കൽപ്പറ്റ: വയനാട് തുരങ്കപാതയ്ക്ക് പാരിസ്ഥിതിക അനുമതി ലഭിച്ചതുമായി ബന്ധപ്പെട്ട് മുഖ്യമന്ത്രി വാർത്താസമ്മേളനത്തിൽ നടത്തിയ പ്രസ്താവന തെറ്റാണെന്ന് പ്രതിപക്ഷ നേതാവ് പിണറായി വിജയൻ. വീഴ്ച മറയ്ക്കാൻ ബോധപൂർവം വിവാദം സൃഷ്ടിക്കുകയാണെന്നും, പാരിസ്ഥിതിക അനുമതി യാതൊരു സൂത്രപണിയിലൂടെയുമല്ല ലഭിച്ചതെന്നും അദ്ദേഹം പറഞ്ഞു. വയനാട്ടിലെ ദുരന്തസ്ഥലം സന്ദർശിച്ച ശേഷമാണ് പിണറായി മാധ്യമങ്ങളോട് പ്രതികരിച്ചത്.
പാരിസ്ഥിതിക പഠനം സുതാര്യമായ രീതിയിലാണെന്ന് അദ്ദേഹം പറഞ്ഞു. 2023-ലാണ് പഠനം നടന്നത്. എല്ലാ നടപടിക്രമങ്ങളും പൂർത്തിയാക്കിയ ശേഷമാണ് സംസ്ഥാനവും കേന്ദ്രവും അനുമതി നൽകിയത്. 2025 ഡിസംബർ 16-ന് ഹൈക്കോടതി അനുമതിക്കെതിരായ ഹർജികൾ തള്ളിയതായും, തുടർന്ന് സുപ്രീം കോടതിയും ഹൈക്കോടതി വിധി ശരിവെച്ചതായും അദ്ദേഹം പറഞ്ഞു. പാരിസ്ഥിതിക അനുമതി സമ്മർദം ചെലുത്തി നേടിയതാണെന്ന ആരോപണം കോടതിയെ അവഹേളിക്കുന്നതിന് തുല്യമാണെന്നും അദ്ദേഹം വിമർശിച്ചു. ഉത്തരവാദിത്തത്തിൽ നിന്ന് ഒഴിഞ്ഞുമാറാനാണ് മന്ത്രിമാർ മറ്റുള്ളവരെ പഴിചാരുന്നതെന്നും അദ്ദേഹം ആരോപിച്ചു.
മണ്ണ് നീക്കം ചെയ്യാൻ ഉന്നതതല യോഗം നിർദേശം നൽകിയിരുന്നുവെന്നും ആ തീരുമാനം എങ്ങനെ നടപ്പായില്ലെന്ന് അന്വേഷിക്കണമെന്നും പിണറായി ആവശ്യപ്പെട്ടു. ആരാണ് അതിന് ഉത്തരവാദിയെന്നും അദ്ദേഹം ചോദിച്ചു. വയനാട് തുരങ്കപാത പദ്ധതി അനന്തമായ വികസന സാധ്യതകൾ തുറക്കുന്ന പദ്ധതിയാണെന്നും അദ്ദേഹം പറഞ്ഞു.
പദ്ധതിയുടെ ഭാഗമായി നീക്കം ചെയ്ത മണ്ണ് കൂനയായി കിടന്നിരുന്നതായും, അതിനൊപ്പം മുകളിൽ നിന്ന് ഇടിഞ്ഞുവന്ന മണ്ണും ചേർന്നാണ് ദുരന്തമുണ്ടായതെന്നും അദ്ദേഹം പറഞ്ഞു. ദുരിതാശ്വാസ ക്യാമ്പിലുള്ളവർക്ക് ആവശ്യത്തിന് വസ്ത്രങ്ങൾ ഉൾപ്പെടെയുള്ള അടിസ്ഥാന സൗകര്യങ്ങൾ ലഭിക്കുന്നില്ലെന്ന പരാതിയും അദ്ദേഹം ഉന്നയിച്ചു.
