റിയാദ്: സൗദി അറേബ്യയുടെ ആകാശത്ത് ഈ നൂറ്റാണ്ടിലെ ഏറ്റവും അപൂർവവും ദൈർഘ്യമേറിയതുമായ പൂർണ സൂര്യഗ്രഹണത്തിന് വേദിയൊരുങ്ങുന്നു. 2027 ഓഗസ്റ്റ് 2-ന് ഉച്ചയോടെ ചന്ദ്രൻ സൂര്യനെ പൂർണമായും മറയ്ക്കുന്നതോടെ രാജ്യത്തിന്റെ വിവിധ ഭാഗങ്ങളിൽ ആറ് മിനിറ്റോളം പകൽ രാത്രിക്ക് സമാനമായ അന്തരീക്ഷം അനുഭവപ്പെടും. 75 വർഷത്തിലേറെയായി സൗദിയിൽ ഇത്രയും ദൈർഘ്യമുള്ള പൂർണ സൂര്യഗ്രഹണം ഉണ്ടായിട്ടില്ലെന്നാണ് വിലയിരുത്തൽ. ഇതിനെ ഈ നൂറ്റാണ്ടിലെ ഏറ്റവും ശ്രദ്ധേയമായ ജ്യോതിശാസ്ത്ര പ്രതിഭാസങ്ങളിലൊന്നായി സൗദി സ്പേസ് ഏജൻസി വിശേഷിപ്പിച്ചു.
ആറ് മിനിറ്റോളം പൂർണ ഇരുട്ട്
ഗ്രഹണ സമയത്ത് പകൽവെളിച്ചം മങ്ങുകയും സന്ധ്യാസമയത്തിന് സമാനമായ അന്തരീക്ഷം രൂപപ്പെടുകയും ചെയ്യും. താപനിലയിൽ പെട്ടെന്നുള്ള കുറവ് അനുഭവപ്പെടും. ഉച്ചസമയത്തുതന്നെ ആകാശത്ത് നക്ഷത്രങ്ങളും ചില ഗ്രഹങ്ങളും ദൃശ്യമാകും. സൂര്യന്റെ പുറംവാതാവായ കൊറോണ നഗ്നനേത്രങ്ങൾ കൊണ്ട് കാണാനാകുന്ന അപൂർവ അവസരവും ലഭിക്കും.
അബ ഉൾപ്പെടെയുള്ള തെക്കൻ പ്രദേശങ്ങളിൽ ഏകദേശം ആറ് മിനിറ്റോളം പൂർണ ഗ്രഹണം അനുഭവപ്പെടും. ജിദ്ദയടക്കമുള്ള പടിഞ്ഞാറൻ തീരപ്രദേശങ്ങളിൽ അഞ്ച് മിനിറ്റ് 50 സെക്കൻഡ് വരെ പൂർണ ഇരുട്ട് നിലനിൽക്കും.
പൂർണ ഗ്രഹണം കാണാനാകുന്ന നഗരങ്ങൾ
മക്ക, ജിദ്ദ, തായിഫ്, അൽ ബാഹ, ഖമീസ് മുഷൈത്ത്, ജിസാൻ, നജ്റാൻ തുടങ്ങിയ നഗരങ്ങൾ പൂർണ ഗ്രഹണപാതയിൽ ഉൾപ്പെടുന്നു. അതേസമയം, റിയാദ്, ഈസ്റ്റേൺ പ്രൊവിൻസ് എന്നിവിടങ്ങളിൽ ഭാഗിക സൂര്യഗ്രഹണമാണ് ദൃശ്യമാകുകെന്ന് ജിദ്ദ ആസ്ട്രോണമി സൊസൈറ്റിയിലെ എഞ്ചിനീയർ മജീദ് അബു സഹ്റ അറിയിച്ചു.
ഗ്രഹണ സമയം
- ഭാഗിക ഗ്രഹണം ആരംഭിക്കുന്നത്: രാവിലെ 11.41
- പൂർണ ഗ്രഹണം: ഉച്ചയ്ക്ക് 1.21 മുതൽ 1.44 വരെ
- ഗ്രഹണം അവസാനിക്കുന്നത്: വൈകിട്ട് 3.00 ഓടെ
പ്രധാന നഗരങ്ങളിലെ സമയം
- ജിദ്ദ: ഉച്ചയ്ക്ക് 12.00-ന് ആരംഭിച്ച് 1.25-ന് പൂർണ ഗ്രഹണത്തിലെത്തും.
- മക്ക: ഉച്ചയ്ക്ക് 12.01-ന് ആരംഭിച്ച് 1.26-ന് പൂർണ ഗ്രഹണത്തിലെത്തും.
- തായിഫ്: ഉച്ചയ്ക്ക് 12.03-ന് ആരംഭിച്ച് 1.28-ന് പൂർണ ഗ്രഹണത്തിലെത്തും.
യുഎഇയിലും ഭാഗിക ഗ്രഹണം
യുഎഇയിലെ ദുബായ് ഉൾപ്പെടെയുള്ള പ്രദേശങ്ങളിലും സൂര്യഗ്രഹണം ദൃശ്യമാകും. എന്നാൽ അത് ഭാഗിക ഗ്രഹണമായിരിക്കും. സൂര്യന്റെ 53 മുതൽ 61 ശതമാനം വരെ ഭാഗം മാത്രമേ ചന്ദ്രൻ മറയ്ക്കുകയുള്ളൂ. അതിനാൽ സൗദിയിൽ അനുഭവപ്പെടുന്ന പോലെ പൂർണ ഇരുട്ടോ നക്ഷത്രങ്ങൾ തെളിയുന്ന കാഴ്ചയോ യുഎഇയിൽ ഉണ്ടാകില്ല.
സുരക്ഷാ നിർദേശം
പ്രത്യേക സൂര്യഗ്രഹണ സുരക്ഷാ ഗ്ലാസുകൾ ഉപയോഗിക്കാതെ ഒരു കാരണവശാലും സൂര്യനെ നേരിട്ട് നിരീക്ഷിക്കരുതെന്ന് സൗദി സ്പേസ് ഏജൻസി മുന്നറിയിപ്പ് നൽകി. സാധാരണ സൺഗ്ലാസുകളോ സുരക്ഷാ ഫിൽട്ടറില്ലാത്ത ടെലിസ്കോപ്പുകളോ ഉപയോഗിച്ച് ഗ്രഹണം കാണുന്നത് കണ്ണിന്റെ കാഴ്ചയ്ക്ക് സ്ഥിരമായ തകരാർ ഉണ്ടാക്കാൻ ഇടയാക്കുമെന്നും അധികൃതർ വ്യക്തമാക്കി.