തിരുവനന്തപുരം: പ്രതിപക്ഷത്തിരുന്നപ്പോൾ ലോക കേരള സഭയെ ധൂർത്തെന്ന് വിമർശിച്ച വി.ഡി. സതീശൻ മുഖ്യമന്ത്രിയായതിന് പിന്നാലെ പരിപാടി തുടരാൻ തീരുമാനം. പുതിയ സാമ്പത്തിക വർഷത്തിലെ പ്രവർത്തനങ്ങൾക്ക് സർക്കാർ ഭരണാനുമതി നൽകിയതായും ഇതിനായി രണ്ട് കോടി രൂപ അനുവദിച്ചതായുമാണ് വിവരം.
ലോക കേരള സഭ തുടരണമെന്ന മുസ്ലിം ലീഗിന്റെ നിലപാടും സർക്കാർ തീരുമാനത്തിൽ നിർണായകമായതായി റിപ്പോർട്ടുകളുണ്ട്. പ്രവാസി മലയാളികൾ പിന്തുണയ്ക്കുന്ന പരിപാടി പൂർണമായി ഉപേക്ഷിക്കേണ്ടതില്ലെന്ന നിലപാടാണ് ലീഗ് സ്വീകരിച്ചത്.
പ്രതിപക്ഷത്തിരുന്ന കാലത്ത് ലോക കേരള സഭയ്ക്കെതിരെ വി.ഡി. സതീശൻ രൂക്ഷ വിമർശനം ഉന്നയിച്ചിരുന്നു. കേരളത്തിന് നാണക്കേടുണ്ടാക്കുന്ന പരിപാടിയാണെന്നും പണമുള്ളവരെ മാത്രം ക്ഷണിച്ചിരുത്തുന്ന രീതിയാണെന്നും ആരോപിച്ച അദ്ദേഹം, ലോക കേരള സഭയുടെ പേരിൽ നടക്കുന്ന ചെലവുകൾ ധൂർത്തെന്നും പറഞ്ഞിരുന്നു. പരിപാടിയുമായി ബന്ധപ്പെട്ട അനധികൃത പിരിവ് സംബന്ധിച്ച് അന്വേഷണം വേണമെന്നും അദ്ദേഹം ആവശ്യപ്പെട്ടിരുന്നു.
ഇപ്പോൾ മുഖ്യമന്ത്രിയുടെ നേതൃത്വത്തിലുള്ള സർക്കാർ ലോക കേരള സഭ തുടരാനുള്ള തീരുമാനമാണ് സ്വീകരിച്ചിരിക്കുന്നത്. പ്രവാസി മലയാളികളുടെ പ്രശ്നങ്ങളും കേരളത്തിന്റെ വികസന സാധ്യതകളും ചർച്ച ചെയ്യുന്നതിനായി രൂപീകരിച്ച വേദിയാണ് ലോക കേരള സഭ. 2026 ജനുവരിയിൽ അഞ്ചാം ലോക കേരള സഭയുടെ സമ്മേളനം നടന്നിരുന്നു. സർക്കാർ പോർട്ടലിൽ സമ്മേളനത്തിന്റെ വിവിധ പ്രവർത്തനങ്ങളും തീരുമാനങ്ങളും രേഖപ്പെടുത്തിയിട്ടുണ്ട്.
സതീശൻ സർക്കാർ നേരത്തെയും പ്രതിപക്ഷ നിലപാടിൽനിന്ന് വ്യത്യസ്തമായ തീരുമാനങ്ങൾ സ്വീകരിച്ചിരുന്നു. പി.എം. ശ്രീ പദ്ധതിയിൽ തുടരാൻ സർക്കാർ തീരുമാനിച്ചതും സമാനമായ രാഷ്ട്രീയ ചർച്ചകൾക്ക് വഴിവെച്ചിരുന്നു. അന്നത്തെ നിലപാടിൽ മുൻ എൽ.ഡി.എഫ് സർക്കാർ പദ്ധതിയുമായി കരാറിലേർപ്പെട്ടതിനാലാണ് തുടർന്നതെന്നായിരുന്നു സതീശൻ സർക്കാരിന്റെ വിശദീകരണം.
ലോക കേരള സഭയുടെ പുതിയ തീരുമാനത്തോടെ പ്രതിപക്ഷത്തിരുന്ന കാലത്തെ വിമർശനങ്ങളും ഇപ്പോഴത്തെ സർക്കാർ നിലപാടും വീണ്ടും രാഷ്ട്രീയ ചർച്ചയാകുകയാണ്.