ജീവൻ നഷ്ടപ്പെട്ടവരുടെ കുടുംബങ്ങളോടൊപ്പം നിൽക്കുന്നതായും അനുശോചനം അറിയിക്കുന്നതായും പിണറായി പറഞ്ഞു. കാണാതായവർക്കായുള്ള തിരച്ചിൽ തുടരുകയാണെന്നും സർക്കാരിന്റെ രക്ഷാപ്രവർത്തനങ്ങൾക്ക് എല്ലാ പിന്തുണയും നൽകുമെന്നും അദ്ദേഹം വ്യക്തമാക്കി.
വയനാട്ടിൽ ശക്തമായ മഴ ഉണ്ടായിട്ടും ആവശ്യമായ മുന്നൊരുക്കങ്ങൾ ഉണ്ടായില്ലെന്ന് അദ്ദേഹം വിമർശിച്ചു. അപകട മുന്നറിയിപ്പ് നൽകുന്നതിൽ അലംഭാവമുണ്ടായെന്നും, അതിതീവ്ര മഴ ലഭിച്ചിട്ടും ജില്ലയിൽ യെല്ലോ അലർട്ട് മാത്രമാണ് പ്രഖ്യാപിച്ചതെന്നും അദ്ദേഹം പറഞ്ഞു. സുരക്ഷാ മുൻകരുതലുകൾ സ്വീകരിച്ചില്ലെന്നും, ദുരന്തം ഉണ്ടായ ശേഷമാണ് റെഡ് അലർട്ട് പ്രഖ്യാപിച്ചതെന്നും അദ്ദേഹം ചൂണ്ടിക്കാട്ടി.
കൂട്ടിയിട്ടിരുന്ന മണ്ണിന്റെ ഉള്ളിലൂടെയാണ് വെള്ളം ഒഴുകിയെത്തിയതെന്നും, ആ മണ്ണ് നേരത്തെ തന്നെ നീക്കം ചെയ്യാൻ നിർദേശം നൽകിയിരുന്നെങ്കിലും അത് നടപ്പാക്കിയില്ലെന്നും അദ്ദേഹം പറഞ്ഞു. മണ്ണ് നീക്കണമെന്ന നിർദേശം ലഭിച്ച ശേഷം രണ്ടാഴ്ച സമയം ഉണ്ടായിട്ടും നടപടിയൊന്നും ഉണ്ടായില്ലെന്നത് ഗുരുതരമാണെന്നും അദ്ദേഹം ആരോപിച്ചു.
സർക്കാരും ബന്ധപ്പെട്ട അധികൃതരും ആവശ്യമായ നടപടി സ്വീകരിച്ചില്ലെന്നും, എല്ലാ സുരക്ഷാ മുൻകരുതലുകളും പാലിക്കുന്നുവെന്ന് നിർമാണ ഏജൻസി ഉറപ്പാക്കേണ്ടതായിരുന്നുവെന്നും അദ്ദേഹം പറഞ്ഞു. മണ്ണ് നീക്കം ചെയ്യാത്തതാണ് അപകടത്തിന് പ്രധാന കാരണമായതെന്നും, ഇത് കുറ്റകരമായ അനാസ്ഥയാണെന്നും അദ്ദേഹം ആരോപിച്ചു.
മുഖ്യമന്ത്രി അന്വേഷണം പ്രഖ്യാപിച്ചത് സ്വാഗതാർഹമാണെങ്കിലും, അതോടൊപ്പം തന്നെ വസ്തുതകൾ വളച്ചൊടിച്ച് ജനങ്ങളെ തെറ്റിദ്ധരിപ്പിക്കാനുള്ള ശ്രമം സർക്കാർ തലത്തിൽ നടക്കുകയാണെന്നും പിണറായി വിജയൻ ആരോപിച്ചു.