കൊച്ചി: വെള്ളാപ്പള്ളി നടേശൻ ഉൾപ്പെടെ പ്രതികളായ മൈക്രോ ഫിനാൻസ് കേസിൽ പ്രോസിക്യൂഷൻ അനുമതി ആവശ്യമില്ലെന്ന് സംസ്ഥാന സർക്കാർ ഹൈക്കോടതിയെ അറിയിച്ചു. പ്രതികൾ സ്വകാര്യ സ്ഥാപനങ്ങളുടെ ഭാഗമായതിനാൽ പ്രോസിക്യൂഷൻ അനുമതിയുടെ ആവശ്യമില്ലെന്നാണ് സർക്കാരിന്റെ നിലപാട്. അതേസമയം, പ്രോസിക്യൂഷൻ അനുമതി വേണമെന്ന നിലപാടാണ് വിജിലൻസ് നേരത്തെ സ്വീകരിച്ചത്. ഈ വ്യത്യസ്ത നിലപാടിൽ ഹൈക്കോടതി നേരത്തെ വിമർശനം ഉന്നയിച്ചിരുന്നു.
മൈക്രോ ഫിനാൻസ് പദ്ധതിയുമായി ബന്ധപ്പെട്ട് 124 കേസുകളാണ് രജിസ്റ്റർ ചെയ്തിട്ടുള്ളത്. ഇതിൽ എട്ട് കേസുകളിൽ പ്രതികളുടെ പങ്കാളിത്തം കണ്ടെത്തിയതായി അന്വേഷണ സംഘം കോടതിയെ അറിയിച്ചിരുന്നു. ഇവയിൽ അന്തിമ റിപ്പോർട്ട് സമർപ്പിക്കുന്നതിന് പ്രോസിക്യൂഷൻ അനുമതി ആവശ്യപ്പെട്ടതോടെയാണ് വിഷയത്തിൽ നിയമപരമായ തർക്കം ഉയർന്നത്.
വെള്ളാപ്പള്ളി നടേശൻ, എസ്.എൻ.ഡി.പി യോഗം പ്രസിഡന്റ് എം.എൻ. സോമൻ എന്നിവരടക്കമുള്ളവരാണ് കേസിലെ പ്രതിപ്പട്ടികയിലുള്ളത്. കേസിൽ സർക്കാർ ഫണ്ട് ദുരുപയോഗം ചെയ്തെന്നാരോപിച്ചാണ് അന്വേഷണം നടക്കുന്നത്. എസ്.എൻ.ഡി.പി യോഗത്തിന്റെ മൈക്രോ ഫിനാൻസ് പദ്ധതിയുമായി ബന്ധപ്പെട്ട സാമ്പത്തിക ക്രമക്കേടുകളാണ് കേസിന്റെ അടിസ്ഥാനം.
മൈക്രോ ഫിനാൻസ് പദ്ധതിയിലൂടെ പിന്നാക്ക വിഭാഗങ്ങളിൽപ്പെട്ട സ്ത്രീകൾക്ക് ചെറുകിട സംരംഭങ്ങൾ ആരംഭിക്കുന്നതിനായി നൽകിയ ഫണ്ടിൽ ക്രമക്കേട് നടന്നുവെന്നാണ് കേസ്. വ്യാജ രേഖകളും ഉപയോഗിച്ചെന്നാണ് അന്വേഷണത്തിലെ ആരോപണം. 2003 മുതൽ 2014 വരെയുള്ള കാലയളവിലെ ഇടപാടുകളുമായി ബന്ധപ്പെട്ടാണ് കേസ് രജിസ്റ്റർ ചെയ്തത്.
കേസിൽ അന്വേഷണ പുരോഗതി സംബന്ധിച്ച് ഹൈക്കോടതി നേരത്തെ വിശദീകരണം തേടിയിരുന്നു. പ്രോസിക്യൂഷൻ അനുമതി നൽകുന്നതിലെ കാലതാമസത്തിലും കോടതി ഇടപെട്ടിട്ടുണ്ട്.
വെള്ളാപ്പള്ളി നടേശനെതിരെ 2016ൽ മുൻ മുഖ്യമന്ത്രി വി.എസ്. അച്യുതാനന്ദന്റെ പരാതിയുടെ അടിസ്ഥാനത്തിലാണ് അന്വേഷണം ആരംഭിച്ചത്. അന്വേഷണത്തിന്റെ ഭാഗമായി കഴിഞ്ഞ ഫെബ്രുവരിയിൽ വിജിലൻസ് വെള്ളാപ്പള്ളി നടേശനെ വീട്ടിലെത്തി ചോദ്യം ചെയ്തിരുന്നു.