കൊച്ചി: മഹാരാജാസ് കോളേജിലെ ബിരുദദാന ചടങ്ങിനിടെ ഉന്നത വിദ്യാഭ്യാസ മന്ത്രി റോജി എം. ജോണിനെ വളഞ്ഞ് വിദ്യാർഥികളുടെ പ്രതിഷേധം. കാലടി ശ്രീശങ്കരാചാര്യ സംസ്കൃത സർവകലാശാലയിലെ 16 വിദ്യാർഥികളെ സസ്പെൻഡ് ചെയ്ത നടപടിയിൽ പ്രതിഷേധിച്ചാണ് വിദ്യാർഥികൾ ബാനറുകളും പ്ലക്കാർഡുകളുമായി വേദിയിലെത്തിയത്. പ്രതിഷേധം ശക്തമായതോടെ മന്ത്രി പ്രസംഗം അവസാനിപ്പിച്ച് വേദിവിട്ട് മടങ്ങി.
മന്ത്രി പ്രസംഗിച്ചുകൊണ്ടിരിക്കെയാണ് വിദ്യാർഥികൾ വേദിയിലെത്തി പ്രതിഷേധം ആരംഭിച്ചത്. കാലടി സർവകലാശാലയിലെ വിദ്യാർഥികളെ സസ്പെൻഡ് ചെയ്തിട്ട് 60 ദിവസം പിന്നിട്ടിട്ടും നടപടി പിൻവലിച്ചില്ലെന്നാണ് പ്രതിഷേധക്കാരുടെ ആരോപണം. അടിസ്ഥാന സൗകര്യങ്ങൾ ആവശ്യപ്പെട്ട് വിദ്യാർഥികൾ നടത്തിയ സമരത്തിനിടെ അവതരിപ്പിച്ച നാടകത്തെ അക്രമസമരമായി ചിത്രീകരിച്ചാണ് 16 പേരെ സസ്പെൻഡ് ചെയ്തതെന്നും അവർ ആരോപിച്ചു.
എസ്.എഫ്.ഐ പ്രവർത്തകരാണ് പ്രതിഷേധത്തിന് നേതൃത്വം നൽകിയത്. ബിരുദദാന ചടങ്ങിനിടെ അപ്രതീക്ഷിതമായി അരങ്ങേറിയ പ്രതിഷേധം കോളേജ് വേദിയിൽ നാടകീയ രംഗങ്ങൾക്കിടയാക്കി.