ലോകകപ്പിലെ എക്കാലത്തെയും ക്ലാസിക് പോരാട്ടം; 90+ മിനിറ്റുകളിൽ അടി തിരിച്ചടി , അൾജീരിയയും ഓസ്ട്രിയയും 3-3 സമനിലയിൽ

2026 ഫിഫ ലോകകപ്പിലെ ഏറ്റവും ആവേശകരമായ മത്സരങ്ങളിലൊന്നായി ചരിത്രത്തിൽ ഇടംപിടിച്ച് അൾജീരിയയും ഓസ്ട്രിയയും. കാൻസാസിൽ നടന്ന വിസ്മയകരമായ പോരാട്ടത്തിൽ ഇരുടീമുകളും മൂന്ന് വീതം ഗോളുകൾ നേടി 3-3 സമനിലയിൽ പിരിഞ്ഞു. അവസാന നിമിഷം വരെ വിജയിയെ പ്രവചിക്കാനാകാത്ത മത്സരത്തിൽ തുടർച്ചയായ ലീഡ് മാറ്റങ്ങളും ഇഞ്ചുറി ടൈമിലെ ഇരട്ടഗോൾ നാടകവും ആരാധകരെ ആവേശത്തിന്റെ കൊടുമുടിയിലെത്തിച്ചു.ആദ്യ പകുതിയിൽ ഓസ്ട്രിയയാണ് ലീഡ് നേടിയത്. 28-ാം മിനിറ്റിൽ ഡേവിഡ് അലാബ പ്രതിരോധനിരയ്ക്ക് പിന്നിലേക്ക് നൽകിയ നീളൻ പാസ് പിന്തുടർന്ന മാർക്കോ അർനൗട്ടോവിച്ച്, ഗോൾകീപ്പർ ഒസാമ ബെൻബോട്ടിനെ മറികടന്ന് പന്ത് വലയിലെത്തിച്ചു. മികച്ച ടൈമിങ്ങും ശാന്തമായ ഫിനിഷിംഗുമായിരുന്നു ആ ഗോളിന്റെ പ്രത്യേകത.ലീഡ് വഴങ്ങിയ അൾജീരിയ ശക്തമായി തിരിച്ചടിച്ചു. ഫാരസ് ഷായ്ബിയുടെ ശക്തമായ ഷോട്ട് പോസ്റ്റിൽ തട്ടി മടങ്ങിയത് ഓസ്ട്രിയയ്ക്ക് വലിയ ആശ്വാസമായി. എന്നാൽ ആദ്യ പകുതിയുടെ അധികസമയത്ത് അൾജീരിയ സമനില പിടിച്ചു. പ്രതിരോധത്തിലെ പിഴവ് മുതലെടുത്ത് റിയാദ് മഹ്റസിനെ തടയാനുള്ള ശ്രമത്തിനിടെ ഫിലിപ്പ് മ്വേനെയ്ക്ക് പന്ത് നഷ്ടമായി. അവസരം മുതലെടുത്ത റഫീക് ബെൽഘാലി വലതുവശത്തുകൂടി അതിവേഗം കുതിച്ച് അകത്തേക്ക് കയറി സമീപ പോസ്റ്റിലൂടെ ശക്തമായ ഷോട്ടിൽ പന്ത് വലയിലെത്തിച്ചു. സ്കോർ 1-1.രണ്ടാം പകുതിയുടെ തുടക്കത്തിലും ഓസ്ട്രിയ ആക്രമണ മികവ് തുടർന്നു. 55-ാം മിനിറ്റിൽ കോൺറാഡ് ലൈമർ നൽകിയ മനോഹരമായ ക്രോസിൽ മാർസൽ സാബിറ്റ്സർ കൃത്യമായ ഫിനിഷിലൂടെ ടീമിനെ വീണ്ടും മുന്നിലെത്തിച്ചു. എന്നാൽ ആ ലീഡ് വെറും അഞ്ച് മിനിറ്റ് മാത്രമാണ് നീണ്ടുനിന്നത്.