വെല്ലിംഗ്ടൺ: ഇന്ത്യക്കെതിരായ ടി20 പരമ്പരയ്ക്ക് മുന്നോടിയായി ന്യൂസിലൻഡിന് തിരിച്ചടി. ഓൾറൗണ്ടർ രചിൻ രവീന്ദ്രയ്ക്ക് പരസ്യ ചിത്രീകരണത്തിനിടെ വലത് തോളിന് പരിക്കേറ്റതോടെ ഒക്ടോബർ 22ന് ആരംഭിക്കുന്ന അഞ്ച് മത്സര ടി20 പരമ്പരയിൽ താരം കളിക്കുമോ എന്ന കാര്യത്തിൽ സംശയമായി.
ഓക്ക്ലൻഡിൽ നടന്ന ചിത്രീകരണത്തിനിടെ ഡൈവിംഗ് ക്യാച്ചെടുക്കാൻ ശ്രമിക്കുമ്പോഴാണ് രചിന് പരിക്കേറ്റത്. സുരക്ഷാ പായയിലേക്ക് അശ്രദ്ധമായി വീണതിനെ തുടർന്ന് വലത് തോളിന് പരിക്കേൽക്കുകയായിരുന്നു. വെള്ളിയാഴ്ച മെഡിക്കൽ വിദഗ്ധർ നടത്തിയ പരിശോധനയിൽ ഗുരുതരമായ പരിക്ക് കണ്ടെത്തിയിട്ടില്ലെങ്കിലും പൂർണ കായികക്ഷമത വീണ്ടെടുക്കുന്നതിലെ താരത്തിന്റെ പുരോഗതി നിർണായകമാകും.
ഇത് നിർഭാഗ്യകരമായ പരിക്കാണെന്നും രചിൻ വേഗത്തിൽ സുഖം പ്രാപിക്കുകയെന്നതാണ് പ്രധാന പരിഗണനയെന്നും ന്യൂസിലൻഡ് പെർഫോമൻസ് മാനേജർ മൈക്ക് സാൻഡ്ലെ പറഞ്ഞു. പ്രമോഷണൽ ചിത്രീകരണങ്ങൾ നിശ്ചയിച്ച സുരക്ഷാ മുൻകരുതലുകൾ പാലിച്ചാണ് സാധാരണയായി നടത്തുന്നതെന്നും ഇത്തവണ സംഭവിച്ചത് യാദൃശ്ചികമായ അപകടമാണെന്നും അദ്ദേഹം വ്യക്തമാക്കി.
ഒക്ടോബർ 22നാണ് ഇന്ത്യ-ന്യൂസിലൻഡ് ടി20 പരമ്പരയ്ക്ക് തുടക്കമാകുക. അടുത്ത ആഴ്ച ടീമിനെ പ്രഖ്യാപിക്കാനിരിക്കെ രചിന്റെ ഫിറ്റ്നസ് ന്യൂസിലൻഡിന് നിർണായകമാണ്. വരാനിരിക്കുന്ന മാസങ്ങളിൽ വലിയ ടെസ്റ്റ് മത്സരക്രമമുള്ളതിനാൽ താരത്തെ തിടുക്കത്തിൽ തിരിച്ചിറക്കാൻ താൽപര്യമില്ലെന്ന് ന്യൂസിലൻഡ് മുഖ്യ പരിശീലകൻ റോബ് വാൾട്ടർ വ്യക്തമാക്കി.
ന്യൂസിലൻഡിനായി 52 ടി20 മത്സരങ്ങൾ കളിച്ചിട്ടുള്ള രചിൻ രവീന്ദ്ര 759 റൺസും 26 വിക്കറ്റുകളും നേടിയിട്ടുണ്ട്. നിലവിലെ ടി20 ലോകകപ്പ് ചാമ്പ്യന്മാരായ ഇന്ത്യക്കെതിരായ പരമ്പരയിൽ മിച്ചൽ സാന്റ്നർ ന്യൂസിലൻഡിനെ നയിക്കുമെന്നാണ് പ്രതീക്ഷിക്കുന്നത്.