മലയാളത്തിൽ പൊലീസ് കഥകളും തിരക്കഥാകൃത്ത് ഷാഹി കബീറും ഒന്നിക്കുമ്പോൾ വീണ്ടും ശ്രദ്ധേയമായൊരു സിനിമാനുഭവമാണ് ‘ഉന്മാദം’ സമ്മാനിക്കുന്നത്. കുഞ്ചാക്കോ ബോബനെ നായകനാക്കി കിരൺ ദാസ് സംവിധാനം ചെയ്ത ചിത്രം ഒരു സാധാരണ അന്വേഷണകഥയിൽ ഒതുങ്ങുന്നില്ല. മനുഷ്യരുടെ മാനസികാവസ്ഥയും വിശ്വാസവും അന്ധവിശ്വാസവും ചേർത്തിണക്കുന്ന ഒരു സ്ലോ-ബേൺ സൈക്കോളജിക്കൽ ത്രില്ലർ എന്ന നിലയിലാണ് സിനിമ മുന്നേറുന്നത്.
സിനിമയ്ക്കുള്ളിലെ സിനിമ എന്ന ആശയത്തിലാണ് കഥ അവതരിപ്പിച്ചിരിക്കുന്നത്. സിനിമ സംവിധാനം ചെയ്യണമെന്ന ആഗ്രഹമുള്ള പൊലീസ് ഉദ്യോഗസ്ഥനായ ഷെല്ലിയായാണ് കുഞ്ചാക്കോ ബോബൻ എത്തുന്നത്. മെഡിക്കൽ ലീവെടുത്ത് തിരക്കഥ എഴുതിക്കൊണ്ടിരിക്കുന്ന അദ്ദേഹത്തിന്റെ ജീവിതത്തിലേക്ക് ഭാര്യ സൗമ്യയായി ലിജോമോളും രണ്ട് മക്കളും എത്തുന്നു. പിന്നീട് ശിക്ഷാ സ്ഥലംമാറ്റത്തെ തുടർന്ന് കോങ്ങാട് പൊലീസ് സ്റ്റേഷനിലെത്തുന്ന ഷെല്ലിയുടെ ജീവിതം അപ്രതീക്ഷിത വഴിത്തിരിവിലേക്കാണ് നീങ്ങുന്നത്.
ആ സ്റ്റേഷനിൽ ആരും തൊടാൻ മടിക്കുന്ന ഒരു കേസ് ഫയലിനെ ചുറ്റിപ്പറ്റിയുള്ള വിശ്വാസങ്ങളാണ് കഥയുടെ പ്രധാന ആധാരം. ആ ഫയലുമായി ബന്ധപ്പെട്ട് ഇടപെടുന്നവർക്ക് ദുരനുഭവങ്ങൾ നേരിടേണ്ടിവരുമെന്ന വിശ്വാസം പൊലീസുകാർക്കിടയിൽ നിലനിൽക്കുന്നു. ആദ്യം അതിനെ അന്ധവിശ്വാസമായി കാണുന്ന ഷെല്ലി, പിന്നീട് അതിനുള്ളിലെ സംഭവങ്ങൾ തന്റെ സിനിമയ്ക്ക് അനുയോജ്യമായ കഥയാണെന്ന് തിരിച്ചറിയുന്നു.
വലിയ ട്വിസ്റ്റുകളോ അതിശയിപ്പിക്കുന്ന സസ്പെൻസുകളോ ആശ്രയിക്കാതെ, സ്വന്തം താളത്തിൽ പതിയെ മുന്നേറുന്ന സിനിമയാണ് ‘ഉന്മാദം’. എഡിറ്ററും സംവിധായകനുമായ കിരൺ ദാസിന്റെ അവതരണ ശൈലി ഇവിടെ വ്യക്തമായി അനുഭവപ്പെടുന്നു. അന്വേഷണകഥയ്ക്കൊപ്പം ഷെല്ലിയുടെയും സൗമ്യയുടെയും ദാമ്പത്യബന്ധവും നായകന്റെ മാനസിക സംഘർഷങ്ങളും സമാന്തരമായി വികസിപ്പിച്ചെടുക്കുന്ന രീതിയാണ് ചിത്രത്തിന്റെ പ്രധാന ശക്തി.
വിശ്വാസം, അന്ധവിശ്വാസം, മനുഷ്യമനസിന്റെ സങ്കീർണതകൾ എന്നിവ ഒരുമിച്ച് കൈകാര്യം ചെയ്യുന്ന തിരക്കഥയെ ഷാഹി കബീർ കൃത്യമായി രൂപപ്പെടുത്തിയിരിക്കുന്നു. അതിന് കുഞ്ചാക്കോ ബോബന്റെയും ലിജോമോളുടെയും അസാധാരണ പ്രകടനം വലിയ കരുത്ത് നൽകുന്നു. ഇരുവരും കഥാപാത്രങ്ങളുടെ എല്ലാ വികാരതലങ്ങളെയും സ്വാഭാവികമായി പ്രേക്ഷകരിലേക്ക് എത്തിക്കുന്നു.
സുധീഷ്, വിശാഖ് നായർ, സാബു മോൻ, കോട്ടയം നസീർ, ജിജോയ് രാജഗോപാൽ, ഗോകുലൻ, അരുൺ ചെറുകാവിൽ, ഉണ്ണി ലാലു, ഷാജു ശ്രീധർ, കൃഷ്ണപ്രഭ, കിരൺ പീതാംബരൻ, സിദ്ദിഖ്, റെയ്ന രാധാകൃഷ്ണൻ, സിജോയ് വർഗീസ്, വിഘ്നേശ്വർ സുരേഷ് എന്നിവരും തങ്ങളുടെ കഥാപാത്രങ്ങൾ മികച്ച രീതിയിൽ അവതരിപ്പിച്ചിട്ടുണ്ട്.
അർജുൻ സേതുവിന്റെ ഛായാഗ്രഹണവും മുജീബ് മജീദിന്റെ സംഗീതവും ചിത്രത്തിന്റെ അന്തരീക്ഷത്തെ കൂടുതൽ ശക്തമാക്കുന്നു. യാഥാർഥ്യബോധമുള്ള കഥാപശ്ചാത്തലത്തെ സിനിമാറ്റിക് അനുഭവമാക്കി മാറ്റുന്നതിൽ സാങ്കേതിക വിഭാഗവും മികച്ച പ്രകടനമാണ് കാഴ്ചവെക്കുന്നത്.