നസ്ലെനെ നായകനാക്കി സംവിധായകൻ അഭിനവ് സുന്ദർ നായക് ഒരുക്കുന്ന ‘മോളിവുഡ് ടൈംസ്’ നാളെ തിയേറ്ററുകളിലെത്തും. ‘മുകുന്ദൻ ഉണ്ണി അസോസിയേറ്റ്സ്’ എന്ന ശ്രദ്ധേയ ചിത്രത്തിന് ശേഷം അഭിനവ് സംവിധാനം ചെയ്യുന്ന രണ്ടാമത്തെ ചിത്രമാണിത്. റിലീസിന് മുൻപ് സിനിമയുടെ ട്രെയ്ലർ പുറത്തിറക്കാത്തതിനെ കുറിച്ചുള്ള ചർച്ചകൾ സമൂഹമാധ്യമങ്ങളിൽ സജീവമായിരിക്കെ, അതിന് പിന്നിലെ കാരണം സംവിധായകൻ തന്നെ വിശദീകരിച്ചു.
ചിത്രത്തിന് പ്രീ-റിലീസ് ട്രെയ്ലർ ഇല്ലെന്നും, സിനിമയെ കുറിച്ച് കൂടുതൽ വിവരങ്ങൾ അറിയാതെ പ്രേക്ഷകർ ചിത്രം കാണുന്നതാണ് താൻ ആഗ്രഹിക്കുന്നതെന്നും അഭിനവ് സുന്ദർ നായക് വ്യക്തമാക്കി. സാധ്യമെങ്കിൽ ടീസർ പോലും കാണാതെ സിനിമ കാണാൻ എത്തണമെന്നാണ് സംവിധായകന്റെ അഭ്യർഥന. സമൂഹമാധ്യമമായ എക്സിൽ ഒരു ആരാധകന്റെ ചോദ്യത്തിന് മറുപടിയായാണ് അദ്ദേഹം നിലപാട് വ്യക്തമാക്കിയത്.
കമിങ് ഓഫ് ഏജ് വിഭാഗത്തിൽപ്പെടുന്ന ചിത്രത്തിൽ വിനീത് മാധവ് എന്ന കഥാപാത്രമായാണ് നസ്ലെൻ എത്തുന്നത്. ചിത്രത്തിന്റെ ടീസറും ഒരു ഗാനവും മാത്രമാണ് ഇതുവരെ പുറത്തിറങ്ങിയിട്ടുള്ളത്. അതുകൊണ്ടുതന്നെ സിനിമയുടെ കഥയും പ്രധാന സംഭവവികാസങ്ങളും പ്രേക്ഷകർക്കായി രഹസ്യമായി നിലനിർത്താനുള്ള ശ്രമത്തിന്റെ ഭാഗമായാണ് ട്രെയ്ലർ ഒഴിവാക്കിയതെന്നാണ് വിലയിരുത്തൽ.
ആഷിക് ഉസ്മാൻ പ്രൊഡക്ഷൻസിന്റെ ബാനറിൽ ആഷിക് ഉസ്മാൻ നിർമ്മിക്കുന്ന ചിത്രത്തിൽ സംഗീത് പ്രതാപ്, ഷറഫുദ്ദീൻ, റോഷൻ ഷാനവാസ് എന്നിവരും പ്രധാന കഥാപാത്രങ്ങളെ അവതരിപ്പിക്കുന്നു. രാമു സുനിലാണ് തിരക്കഥ ഒരുക്കിയിരിക്കുന്നത്.
വിശ്വജിത്ത് ഒടുക്കത്തിൽ ഛായാഗ്രഹണവും ജേക്സ് ബിജോയ് സംഗീത സംവിധാനവും നിർവഹിക്കുന്നു. നിധിൻ രാജ് അരോൾ എഡിറ്റിംഗ് നിർവഹിക്കുന്ന ചിത്രത്തിന്റെ ശബ്ദ രൂപകല്പനയും മിക്സിംഗും വിഷ്ണു ഗോവിന്ദാണ് കൈകാര്യം ചെയ്യുന്നത്.
റിലീസിന് മുന്നോടിയായി തന്നെ സിനിമ വലിയ പ്രതീക്ഷ സൃഷ്ടിച്ചിരിക്കുകയാണ്. ട്രെയ്ലറില്ലാതെ പ്രേക്ഷകരെ തിയേറ്ററിലെത്തിക്കാനുള്ള പരീക്ഷണം എത്രത്തോളം വിജയിക്കുമെന്ന ആകാംക്ഷയിലാണ് സിനിമാപ്രേമികൾ.