ന്യൂഡൽഹി: മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് രാജ്യതലസ്ഥാനത്ത് പ്രതിഷേധം ശക്തമാകുന്നതിനിടെ, പ്രമുഖ നേതാക്കളെയും പ്രവർത്തകരെയും കൂട്ടത്തോടെ കസ്റ്റഡിയിലെടുത്ത് ഡൽഹി പൊലീസ്. പിണറായി വിജയൻ, അരവിന്ദ് കെജ്‌രിവാൾ, അഭിജീത് ദീപ്കെ, അശുതോഷ് റാങ്കെ, ധ്രുവ് റാഠി തുടങ്ങി നിരവധി പേരെയാണ് ജന്തർ മന്തറിലേക്ക് നടത്താനിരുന്ന പ്രതിഷേധ മാർച്ചിന് മുന്നോടിയായി കസ്റ്റഡിയിലെടുത്തത്. സമരം അടിച്ചമർത്താനാണ് സർക്കാർ ശ്രമിക്കുന്നതെന്ന് ആരോപിച്ച സിജെപി പ്രതിഷേധം തുടരുമെന്ന് വ്യക്തമാക്കി.
സിജെപിയുടെ നേതൃത്വത്തിൽ സംഘടിപ്പിച്ച മാർച്ചിൽ പങ്കെടുക്കാനെത്തിയ കോക്രോച്ച് ജനതാ പാർട്ടി (സിജെപി), സിപിഎം ഉൾപ്പെടെയുള്ള ഇടതുപാർട്ടികൾ, ആം ആദ്മി പാർട്ടി എന്നിവയുടെ നേതാക്കളും പ്രവർത്തകരും ആക്ടിവിസ്റ്റുകളുമാണ് പൊലീസ് നടപടിക്ക് ഇരയായത്. സിജെപി സ്ഥാപകൻ അഭിജീത് ദീപ്കെ, കോ-കൺവീനർ അശുതോഷ് റാങ്കെ, വക്താവ് സൗരവ് ദാസ്, സിപിഎം നേതാക്കളായ പിണറായി വിജയൻ, എം.എ. ബേബി, എം.വി. ഗോവിന്ദൻ, പി.കെ. ശ്രീമതി, കെ.കെ. ശൈലജ, ആം ആദ്മി പാർട്ടി അധ്യക്ഷൻ അരവിന്ദ് കെജ്‌രിവാൾ, യൂട്യൂബറും ആക്ടിവിസ്റ്റുമായ ധ്രുവ് റാഠി എന്നിവരും കസ്റ്റഡിയിലായവരിൽ ഉൾപ്പെടുന്നു. പ്രതിഷേധത്തിന് മുന്നോടിയായി ഡൽഹിയുടെ വിവിധ ഭാഗങ്ങളിൽനിന്ന് 500-ലധികം പേരെ പൊലീസ് കസ്റ്റഡിയിലെടുത്തതായാണ് വിവരം.
മുംബൈയിൽനിന്ന് പ്രതിഷേധത്തിൽ പങ്കെടുക്കാൻ ഡൽഹിയിലെത്തിയ അഭിജീത് ദീപ്കെയെ വിമാനത്തിനുള്ളിൽവെച്ചാണ് പൊലീസ് കസ്റ്റഡിയിലെടുത്തത്. ഒപ്പമുണ്ടായിരുന്ന സിജെപി വക്താവ് സൗരവ് ദാസ്, കോ-കൺവീനർ അശുതോഷ് റാങ്കെ എന്നിവരെയും വിമാനത്തിൽനിന്ന് ഇറങ്ങാൻ അനുവദിക്കാതെ കസ്റ്റഡിയിലെടുത്തു. അറസ്റ്റിന് സാധ്യതയുണ്ടെന്ന് നേരത്തെ ആശങ്ക പ്രകടിപ്പിച്ചിരുന്നെങ്കിലും പിൻമാറില്ലെന്ന് അഭിജീത് ദീപ്കെ വ്യക്തമാക്കിയിരുന്നു.
വിമാനത്തിനുള്ളിലെ സംഭവങ്ങൾ ഇവർ ഇൻസ്റ്റഗ്രാം തത്സമയ ദൃശ്യങ്ങളിലൂടെ പുറത്തുവിട്ടു. പിന്നീട് റൺവേയിൽ കാത്തുകിടന്ന ബസിലേക്ക് മാറ്റിയ ഇവരെ രഹസ്യകേന്ദ്രത്തിലേക്ക് കൊണ്ടുപോയതായാണ് റിപ്പോർട്ട്.
പ്രതിഷേധക്കാർ സമരവേദിയിലെത്തുംമുമ്പ് തന്നെ നൂറുകണക്കിന് പ്രവർത്തകരെ കസ്റ്റഡിയിലെടുത്തതോടെ തലസ്ഥാനത്ത് സുരക്ഷ ശക്തമാക്കി. കേന്ദ്രസായുധ സേനാ വിഭാഗങ്ങൾ ഉൾപ്പെടെ അരലക്ഷത്തോളം സുരക്ഷാ ഉദ്യോഗസ്ഥരെ വിന്യസിച്ചതായാണ് വിവരം.
സുരക്ഷാ ക്രമീകരണങ്ങളുടെ ഭാഗമായി 45 മെട്രോ സ്റ്റേഷനുകൾ അടച്ചിട്ടു. 254 ട്രെയിനുകൾ റദ്ദാക്കുകയോ സമയക്രമത്തിൽ മാറ്റം വരുത്തുകയോ ചെയ്തു. കൊണാട്ട് പ്ലേസിനു ചുറ്റുമുള്ള വ്യാപാരസ്ഥാപനങ്ങളും അടച്ചു. ജൻപഥ് ജംഗ്ഷന്റെ നാലു കിലോമീറ്റർ ചുറ്റളവിൽ ഇന്റർനെറ്റ് സേവനങ്ങളും താൽക്കാലികമായി നിർത്തിവെച്ചു.
നേതാക്കളെയും പ്രവർത്തകരെയും കൂട്ടത്തോടെ കസ്റ്റഡിയിലെടുത്തതും ഗതാഗത-വാർത്താവിനിമയ നിയന്ത്രണങ്ങൾ ഏർപ്പെടുത്തിയതും പ്രതിഷേധത്തെ കൂടുതൽ വിവാദത്തിലാക്കിയിരിക്കുകയാണ്. ജനാധിപത്യാവകാശങ്ങൾ സംരക്ഷിക്കണമെന്നാവശ്യപ്പെട്ട് സമരം തുടരുമെന്നാണ് സിജെപിയുടെ നിലപാട്.