വാഷിങ്ടൺ: അമേരിക്കൻ സൈനികരുടെ സുരക്ഷയെ ചോദ്യം ചെയ്യുന്ന ഏതൊരു ആക്രമണവും കടുത്ത പ്രത്യാഘാതങ്ങൾക്ക് വഴിവെക്കുമെന്ന് മുന്നറിയിപ്പ് നൽകി അമേരിക്കൻ പ്രസിഡന്റ് ഡൊണാൾഡ് ട്രംപ്. യുഎസ് സൈനികരെ ലക്ഷ്യമിട്ട് ആക്രമണമുണ്ടാകുകയും ഒരു സൈനികന്റെ ജീവൻ പോലും നഷ്ടപ്പെടുകയും ചെയ്താൽ ഇറാനെതിരെ വീണ്ടും പൂർണതോതിലുള്ള സൈനിക നടപടി ആരംഭിക്കുമെന്ന് അദ്ദേഹം വ്യക്തമാക്കി.
വാഷിങ്ടണിലെ ഓവൽ ഓഫീസിൽ മാധ്യമപ്രവർത്തകരോട് സംസാരിക്കവെയാണ് ട്രംപ് ഇക്കാര്യം വ്യക്തമാക്കിയത്. നിലവിലുള്ള താൽക്കാലിക വെടിനിർത്തൽ തുടരാനുള്ള തൻ്റെ പ്രധാന നിബന്ധന അമേരിക്കൻ സൈനികരുടെ സുരക്ഷയാണെന്നും, അതിൽ വീഴ്ചയുണ്ടായാൽ യുദ്ധനടപടികളിലേക്ക് മടങ്ങാൻ അമേരിക്ക മടിക്കില്ലെന്നും അദ്ദേഹം പറഞ്ഞു.
ഇറാനുമായുള്ള ചർച്ചകൾ നിലവിൽ അനുകൂലമായ രീതിയിലാണ് മുന്നേറുന്നതെന്നും, ഉടൻ തന്നെ സുപ്രധാന ധാരണയിലേക്കോ കരാറിലേക്കോ എത്താൻ സാധ്യതയുണ്ടെന്നും ട്രംപ് അവകാശപ്പെട്ടു. അതേസമയം, മുൻകാല സൈനിക നടപടികളിലൂടെ ഇറാന്റെ വ്യോമ-നാവിക ശേഷികൾക്ക് വലിയ തിരിച്ചടിയുണ്ടാക്കിയതായും, അവരുടെ പ്രതിരോധ സംവിധാനങ്ങൾക്കും നേതൃത്വ ഘടനയ്ക്കും ഗുരുതരമായ ആഘാതമുണ്ടാക്കിയതായും അദ്ദേഹം പറഞ്ഞു.
മിഡിൽ ഈസ്റ്റിലെ അമേരിക്കൻ സൈനിക താവളങ്ങൾക്ക് നേരെ സമീപകാലത്ത് നടന്ന മിസൈൽ, ഡ്രോൺ ആക്രമണങ്ങളുമായി ബന്ധപ്പെട്ട ആശങ്കകൾ ഉയർന്നിരിക്കുന്ന സാഹചര്യത്തിലാണ് ട്രംപിന്റെ മുന്നറിയിപ്പ്. ചെറിയ തോതിലുള്ള സംഘർഷങ്ങൾ സഹിച്ച് വലിയ യുദ്ധം ഒഴിവാക്കാൻ താൻ തയ്യാറാണെങ്കിലും, അമേരിക്കൻ സൈനികരുടെ ജീവനാണ് ചർച്ചകളുടെ അതിർത്തിയെന്നും അദ്ദേഹം വ്യക്തമാക്കി.
മേഖലയിൽ സംഘർഷാവസ്ഥ നിലനിൽക്കുന്നതിനിടെ ട്രംപിന്റെ പ്രസ്താവന അന്താരാഷ്ട്ര തലത്തിൽ ശ്രദ്ധ നേടുകയാണ്. അമേരിക്കയും ഇറാനും തമ്മിലുള്ള ബന്ധം വീണ്ടും സംഘർഷഭരിതമാകുമോയെന്ന ആശങ്കയും ഈ പശ്ചാത്തലത്തിൽ ഉയരുന്നുണ്ട്.