ബെയ്ജിംഗ്: രക്ഷിതാവിനൊപ്പം ഓഫീസിലെത്തിയ 12 വയസ്സുകാരന്റെ അശ്രദ്ധ മൂലം ഓഫീസ് പൂര്ണമായും കത്തിനശിച്ച സംഭവം ചൈനയില് ആശങ്കയുണര്ത്തി. കിഴക്കന് ചൈനയിലെ ഷെജിയാങ് പ്രവിശ്യയിലെ നിങ്ബോ നഗരത്തിലായിരുന്നു സംഭവം. അപകടത്തില് ആര്ക്കും പരിക്കില്ലെങ്കിലും ലക്ഷക്കണക്കിന് രൂപയുടെ നാശനഷ്ടമാണ് ഉണ്ടായത്.
ജോലിത്തിരക്കിനിടയില് കുട്ടിയെ ശ്രദ്ധിക്കാതിരുന്നതിനിടെ, കൈവശമുണ്ടായിരുന്ന ലൈറ്റര് ഉപയോഗിച്ച് ടിഷ്യൂ പേപ്പര് കത്തിച്ച് കളിക്കുകയായിരുന്നു കുട്ടി. ഇതില്നിന്ന് പടര്ന്ന തീപ്പൊരി സമീപത്തുണ്ടായിരുന്ന മേശയിലേക്കും ഫയലുകളിലേക്കും പടര്ന്ന് വന് അഗ്നിബാധയ്ക്ക് കാരണമായി.
തീ പടരുന്നത് കണ്ട കുട്ടി ഉടന് രക്ഷിതാവിനെ വിവരമറിയിക്കുകയും അഗ്നിശമന സേനയെ വിളിക്കുകയും ചെയ്തു. ജീവനക്കാര് ചേര്ന്ന് തീ നിയന്ത്രണ വിധേയമാക്കാന് ശ്രമിച്ചെങ്കിലും ഓഫിസിനുള്ളിലെ ഫര്ണിച്ചറുകള്, രേഖകള്, ഇലക്ട്രോണിക് ഉപകരണങ്ങള് എന്നിവ പൂര്ണമായും കത്തിനശിച്ചു.
സംഭവത്തില് ആര്ക്കും പരിക്കേറ്റിട്ടില്ലെന്ന് അധികൃതര് അറിയിച്ചു. എന്നാല് പതിനായിരക്കണക്കിന് യുവാന്റെ നഷ്ടമുണ്ടായതായാണ് പ്രാഥമിക കണക്ക്. കുട്ടികളുടെ സുരക്ഷയും ജാഗ്രതയും സംബന്ധിച്ച് മാതാപിതാക്കള് കൂടുതല് ശ്രദ്ധ പുലര്ത്തണമെന്ന് ഫയര്ഫോഴ്സ് ഉദ്യോഗസ്ഥര് മുന്നറിയിപ്പ് നല്കി.