ബെയ്ജിംഗ്: വിക്ഷേപണം നടന്ന് നിമിഷങ്ങൾക്കകം റോക്കറ്റിൽ ശക്തമായ മിന്നലേറ്റെങ്കിലും ദൗത്യം വിജയകരമായി പൂർത്തിയാക്കി ചൈനയുടെ ലോംഗ് മാർച്ച്-3ബി റോക്കറ്റ്. പ്രതികൂല സാഹചര്യങ്ങളെ അതിജീവിച്ച് തിയാൻലിയാൻ-2-06 ഡാറ്റ റിലേ ഉപഗ്രഹത്തെ ജിയോസ്റ്റേഷനറി ട്രാൻസ്ഫർ ഓർബിറ്റിൽ വിജയകരമായി എത്തിക്കുകയായിരുന്നു.
ചൈനയിലെ ഏറ്റവും കൂടുതൽ മിന്നൽ സാധ്യതയുള്ള പ്രദേശങ്ങളിലൊന്നായ ക്സിചാങ് സാറ്റലൈറ്റ് ലോഞ്ച് സെന്ററിൽ നിന്നാണ് വിക്ഷേപണം നടന്നത്.
ലോഞ്ച് പാഡിൽ നിന്ന് റോക്കറ്റ് ഉയർന്നതിന് തൊട്ടുപിന്നാലെ ആകാശത്ത് വെച്ചാണ് റോക്കറ്റിൽ മിന്നലേറ്റത്. ശക്തമായ പ്രകാശവും മിന്നലും ദൃശ്യമായെങ്കിലും, റോക്കറ്റിന്റെ യാത്രയിൽ യാതൊരു തടസവും ഉണ്ടായില്ല.
ലക്ഷ്യപാതയിൽ തന്നെ മുന്നേറിയ ലോംഗ് മാർച്ച്-3ബി, ആസൂത്രണം ചെയ്തതുപോലെ ദൗത്യം പൂർത്തിയാക്കി തിയാൻലിയാൻ-2-06 ഡാറ്റ റിലേ ഉപഗ്രഹത്തെ വിജയകരമായി ഭ്രമണപഥത്തിലെത്തിച്ചു.