ഐപിഎല്ലില് ഗ്രൂപ്പ് ഘട്ടം അവസാനത്തിലേക്ക് നീങ്ങുമ്പോള് പ്ലേ ഓഫ് പോരാട്ടം അത്യന്തം ആവേശകരമാകുന്നു. നിലവിലെ പോയിന്റ് പട്ടിക പ്രകാരം മൂന്ന് ടീമുകള് പ്ലേ ഓഫ് പ്രവേശനത്തിന് തൊട്ടരികിലെത്തിയിരിക്കെ മുന് ചാമ്പ്യന്മാരായ ചെന്നൈ സൂപ്പര് കിംഗ്സിനും രാജസ്ഥാന് റോയല്സിനും മുന്നിലുള്ളത് കടുത്ത വെല്ലുവിളികളാണ്. മുംബൈ ഇന്ത്യന്സും ലക്നൗ സൂപ്പര് ജയന്റ്സും മാത്രമാണ് ഇതിനോടകം പ്ലേ ഓഫ് സാധ്യത നഷ്ടപ്പെടുത്തി പുറത്തായിരിക്കുന്നത്.
11 മത്സരങ്ങളില് നിന്ന് 14 പോയിന്റ് വീതമുള്ള റോയല് ചലഞ്ചേഴ്സ് ബെംഗളൂരു, സണ്റൈസേഴ്സ് ഹൈദരാബാദ്, ഗുജറാത്ത് ടൈറ്റന്സ് ടീമുകളാണ് നിലവില് മികച്ച നിലയില്. ഗുജറാത്തിന് പ്ലേ ഓഫിലെത്താന് 80.2 ശതമാനം സാധ്യത കണക്കാക്കപ്പെടുമ്പോള്, ആര്സിബിക്ക് 80.1 ശതമാനവും ഹൈദരാബാദിന് 80 ശതമാനവുമാണ് സാധ്യത.
തുടര്ച്ചയായി നാല് തോല്വികള് നേരിട്ടിട്ടും പഞ്ചാബ് കിംഗ്സ് ഇപ്പോഴും പ്രതീക്ഷ കൈവിടാത്ത അവസ്ഥയിലാണ്. 11 മത്സരങ്ങളില് നിന്ന് 13 പോയിന്റുമായി നില്ക്കുന്ന പഞ്ചാബിന് 62.5 ശതമാനം സാധ്യതയുണ്ടെന്നാണ് വിലയിരുത്തല്. ഡല്ഹി ക്യാപിറ്റല്സിനോട് പരാജയപ്പെട്ടെങ്കിലും പോയിന്റ് പട്ടികയില് നാലാം സ്ഥാനത്ത് തുടരുന്ന പഞ്ചാബിന് ശേഷിക്കുന്ന മത്സരങ്ങള് നിര്ണായകമാണ്.
അഞ്ചാം സ്ഥാനത്തുള്ള ചെന്നൈ സൂപ്പര് കിംഗ്സിന് പ്ലേ ഓഫിലെത്താന് നിലവില് 42.7 ശതമാനം സാധ്യത മാത്രമാണ് കണക്കാക്കുന്നത്. ശേഷിക്കുന്ന മൂന്ന് മത്സരങ്ങളിലും ജയിച്ചാല് മാത്രമേ ചെന്നൈക്ക് കാര്യങ്ങള് എളുപ്പമാകൂ. രണ്ട് ജയത്തില് ഒതുങ്ങുകയാണെങ്കില് നെറ്റ് റണ്റേറ്റും മറ്റ് ടീമുകളുടെ ഫലങ്ങളും നിര്ണായകമാകും.
സീസണ് മികച്ച രീതിയില് തുടങ്ങിയ രാജസ്ഥാന് റോയല്സ് പിന്നീട് തുടര്ച്ചയായ തിരിച്ചടികള് നേരിട്ടതോടെ സാധ്യത 41.8 ശതമാനമായി താഴ്ന്നു. ഇനി ഒരു പിഴവും പറ്റാത്ത സാഹചര്യത്തിലാണ് രാജസ്ഥാന്.
അതേസമയം തുടര്ച്ചയായ നാല് ജയങ്ങളുമായി മുന്നേറുന്ന കൊല്ക്കത്ത നൈറ്റ് റൈഡേഴ്സിന് ഇപ്പോഴും സാങ്കേതിക സാധ്യത നിലനില്ക്കുന്നുണ്ടെങ്കിലും പ്ലേ ഓഫിലെത്താനുള്ള സാധ്യത 11.6 ശതമാനം മാത്രമാണ്. ഡല്ഹി ക്യാപിറ്റല്സിന് വെറും 1.2 ശതമാനം സാധ്യത മാത്രമാണ് അവശേഷിക്കുന്നത്.
10 ടീമുകള് പങ്കെടുക്കുന്ന ഐപിഎല്ലില് സാധാരണയായി 16 പോയിന്റ് ലഭിച്ചാല് പ്ലേ ഓഫ് ഉറപ്പിക്കാമെന്നാണ് കണക്ക്. എന്നാല് ഇത്തവണ മത്സരങ്ങള് കടുത്തതോടെ നെറ്റ് റണ്റേറ്റും മറ്റ് ടീമുകളുടെ ഫലങ്ങളും നിര്ണായകമാകുന്ന സാഹചര്യമാണ് രൂപപ്പെട്ടിരിക്കുന്നത്.