വാഷിംഗ്ടൺ: അമേരിക്കയിൽ അധികമായി ഈടാക്കിയ ഇറക്കുമതി തീരുവകൾ തിരികെ നൽകുന്ന നടപടിയുടെ ഭാഗമായി ഇന്ത്യയ്ക്ക് വൻ സാമ്പത്തിക നേട്ടം ലഭിക്കാനിടയുണ്ട്. ഏകദേശം 10 മുതൽ 12 ബില്യൺ ഡോളർ (ഏകദേശം 1200 കോടി ഡോളർ) വരെയാണ് വിവിധ മേഖലകളിലായി റീഫണ്ട് ലഭിക്കുമെന്നു കണക്കുകൾ സൂചിപ്പിക്കുന്നത്.
തുണിത്തരം, എഞ്ചിനീയറിംഗ് ഉത്പന്നങ്ങൾ, കെമിക്കൽ ഉത്പന്നങ്ങൾ തുടങ്ങിയ മേഖലകളിലാണ് പ്രധാനമായും തിരിച്ചടവ് ലഭിക്കുക. തുണിത്തരങ്ങൾക്ക് മാത്രം ഏകദേശം 400 കോടി ഡോളർ, എഞ്ചിനീയറിംഗ് ഉത്പന്നങ്ങൾക്ക് 400 കോടി ഡോളർ, കെമിക്കൽ മേഖലയ്ക്ക് 200 കോടി ഡോളർ വരെ ലഭിക്കാനിടയുണ്ടെന്നാണ് വിലയിരുത്തൽ.
യുഎസ് കസ്റ്റംസ് ആൻഡ് ബോർഡർ പ്രൊട്ടക്ഷൻ ഒരുക്കിയ ഓൺലൈൻ പോർട്ടൽ വഴി റീഫണ്ടിനുള്ള അപേക്ഷകൾ സ്വീകരിച്ചുതുടങ്ങി. ഇതിനകം ആയിരക്കണക്കിന് കമ്പനികൾ ക്ലെയിമുകൾ സമർപ്പിച്ചിട്ടുണ്ടെന്നും അധികൃതർ അറിയിച്ചു.
മുൻപ് ഡൊണാൾഡ് ട്രംപ് ഭരണകാലത്ത് ഏർപ്പെടുത്തിയ ചില ഉയർന്ന ഇറക്കുമതി തീരുവകൾ ഭരണഘടനാവിരുദ്ധമാണെന്ന് കോടതി വിധിച്ചതോടെയാണ് ഈ തിരിച്ചടവ് നടപടികൾ ആരംഭിച്ചത്. അംഗീകൃത ക്ലെയിമുകൾ 60 മുതൽ 90 ദിവസത്തിനുള്ളിൽ റീഫണ്ട് ആയി ലഭിക്കുമെന്ന് അമേരിക്കൻ അധികൃതർ അറിയിച്ചു.
ഇന്ത്യൻ കയറ്റുമതി മേഖലയ്ക്ക് വലിയ ആശ്വാസമാകുന്ന നീക്കമാണിത്.