പാലക്കാട്: കോളറ സ്ഥിരീകരണവുമായി ബന്ധപ്പെട്ട് ആരോഗ്യവകുപ്പിൽ ഉണ്ടായ ആശയക്കുഴപ്പത്തിന് വിശദീകരണവുമായി ആരോഗ്യമന്ത്രിയുടെ ഓഫീസ്. പാലക്കാട് രണ്ട് പേർക്ക് കോളറ സ്ഥിരീകരിച്ചതായി ആദ്യം ലഭിച്ച വിവരം പ്രാഥമിക പരിശോധനാഫലത്തിന്റെ അടിസ്ഥാനത്തിലായിരുന്നുവെന്നും, പിന്നീട് നടത്തിയ വിശദ പരിശോധനയിൽ കോളറയല്ലെന്ന് വ്യക്തമായതായും മന്ത്രിയുടെ ഓഫീസ് അറിയിച്ചു.
പ്രാഥമിക പരിശോധനയിൽ രണ്ട് പേർക്ക് കോളറ പോസിറ്റീവ് റിപ്പോർട്ട് ലഭിച്ചിരുന്നു. ഇതിന്റെ അടിസ്ഥാനത്തിലാണ് ആരോഗ്യമന്ത്രിയും മന്ത്രിയുടെ ഓഫീസും മാധ്യമങ്ങൾക്ക് വിവരം കൈമാറിയത്. എന്നാൽ തുടർപരിശോധനകൾ പൂർത്തിയായതിന് പിന്നാലെ രോഗബാധ സ്ഥിരീകരിക്കാനായില്ലെന്നും വിശദ പരിശോധനാഫലം നെഗറ്റീവ് ആയിരുന്നുവെന്നും ഓഫീസ് വിശദീകരിച്ചു.
സംഭവം വലിയ ആശയക്കുഴപ്പത്തിനാണ് വഴിവെച്ചത്. ആദ്യം പാലക്കാട് രണ്ട് പേർക്ക് കോളറ സ്ഥിരീകരിച്ചതായി ആരോഗ്യമന്ത്രി കെ. മുരളീധരന്റെ ഓഫീസ് അറിയിക്കുകയും തുടർന്ന് മാധ്യമങ്ങൾ വാർത്ത റിപ്പോർട്ട് ചെയ്യുകയും ചെയ്തിരുന്നു. പിന്നീട് മാധ്യമങ്ങളോട് സംസാരിക്കുമ്പോഴും മന്ത്രി ഈ വിവരം ആവർത്തിച്ചു.
എന്നാൽ പാലക്കാട് ജില്ലയിൽ കോളറ സ്ഥിരീകരിച്ചിട്ടില്ലെന്നും സംശയാസ്പദമായ കേസുകൾ മാത്രമാണുള്ളതെന്നും ജില്ലാ മെഡിക്കൽ ഓഫീസർ (ഡി.എം.ഒ) വിശദീകരിച്ചതോടെയാണ് ആശയക്കുഴപ്പം കൂടുതൽ ശക്തമായത്. ഡി.എം.ഒയുടെ ഔദ്യോഗിക പ്രതികരണത്തിന് പിന്നാലെ മന്ത്രിയുടെ ഓഫീസും വിശദീകരണം നൽകി, കോളറ സ്ഥിരീകരിച്ചിട്ടില്ലെന്നും സംശയാസ്പദ കേസുകളാണ് റിപ്പോർട്ട് ചെയ്തതെന്നും വ്യക്തമാക്കുകയായിരുന്നു.
ഇതിനിടെ, കോഴിക്കോട് നിപ സ്ഥിരീകരണവുമായി ബന്ധപ്പെട്ടും സമാനമായ ആശയക്കുഴപ്പം നേരത്തെ ഉണ്ടായിരുന്നതായി ചർച്ചയാകുന്നു. പുണെയിലെ വൈറോളജി ലാബിൽ നിന്നുള്ള പരിശോധനാഫലം ലഭിച്ചിട്ടില്ലെന്നാണ് മന്ത്രി പറഞ്ഞിരുന്നത്. എന്നാൽ ഫലം ഉച്ചയ്ക്കുമുമ്പേ ലഭിച്ചതായും നിപ സ്ഥിരീകരിച്ചതായും കോഴിക്കോട് ജില്ലാ കളക്ടർ അറിയിച്ചിരുന്നു.
ആരോഗ്യവകുപ്പിലെ ഉന്നത ഉദ്യോഗസ്ഥരും മന്ത്രിയുടെ ഓഫീസും തമ്മിലുള്ള ഏകോപനക്കുറവാണ് ഇത്തരം സംഭവങ്ങളിലൂടെ പുറത്തുവരുന്നതെന്ന വിമർശനവും പ്രതിപക്ഷം ഉയർത്തുന്നുണ്ട്. അതേസമയം, നിപ പ്രതിരോധ പ്രവർത്തനങ്ങൾ വിലയിരുത്തുന്നതിനായി ആരോഗ്യമന്ത്രി കെ. മുരളീധരൻ നാളെ കോഴിക്കോട് സന്ദർശിക്കും.
ഇതിനിടെ നിപ പ്രതിരോധ രംഗത്ത് ആശ്വാസവാർത്തയും ആരോഗ്യവകുപ്പ് പങ്കുവച്ചു. സമ്പർക്കപ്പട്ടികയിലുള്ള മൂന്ന് പേരുടെ പരിശോധനാഫലം നെഗറ്റീവ് ആയതായി ആരോഗ്യമന്ത്രി അറിയിച്ചു. ജൂൺ 12ന് നിരീക്ഷണത്തിനായി ആശുപത്രിയിൽ പ്രവേശിപ്പിച്ചിരുന്ന അടുത്ത സമ്പർക്കത്തിലുള്ള മൂന്ന് ബന്ധുക്കളുടെ പരിശോധനാഫലമാണ് നെഗറ്റീവ് ആയത്.
മെഡിക്കൽ കോളേജിൽ നടത്തിയ പരിശോധനയിലാണ് ഫലം ലഭിച്ചത്. സമ്പർക്കപ്പട്ടികയിലുള്ള നാല് പേരെ കൂടി ഇന്ന് ആശുപത്രിയിൽ പ്രവേശിപ്പിച്ചിട്ടുണ്ടെന്നും, പുതുതായി 13 പേരെ കൂടി പട്ടികയിൽ ഉൾപ്പെടുത്തിയതായും ആരോഗ്യവകുപ്പ് അറിയിച്ചു.
നിലവിൽ അതീവ ഉയർന്ന അപകടസാധ്യതാ വിഭാഗത്തിൽ നാല് പേരും, ഉയർന്ന അപകടസാധ്യതാ വിഭാഗത്തിൽ 14 പേരും, കുറഞ്ഞ അപകടസാധ്യതാ വിഭാഗത്തിൽ 82 പേരും ഉൾപ്പെടെ ആകെ 100 പേരാണ് സമ്പർക്കപ്പട്ടികയിലുള്ളത്