തിരുവനന്തപുരം: യുഎപിഎ കേസുകൾ അവസാനിപ്പിക്കണമെന്നാവശ്യപ്പെട്ട് മാവോയിസ്റ്റ് നേതാവ് രൂപേഷിന്റെ ഭാര്യ ഷൈന ആഭ്യന്തരമന്ത്രി രമേശ് ചെന്നിത്തലയെ നേരിൽ കണ്ട് നിവേദനം നൽകി. ജനകീയ പ്രക്ഷോഭങ്ങളുടെ പശ്ചാത്തലത്തിൽ മരവിപ്പിച്ച യുഎപിഎ കേസുകൾ വീണ്ടും സജീവമാക്കരുതെന്നും നിവേദനത്തിൽ ആവശ്യപ്പെട്ടിട്ടുണ്ട്.
2026 മാർച്ചിലാണ് രൂപേഷ് ജാമ്യത്തിൽ പുറത്തിറങ്ങിയത്. ഏകദേശം പതിനൊന്ന് വർഷത്തെ തടവുജീവിതത്തിനൊടുവിലായിരുന്നു മോചനം. 2015-ൽ കോയമ്പത്തൂരിൽ നിന്നാണ് രൂപേഷിനെയും ഭാര്യ ഉൾപ്പെടെ അഞ്ച് പേരെയും അറസ്റ്റ് ചെയ്തത്.
കേരളത്തിലും തമിഴ്നാട്ടിലുമായി രൂപേഷിനെതിരെ ആകെ 42 കേസുകളാണ് രജിസ്റ്റർ ചെയ്തിരുന്നത്. ഇതിൽ ചിലത് യുഎപിഎ നിയമപ്രകാരമുള്ള കേസുകളുമാണ്. നിലവിൽ 16 കേസുകൾ വിവിധ കോടതികളിൽ വിചാരണയിലാണ്.
രണ്ട് കേസുകളിൽ രൂപേഷിന് ജീവപര്യന്തം തടവ് ശിക്ഷ ലഭിച്ചിരുന്നു. കൊച്ചി എൻഐഎ കോടതി ശിക്ഷിച്ച വെള്ളമുണ്ട കേസിൽ സുപ്രീം കോടതിയുടെ ഇടപെടലിനെ തുടർന്നാണ് ജാമ്യം ലഭിച്ചത്.
രണ്ട് ലക്ഷം രൂപ വീതമുള്ള രണ്ട് ആൾജാമ്യവും എല്ലാ മാസവും ആദ്യ തിങ്കളാഴ്ച കളമശേരി എൻഐഎ ഓഫീസിൽ ഹാജരാകണമെന്ന വ്യവസ്ഥയിലുമാണ് ജാമ്യം അനുവദിച്ചത്.
ജയിൽ മോചിതനായ രൂപേഷിനെ സ്വീകരിക്കാൻ ഭാര്യ ഷൈനയും സഹപ്രവർത്തകരും ജയിലിന് പുറത്തുണ്ടായിരുന്നു. ചുവന്ന ഷാൾ അണിയിച്ചും മുദ്രാവാക്യങ്ങൾ മുഴക്കിയും അദ്ദേഹത്തെ വരവേറ്റു.
ജയിലിൽ കഴിയുന്നതിനിടെ എഴുതിയ തന്റെ പുസ്തകമായ “ബന്ധിതരുടെ ഓർമ്മക്കുറിപ്പുകൾ” പുറത്തിറക്കാൻ അനുമതി നിഷേധിച്ചതിലൂടെ അന്നത്തെ ഭരണകൂടം അധികാരത്തിന്റെ മുഖം പ്രകടമാക്കിയെന്ന് രൂപേഷ് പിന്നീട് ആരോപിച്ചിരുന്നു.
ഇതിനിടെയാണ് യുഎപിഎ കേസുകൾ അവസാനിപ്പിക്കണമെന്ന ആവശ്യവുമായി ഷൈന ആഭ്യന്തരമന്ത്രിയെ സമീപിച്ചിരിക്കുന്നത്.