തിരുവനന്തപുരം: സി.പി.എം ജില്ലാ സെക്രട്ടറി സ്ഥാനത്തുനിന്ന് മാറ്റിയ ഇ.എൻ. സുരേഷ് ബാബുവിനെതിരെ ഗുരുതര ആരോപണവുമായി മന്ത്രി കെ. മുരളീധരൻ. രാഹുൽ മാങ്കൂട്ടത്തിലിനെതിരെ സമരങ്ങൾക്ക് നേതൃത്വം നൽകിയ സുരേഷ് ബാബുവും ഇക്കാര്യത്തിൽ ഒട്ടും മോശക്കാരനല്ലെന്നാണ് ഇപ്പോൾ പുറത്തുവരുന്ന വിവരമെന്ന് മുരളീധരൻ പറഞ്ഞു.
“രാഹുൽ മാങ്കൂട്ടത്തിലിനെതിരായ സമരങ്ങൾക്ക് നേതൃത്വം നൽകിയ ആളാണ് സുരേഷ് ബാബു. അദ്ദേഹവും ഈ കാര്യത്തിൽ ഒട്ടും മോശക്കാരനല്ലെന്നാണ് ഇപ്പോൾ പുറത്തുവരുന്ന വിവരം. ഇത്തരക്കാരെ ആരും വെച്ചുപൊറുപ്പിക്കരുത്. കോൺഗ്രസിന്റെ ഒരു എം.എൽ.എക്കെതിരെ പരാതി വന്നപ്പോൾ ഞങ്ങൾ മുഖം നോക്കാതെ നടപടി സ്വീകരിച്ചു. അത് എല്ലാ പാർട്ടികളും ചെയ്യേണ്ട കാര്യമാണ്. രാഷ്ട്രീയ രംഗം സംശുദ്ധമായിരിക്കണം. അതിന് വിഘാതമായി നിൽക്കുന്നവർക്കെതിരെ മുഖം നോക്കാതെ നടപടി സ്വീകരിക്കണം. ഞങ്ങൾ അതിനെ ഈ രീതിയിലേ കാണുന്നുള്ളൂ,” മുരളീധരൻ പറഞ്ഞു.
കോൺഗ്രസിലെ അസ്വാരസ്യങ്ങൾ ഉണ്ടെങ്കിൽ അവ പരിഹരിക്കുമെന്നും അദ്ദേഹം വ്യക്തമാക്കി. ഇക്കാര്യം അഖിലേന്ത്യാ ജനറൽ സെക്രട്ടറി കെ.സി. വേണുഗോപാൽ തന്നെ സൂചിപ്പിച്ചിട്ടുണ്ടെന്നും മുരളീധരൻ പറഞ്ഞു. പാർട്ടിക്കകത്തെ ആഭ്യന്തര പ്രശ്നങ്ങൾ ഒരു കാരണവശാലും സർക്കാരിന്റെ പ്രവർത്തനങ്ങളെയോ പാർട്ടിയെയോ ബാധിക്കില്ലെന്നും അദ്ദേഹം വ്യക്തമാക്കി.
സർക്കാർ ആശുപത്രികളിൽ ആവശ്യമായ എല്ലാ മരുന്നുകളും വാങ്ങി സ്റ്റോക്ക് ചെയ്യാൻ നിർദേശം നൽകിയിട്ടുണ്ടെന്നും മുരളീധരൻ പറഞ്ഞു. അത്യാവശ്യ മരുന്നുകളിൽ ഏതെങ്കിലും സ്റ്റോക്കില്ലെങ്കിൽ എച്ച്.എം.സിക്കോ എച്ച്.ഡി.എസ്സിനോ നേരിട്ട് വാങ്ങാൻ കഴിയുമെന്നും അദ്ദേഹം വ്യക്തമാക്കി. മരുന്നുകളുടെ കുറവ് ഉണ്ടാകരുതെന്ന് എല്ലാ ഡി.എം.ഒമാർക്കും കർശന നിർദേശം നൽകിയിട്ടുണ്ടെന്നും മന്ത്രി പറഞ്ഞു.
കരിങ്കൊടി കാണിക്കുന്നതിനെ ഗൗരവമായി കാണുന്നില്ലെന്നും മുരളീധരൻ പറഞ്ഞു. “കുറച്ച് ദിവസമായി എനിക്കാണ് ആദ്യം കരിങ്കൊടി കാണിച്ചത്. പിന്നെ നിർത്തി. കരിങ്കൊടി കാണിക്കുന്നതും കാണിക്കാതിരിക്കുന്നതും അവരുടെ സ്വാതന്ത്ര്യമാണ്. പക്ഷേ അതിന്റെ പേരിൽ ഒരു രക്ഷാപ്രവർത്തനവും നടത്തേണ്ടെന്ന് പൊലീസുകാരോട് പ്രത്യേകം പറഞ്ഞിട്ടുണ്ട്,” മുരളീധരൻ പറഞ്ഞു.