കൊച്ചി: മാർക്സിസ്റ്റ് സൈദ്ധാന്തികനും ശാസ്ത്രപ്രചാരകനുമായ എം.പി. പരമേശ്വരൻ (91) അന്തരിച്ചു. വാർദ്ധക്യസഹജമായ അസുഖങ്ങളെ തുടർന്നായിരുന്നു അന്ത്യം.
ആണവ ശാസ്ത്രജ്ഞൻ എന്ന നിലയിൽ കർമമേഖലയിൽ സജീവമായിരുന്ന എം.പി. പരമേശ്വരൻ വൈജ്ഞാനിക സാഹിത്യരംഗത്തും ശ്രദ്ധേയമായ സംഭാവനകൾ നൽകി. കേരള ശാസ്ത്രസാഹിത്യ പരിഷത്തിന്റെ സജീവ പ്രവർത്തകനായിരുന്ന അദ്ദേഹം സിപിഐഎം അംഗമായിരുന്നു. പിന്നീട് സൈദ്ധാന്തിക വിയോജിപ്പിനെ തുടർന്ന് പാർട്ടിയിൽനിന്ന് പുറത്താക്കപ്പെട്ടു.
ശാസ്ത്രത്തെ കേവലം സാങ്കേതിക അറിവായി കാണാതെ സമൂഹത്തിന്റെ പുരോഗതിക്കും മനുഷ്യവിമോചനത്തിനുമുള്ള ഉപാധിയായി അവതരിപ്പിക്കണമെന്ന നിലപാടായിരുന്നു എം.പി. പരമേശ്വരന്റെ ചിന്തകളുടെ പ്രധാന സവിശേഷത. കേരളത്തിൽ ശാസ്ത്രസാഹിത്യത്തിന്റെയും ജനകീയ ശാസ്ത്രപ്രചാരണത്തിന്റെയും വളർച്ചയിൽ അദ്ദേഹം നിർണായക പങ്കുവഹിച്ചു.
കേരളത്തിലെ ജനകീയ ശാസ്ത്രപ്രസ്ഥാനത്തിന്റെ വളർച്ചയ്ക്കായി നേതൃപരമായ നിരവധി സംഭാവനകളാണ് എം.പി. പരമേശ്വരൻ നൽകിയത്. ശാസ്ത്രം, സാങ്കേതികവിദ്യ, വികസനം എന്നിവയെക്കുറിച്ചുള്ള പൊതുചർച്ചകൾ ശക്തമാക്കുന്നതിനും ശാസ്ത്രീയ മനോഭാവം വളർത്തുന്നതിനും അദ്ദേഹത്തിന്റെ പ്രവർത്തനങ്ങൾ സഹായിച്ചു.
മാർക്സിസ്റ്റ് ആശയങ്ങൾ, ശാസ്ത്രീയ ചിന്ത, സാമൂഹിക വികസനം എന്നിവയെ അഭിസംബോധന ചെയ്തുകൊണ്ടുള്ള അദ്ദേഹത്തിന്റെ എഴുത്തുകളും പ്രഭാഷണങ്ങളും കേരളത്തിലെ പുരോഗമന ബൗദ്ധിക രംഗത്ത് നിരവധി ചർച്ചകൾക്ക് വഴിതെളിച്ചു