തിരുവനന്തപുരം: സി.എം.ആർ.എൽ–എക്സാലോജിക് സാമ്പത്തിക ഇടപാട് കേസിൽ ചോദ്യം ചെയ്യലിന് ഹാജരാകാൻ സാവകാശം തേടി വീണ ടി. ആരോഗ്യപ്രശ്നങ്ങൾ ചൂണ്ടിക്കാട്ടിയാണ് വീണ ഇ.ഡിക്ക് അപേക്ഷ നൽകിയത്. ബുധനാഴ്ച രാവിലെയായിരുന്നു ഇ-മെയിൽ വഴി അപേക്ഷ ലഭിച്ചത്.
മുഴുവൻ രേഖകളും ചോദ്യങ്ങൾക്കുള്ള മറുപടികളും അഭിഭാഷകൻ മുഖേന സമർപ്പിക്കാമെന്നും വീണ കത്തിൽ വ്യക്തമാക്കിയിട്ടുണ്ട്. വിഷയത്തിൽ ഇ.ഡിയുടെ നിലപാട് ഇന്ന് തന്നെ വീണയെ അറിയിക്കുമെന്നാണ് വിവരം.
അനാരോഗ്യം കാരണം ഹാജരാകാനാകില്ലെന്ന് അറിയിക്കുന്നവർ മെഡിക്കൽ രേഖകൾ ഉൾപ്പെടെ സമർപ്പിച്ചാൽ അവധി പരിഗണിക്കുന്നതാണ് ഇ.ഡിയുടെ പതിവ് നടപടിക്രമം. എന്നാൽ കള്ളപ്പണം വെളുപ്പിക്കൽ തടയൽ നിയമം (PMLA) വകുപ്പ് 50 പ്രകാരം സമൻസ് ലഭിച്ചാൽ ബന്ധപ്പെട്ട വ്യക്തി നേരിട്ട് ഹാജരാകണമെന്നാണ് വ്യവസ്ഥ.
ഒരു ദിവസം സാവകാശം അനുവദിച്ചാലും പിന്നീട് ഇ.ഡിക്ക് മുന്നിൽ ഹാജരാകേണ്ടതുണ്ട്. ഈ വകുപ്പ് പ്രകാരമുള്ള സമൻസിന് സിവിൽ കോടതി സമൻസിന്റെ തുല്യമായ നിയമസാധുതയുണ്ട്. അതിനാൽ ഇ.ഡി ആവശ്യപ്പെടുന്ന രേഖകൾ സമർപ്പിക്കേണ്ടതും നിർബന്ധമാണ്.
സി.എം.ആർ.എല്ലിൽ നിന്ന് ലഭിച്ച 2.78 കോടി രൂപ എങ്ങനെ വിനിയോഗിച്ചു എന്നതടക്കമുള്ള വിഷയങ്ങളിൽ വ്യക്തത തേടുന്നതിനായി വിശദമായ ചോദ്യാവലി ഇ.ഡി തയ്യാറാക്കിയിരുന്നു. സി.എം.ആർ.എൽ ഉദ്യോഗസ്ഥർ മുമ്പ് നൽകിയ മൊഴികളുടെ അടിസ്ഥാനത്തിലും ചോദ്യം ചെയ്യൽ നടത്താനായിരുന്നു തീരുമാനം.
സി.എം.ആർ.എൽ–എക്സാലോജിക് കേസിൽ വീണയെ ഇ.ഡി ചോദ്യം ചെയ്യാൻ വിളിപ്പിക്കുന്നത് ഇതാദ്യമായാണ്. നേരത്തെ വീണയുടെ പിതാവും പ്രതിപക്ഷ നേതാവുമായ പിണറായി വിജയന്റെ തിരുവനന്തപുരത്തെയും കണ്ണൂരിലെയും വസതികളിലും, ഭർത്താവ് മുഹമ്മദ് റിയാസിന്റെ കോഴിക്കോട്ടെ വീട്ടിലും, സി.എം.ആർ.എൽ എം.ഡി ശശിധരൻ കർത്തയുടെ വീട്ടിലും ഉൾപ്പെടെ വിവിധയിടങ്ങളിൽ ഇ.ഡി പരിശോധന നടത്തിയിരുന്നു.
ഈ പരിശോധനകളിൽ നിന്ന് ചില രേഖകൾ ലഭിച്ചിട്ടുണ്ടെന്നും അവ വിശദമായി പരിശോധിച്ചുവരികയാണെന്നും ഇ.ഡി നേരത്തെ അറിയിച്ചിരുന്നു.
കഴിഞ്ഞ ദിവസമാണ് സി.എം.ആർ.എൽ–എക്സാലോജിക് സാമ്പത്തിക ഇടപാട് കേസിൽ വീണ ടിക്ക് സമൻസ് ലഭിച്ചത്. വീണയ്ക്ക് പുറമെ എക്സാലോജിക് എം.ഡി ശശിധരൻ കർത്ത, ജോയിന്റ് മാനേജിങ് ഡയറക്ടർ ശരൺ എസ്. കർത്ത, ചീഫ് മാനേജിങ് ഡയറക്ടർ കെ.എസ്. സുശേഷ് കുമാർ എന്നിവരുള്പ്പെടെ സി.എം.ആർ.എൽ ജീവനക്കാർക്കും സമൻസ് നൽകിയിട്ടുണ്ട്.
ഇവരെയും വിശദമായി ചോദ്യം ചെയ്യാനാണ് ഇ.ഡിയുടെ തീരുമാനം.
അതേസമയം, കേസിൽ അന്വേഷണം തുടരാൻ ഇ.ഡിക്ക് അനുമതി നൽകി ഹൈക്കോടതി ഡിവിഷൻ ബെഞ്ച് കഴിഞ്ഞ ദിവസം ഉത്തരവിട്ടിരുന്നു. സിംഗിൾ ബെഞ്ച് ഉത്തരവിനെതിരെ സി.എം.ആർ.എൽ നൽകിയ അപ്പീൽ തള്ളിക്കൊണ്ടാണ് നടപടി.
സി.എം.ആർ.എൽ–എക്സാലോജിക് കരാറുമായി ബന്ധപ്പെട്ട അന്വേഷണത്തിന് നിയമപരമായ തടസമില്ലെന്ന് കോടതി നിരീക്ഷിച്ചു. സ്വത്ത് കണ്ടുകെട്ടലും അതിനായുള്ള അന്വേഷണവും നടത്താമെന്നും, അതിന് കള്ളപ്പണ ഇടപാടിലേക്ക് നയിക്കുന്ന പ്രത്യേക കുറ്റകൃത്യം തെളിയിക്കേണ്ടതില്ലെന്നും കോടതി വ്യക്തമാക്കിയിരുന്നു.