ന്യൂഡൽഹി: അന്തരിച്ച മുൻ പ്രധാനമന്ത്രി ഡോ. മൻമോഹൻ സിങിനെതിരെയുള്ള കൽക്കരി കുംഭകോണക്കേസ് സുപ്രീം കോടതി ഔദ്യോഗികമായി അവസാനിപ്പിച്ചു. സിബിഐ സമർപ്പിച്ച ക്ലീൻ ചിറ്റ് അടങ്ങിയ ക്ലോഷർ റിപ്പോർട്ട് പൂർണ്ണമായി അംഗീകരിച്ചുകൊണ്ടാണ് സുപ്രീം കോടതിയുടെ ചരിത്രപരമായ നടപടി. ചീഫ് ജസ്റ്റിസ് സൂര്യകാന്ത്, ജസ്റ്റിസ് ജോയ്മാല്യ ബാഗ്ചി, ജസ്റ്റിസ് വി. മോഹന എന്നിവരടങ്ങിയ ബെഞ്ചാണ് കേസ് തള്ളിക്കളഞ്ഞത്. അദ്ദേഹം വിടപറഞ്ഞ് രണ്ട് വർഷത്തിന് ശേഷമാണ് കേസിൽ അന്തിമമായി ക്ലീൻ ചിറ്റ് ലഭിക്കുന്നത്.
സിബിഐ സമർപ്പിച്ച ക്ലോഷർ റിപ്പോർട്ട് തള്ളിക്കളയാൻ തക്കതായ ശക്തമായ കാരണങ്ങളൊന്നും നിലവിലില്ലെന്ന് കോടതി നിരീക്ഷിച്ചു. കേസിൽ സിബിഐ അതീവ വിശദമായ അന്വേഷണമാണ് നടത്തിയത്.തുടർന്ന് സമർപ്പിച്ച രണ്ട് വ്യത്യസ്ത ക്ലോഷർ റിപ്പോർട്ടുകളും കോടതി വിശദമായി പരിശോധിച്ചു. ഈ രണ്ട് റിപ്പോർട്ടുകളിലും പ്രതികൾക്കെതിരെ നിലനിൽക്കുന്ന ക്രിമിനൽ കുറ്റം തെളിയിക്കാനായിട്ടില്ലെന്ന് വ്യക്തമാക്കുന്നുണ്ട്. ഇതിന്റെ അടിസ്ഥാനത്തിലാണ് കേസ് പൂർണ്ണമായും അവസാനിപ്പിക്കുന്നതായി കോടതി പ്രഖ്യാപിച്ചത്.
യുപിഎ സർക്കാരിനെ രാഷ്ട്രീയമായി ഏറെ പിടിച്ചുകുലുക്കിയ വിവാദമായിരുന്നു 2005-ൽ പുറത്തുവന്ന കൽക്കരി കുംഭകോണം. ഒഡീഷയിലെ താലാബിറ ബ്ലോക്കിൽ ഹിൻഡാൽക്കോയ്ക്ക് നിയമവിരുദ്ധമായി ഖനന അനുമതി നൽകിയെന്നായിരുന്നു കേസ്. ഈ പ്രമുഖ കേസിൽ ആറാം പ്രതിയായിരുന്നു മൻമോഹൻ സിങ്. മുൻ കൽക്കരി സെക്രട്ടറി പി.സി. പരീഖ്, വ്യവസായി കുമാരമംഗലം ബിർള എന്നിവരും കേസിലെ മറ്റ് പ്രതികളായിരുന്നു. കേസിൽ മൻമോഹൻ സിങ് അടക്കമുള്ള പ്രതികൾ വിചാരണ നേരിടണമെന്ന് വിധിച്ചുകൊണ്ടുള്ള 2015-ലെ സിബിഐ കോടതിയുടെ ഉത്തരവ് നേരത്തെ സുപ്രീം കോടതി റദ്ദാക്കിയിരുന്നു. അന്ന് ആരംഭിച്ച നീണ്ട നിയമപോരാട്ടത്തിനാണ് ഇപ്പോൾ അന്തിമ പരിസമാപ്തിയായിരിക്കുന്നത്.