ഹൂസം ഔവാർ നടത്തിയ മികച്ച മുന്നേറ്റത്തിനൊടുവിൽ ലഭിച്ച അവസരം റിയാദ് മഹ്റസ് അനായാസം ഗോളാക്കി മാറ്റിയതോടെ അൾജീരിയ വീണ്ടും സമനില പിടിച്ചു. മത്സരത്തിന്റെ അവസാന അരമണിക്കൂറിൽ പന്തടക്കത്തിലും ആക്രമണത്തിലും അൾജീരിയ വ്യക്തമായ മേൽക്കൈ നേടി.ഇഞ്ചുറി ടൈമിൽ മത്സരം അവസാന നാടകീയ വഴിത്തിരിവിലേക്ക് കടന്നു. ഔവാറിന്റെ കൃത്യമായ പാസ് സ്വീകരിച്ച മഹ്റസ് പ്രതിരോധത്തിലെ തുറന്ന ഇടത്തിലൂടെ കുതിച്ചെത്തി ഗോൾകീപ്പറെ മറികടന്ന് പന്ത് താഴത്തെ മൂലയിലേക്ക് എത്തിച്ചു. 3-2ന് മുന്നിലെത്തിയ അൾജീരിയ വിജയം ഉറപ്പിച്ചെന്നായിരുന്നു എല്ലാവരുടെയും വിലയിരുത്തൽ.എന്നാൽ ആഘോഷം അവസാനിക്കും മുമ്പേ ഓസ്ട്രിയ തിരിച്ചടിച്ചു. വലതുവശത്ത് നിന്ന് മൈക്കൽ ഗ്രിഗോറിച്ച് നൽകിയ കൃത്യമായ ക്രോസിൽ പകരക്കാരനായി ഇറങ്ങിയ സാസാ കലായ്ഡ്സിച്ച് തന്റെ ആദ്യ സ്പർശനത്തിൽ തന്നെ ഹെഡറിലൂടെ പന്ത് വലയിലെത്തിച്ചു. ഇഞ്ചുറി ടൈമിലെ ആ ഗോൾ ലോകകപ്പിലെ ഏറ്റവും നാടകീയമായ സമനിലകളിലൊന്നായി മാറി.മത്സരത്തിലെ പ്രതീക്ഷിത ഗോളുകളുടെ (xG) കണക്കിൽ അൾജീരിയ 1.62ഉം ഓസ്ട്രിയ 1.44ഉം മാത്രമാണ് സൃഷ്ടിച്ചത്. എന്നാൽ ലഭിച്ച അവസരങ്ങൾ അതിഗംഭീര ഫിനിഷിംഗിലൂടെ ഇരുടീമുകളും ആറു ഗോളുകളാക്കി മാറ്റി. ഗോൾകീപ്പർമാർക്കും പ്രതിരോധനിരകൾക്കും കഠിന പരീക്ഷണമായ മത്സരത്തിൽ ആക്രമണ ഫുട്ബോളിന്റെ യഥാർത്ഥ സൗന്ദര്യമാണ് ആരാധകർ കണ്ടത്.ഈ സമനിലയ്ക്ക് ശേഷം ഓസ്ട്രിയ പ്രീക്വാർട്ടറിൽ ശക്തരായ സ്പെയിനിനെ നേരിടും. മറുവശത്ത്, മികച്ച മൂന്നാം സ്ഥാനക്കാരായി മുന്നേറിയ അൾജീരിയയ്ക്ക് അടുത്ത എതിരാളി സ്വിറ്റ്സർലൻഡാണ്. പ്രത്യേകത എന്തെന്നാൽ, സ്വിറ്റ്സർലൻഡ് പരിശീലകനായിരുന്ന വ്ലാദിമിർ പെറ്റ്‌കോവിച്ചിന് സ്വന്തം മുൻ ടീമിനെതിരായ വികാരനിർഭരമായ പോരാട്ടം കൂടിയായിരിക്കും അത്.കാൻസാസിൽ കണ്ട ഈ ആറുഗോൾ പോരാട്ടം 2026 ലോകകപ്പിലെ ഏറ്റവും മികച്ച മത്സരങ്ങളിലൊന്നായി ഫുട്ബോൾ ചരിത്രത്തിൽ ഇടംപിടിക്കുമെന്ന കാര്യത്തിൽ സംശയമില്ല.