാക്കുമ്പോൾ അതിന് പിന്തുണ നൽകേണ്ടതുണ്ടെന്നും കെ.പി. നൗഷാദ് അലി കൂട്ടിച്ചേർത്തു.