തിരുവനന്തപുരം: എസ്എൻഡിപി യോഗം ജനറൽ സെക്രട്ടറി വെള്ളാപ്പള്ളി നടേശനെതിരെ കടുത്ത വിമർശനവുമായി സിപിഐഎം സംസ്ഥാന സമിതി അംഗം പി. ജയരാജൻ. ഒരേസമയം പരസ്പരവിരുദ്ധ നിലപാടുകൾ സ്വീകരിക്കുന്ന നേതാവാണ് വെള്ളാപ്പള്ളിയെന്നും, “രണ്ട് തോണിയിൽ കാലുവെക്കുന്ന രാഷ്ട്രീയമാണ്” അദ്ദേഹം പിന്തുടരുന്നതെന്നും ജയരാജൻ ആരോപിച്ചു.
നവോത്ഥാന മൂല്യങ്ങൾ ഉയർത്തിപ്പിടിക്കുന്ന നിലപാട് സ്വീകരിക്കുമ്പോഴും മറുവശത്ത് സംഘപരിവാർ രാഷ്ട്രീയവുമായി അടുപ്പം പുലർത്തുന്ന സമീപനമാണ് വെള്ളാപ്പള്ളി സ്വീകരിക്കുന്നതെന്ന് അദ്ദേഹം പറഞ്ഞു. സംസ്ഥാന സർക്കാർ രൂപീകരിച്ച നവോത്ഥാന സമിതിയുടെ അധ്യക്ഷസ്ഥാനത്ത് പ്രവർത്തിച്ച വ്യക്തിയാണ് വെള്ളാപ്പള്ളി. എന്നാൽ അദ്ദേഹത്തിന്റെ മകൻ നയിക്കുന്ന ബിഡിജെഎസ് ബിജെപിയുമായും സംഘപരിവാർ ശക്തികളുമായും ചേർന്ന് പ്രവർത്തിക്കുന്നുവെന്നത് വൈരുധ്യമാണെന്നും ജയരാജൻ ചൂണ്ടിക്കാട്ടി.
വെള്ളാപ്പള്ളിയുടെ ഭാര്യ പ്രീതി നടേശനും ബിജെപി സ്ഥാനാർഥികൾക്ക് അനുകൂലമായി പ്രവർത്തിക്കുന്നുവെന്ന് ആരോപിച്ച ജയരാജൻ, ഇത്തരം ഇരട്ട നിലപാടുകൾ കേരള സമൂഹം തിരിച്ചറിയേണ്ടതുണ്ടെന്നും പറഞ്ഞു. ശ്രീനാരായണ ഗുരുവിന്റെ ആശയങ്ങൾക്കും സാമൂഹിക നവോത്ഥാന ദർശനങ്ങൾക്കും വിരുദ്ധമായ സമീപനമാണ് ഇപ്പോൾ എസ്എൻഡിപി നേതൃത്വത്തിൽ നിന്ന് ഉയരുന്നതെന്നും അദ്ദേഹം കുറ്റപ്പെടുത്തി.
ഇതിനിടെ, സിപിഐഎം സംസ്ഥാന സമിതിയിലും വെള്ളാപ്പള്ളി നടേശനെതിരെ വിമർശനങ്ങൾ ഉയർന്നിരുന്നു. എസ്എൻഡിപി നേതൃത്വത്തിന്റെ നിലപാടുകളെ ശക്തമായി എതിർക്കണമെന്നും, വർഗീയ ശക്തികളോട് സ്വീകരിക്കുന്ന മൃദുസമീപനം അവസാനിപ്പിക്കണമെന്നും നേതാക്കൾ ആവശ്യപ്പെട്ടതായാണ് വിവരം.
സമൂഹത്തിൽ മതനിരപേക്ഷതയും നവോത്ഥാന മൂല്യങ്ങളും സംരക്ഷിക്കേണ്ടത് കാലഘട്ടത്തിന്റെ ആവശ്യകതയാണെന്നും, എല്ലാ തരത്തിലുള്ള വർഗീയ രാഷ്ട്രീയത്തെയും ശക്തമായി ചെറുക്കേണ്ടതുണ്ടെന്നും സംസ്ഥാന സമിതിയിൽ അഭിപ്രായമുയർന്നതായി പാർട്ടി വൃത്തങ്ങൾ അറിയിച്ചു.