തെഹ്റാൻ: അമേരിക്കൻ ഇടക്കാല തെരഞ്ഞെടുപ്പിൽ ഡെമോക്രാറ്റുകൾ മുന്നേറ്റം നടത്തി കോൺഗ്രസിന്റെ നിയന്ത്രണം പിടിച്ചെടുത്തതിനു പിന്നാലെ പ്രതികരണവുമായി ഇറാൻ. അമേരിക്കൻ ജനത യുദ്ധത്തോട് ‘നോ’ പറഞ്ഞിരിക്കുകയാണെന്ന് ഇറാൻ പാർലമെന്റ് സ്പീക്കർ മുഹമ്മദ് ബാഖർ ഖാലിബാഫ് പ്രതികരിച്ചു. ജനങ്ങളുടെ ഈ സന്ദേശത്തെ പിന്തുണയ്ക്കുന്നതായും അദ്ദേഹം വ്യക്തമാക്കി.
‘മനഃസാക്ഷിയുടെ പേരിലായാലും ജീവിതച്ചെലവിലെ വർധന കാരണമായാലും അമേരിക്കക്കാർ യുദ്ധത്തോട് നോ പറഞ്ഞിരിക്കുകയാണ്. ഈ സന്ദേശത്തെ ഞങ്ങൾ പിന്തുണയ്ക്കുന്നു. അന്താരാഷ്ട്ര താൽപര്യശക്തികളുടെയും ഭീഷണിപ്പെടുത്തുന്നവരുടെയും സേവനത്തിനായി അമേരിക്കൻ സർക്കാർ ജനങ്ങളുടെ ഇച്ഛയെ വഞ്ചിച്ചാൽ, ഞങ്ങളുടെ നോ ഒരു പേടിസ്വപ്നമായി മാറുമെന്ന് അവർ തിരിച്ചറിയണം’ — ഖാലിബാഫ് സമൂഹമാധ്യമമായ എക്സിൽ കുറിച്ചു.
ഇറാനെതിരായ അമേരിക്കൻ സൈനിക നടപടിയും യുദ്ധം സൃഷ്ടിച്ച സാമ്പത്തിക പ്രത്യാഘാതങ്ങളും തെരഞ്ഞെടുപ്പിൽ പ്രതിഫലിച്ചെന്നാണ് വിവിധ സർവേകൾ സൂചിപ്പിച്ചത്. യുദ്ധത്തെത്തുടർന്ന് ഇന്ധനവില കുത്തനെ ഉയർന്നതും ജീവിതച്ചെലവ് വർധിച്ചതും അമേരിക്കൻ വോട്ടർമാർക്കിടയിൽ അതൃപ്തിക്ക് കാരണമായിരുന്നു. അതേസമയം, റിപ്പബ്ലിക്കൻ പാർട്ടിക്കുണ്ടായ തിരിച്ചടിക്ക് ഇറാൻ യുദ്ധത്തിനു പുറമേ ട്രംപിന്റെ സാമ്പത്തിക നയങ്ങളോടുള്ള എതിർപ്പും വിലക്കയറ്റവും ഉൾപ്പെടെ നിരവധി കാരണങ്ങളുണ്ടെന്നാണ് വിലയിരുത്തൽ.
തെരഞ്ഞെടുപ്പിലെ തിരിച്ചടിക്കു പിന്നാലെ ഡെമോക്രാറ്റുകളുമായി സഹകരിക്കാൻ തയ്യാറാണെന്ന് പ്രസിഡന്റ് ഡോണൾഡ് ട്രംപ് വ്യക്തമാക്കി. രാജ്യത്തിന്റെ താൽപര്യത്തിനായി പ്രതിപക്ഷവുമായി പ്രവർത്തിക്കുമെന്നും അദ്ദേഹം പറഞ്ഞു. എന്നാൽ, ഡെമോക്രാറ്റുകൾ പാസാക്കുന്ന നിയമങ്ങളിൽ തനിക്ക് വീറ്റോ അധികാരമുണ്ടെന്നും ട്രംപ് ഓർമിപ്പിച്ചു.
റിപ്പബ്ലിക്കൻ പാർട്ടിയുടെ പരാജയത്തിന്റെ ഉത്തരവാദിത്തം ഏറ്റെടുക്കാൻ ട്രംപ് തയ്യാറായില്ല. താനാണ് മത്സരിച്ചിരുന്നതെങ്കിൽ റിപ്പബ്ലിക്കൻ സ്ഥാനാർഥികൾ വിജയിക്കുമായിരുന്നുവെന്ന് അദ്ദേഹം അവകാശപ്പെട്ടു. ചില സ്ഥാനാർഥികൾക്ക് ജനപ്രീതിയില്ലായിരുന്നുവെന്നും മറ്റുചിലർക്ക് തന്റെ പിന്തുണ ലഭിച്ചിരുന്നില്ലെന്നും ട്രംപ് പറഞ്ഞു.
ഇതിനിടെ, ഇറാനെതിരായ യുദ്ധം അവസാനിപ്പിക്കുന്ന കാര്യത്തിൽ തന്റെ നിലപാടിൽ ഉറച്ചുനിൽക്കുമെന്നും ട്രംപ് വ്യക്തമാക്കി. ‘യുദ്ധം അവസാനിക്കുന്നത് ഞാൻ പറയുമ്പോഴായിരിക്കും. ഞാൻ പറയുമ്പോൾ അത് അവസാനിക്കും’ എന്നായിരുന്നു അദ്ദേഹത്തിന്റെ പ്രതികരണം.
ഡെമോക്രാറ്റുകളുടെ മുന്നേറ്റം ട്രംപിന്റെ ശേഷിക്കുന്ന ഭരണകാലത്ത് വലിയ രാഷ്ട്രീയ വെല്ലുവിളിയാകുമെന്നാണ് വിലയിരുത്തൽ. ഭരണകൂടത്തിന്റെ പ്രവർത്തനങ്ങൾ കൂടുതൽ സൂക്ഷ്മമായി പരിശോധിക്കാനും നിയമനിർമാണത്തിൽ നിയന്ത്രണം ചെലുത്താനും പ്രതിപക്ഷത്തിന് ഇതിലൂടെ അവസരം ലഭിക്കും.