മലപ്പുറം: സ്ത്രീകൾക്കെതിരായ അതിക്രമങ്ങളും തെരഞ്ഞെടുപ്പ് കമ്മീഷന്റെ പ്രവർത്തനങ്ങളും ഉയർത്തിക്കാട്ടി രൂക്ഷ വിമർശനവുമായി വയനാട് എംപി പ്രിയങ്ക ഗാന്ധി. ദില്ലിയിലെ കൂട്ടബലാത്സംഗം ഉൾപ്പെടെയുള്ള സംഭവങ്ങളിൽ കടുത്ത ആശങ്ക രേഖപ്പെടുത്തിയ പ്രിയങ്ക, സ്ത്രീകളെ എങ്ങനെ ബഹുമാനിക്കണമെന്നും അവരോട് എങ്ങനെ പെരുമാറണമെന്നും പുരുഷന്മാരെ പഠിപ്പിക്കേണ്ടതുണ്ടെന്ന് പറഞ്ഞു. വയനാട് സന്ദർശനത്തിനിടെ മലപ്പുറത്തെ ദുരന്തബാധിതയായ സജിതയുടെ കുടുംബത്തെയും പ്രിയങ്ക സന്ദർശിച്ചു.
രാജ്യ തലസ്ഥാനത്ത് തന്നെ ഇത്തരം സംഭവങ്ങൾ ഉണ്ടാകുന്നത് അതീവ ഗൗരവമുള്ളതാണെന്നും നിയമവാഴ്ചയുടെ തകർച്ചയാണ് ഇതിലൂടെ വ്യക്തമാകുന്നതെന്നും പ്രിയങ്ക പറഞ്ഞു. സ്ത്രീകൾക്കെതിരായ അതിക്രമങ്ങൾ തടയുന്നതിൽ പൊലീസിന്റെ ജാഗ്രതയും ഇടപെടലും അനിവാര്യമാണ്. ഇത് ഒരു സാമൂഹിക പ്രശ്നമാണ്. സ്ത്രീകൾക്ക് സുരക്ഷിതമായി പൊതുസ്ഥലങ്ങളിൽ സഞ്ചരിക്കാനാകുന്ന സാഹചര്യം ഉറപ്പാക്കേണ്ടത് സർക്കാരുകളുടെ ഉത്തരവാദിത്തമാണെന്നും പ്രിയങ്ക വ്യക്തമാക്കി.
തെരഞ്ഞെടുപ്പ് കമ്മീഷന്റെ പ്രവർത്തനങ്ങളെയും പ്രിയങ്ക വിമർശിച്ചു. മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാർ തന്നെ ചട്ടങ്ങൾ ലംഘിച്ചുവെന്ന ആരോപണം ഉന്നയിച്ച അവർ, ആരാണ് ചട്ടലംഘനം നടത്തിയതെങ്കിലും കൃത്യമായ അന്വേഷണം നടത്തി നിയമത്തിന് മുന്നിൽ കൊണ്ടുവരണമെന്ന് ആവശ്യപ്പെട്ടു.
മഹാരാഷ്ട്ര, ഹരിയാന സംസ്ഥാനങ്ങളിലെ വോട്ടർ പട്ടികയുമായി ബന്ധപ്പെട്ട ക്രമക്കേടുകൾ രാജ്യം കണ്ടതായും പ്രിയങ്ക പറഞ്ഞു. പുറത്തുവരുന്ന ആരോപണങ്ങൾ ശരിയാണെങ്കിൽ തെരഞ്ഞെടുപ്പ് കമ്മീഷന്റെ പക്ഷപാതപരമായ നിലപാടുകളെക്കുറിച്ച് രാഹുൽ ഗാന്ധി തുടർച്ചയായി ഉന്നയിച്ച ആരോപണങ്ങൾക്ക് കൂടുതൽ പ്രസക്തിയുണ്ടാകുമെന്നും അവർ അഭിപ്രായപ്പെട്ടു.
ജനാധിപത്യ രാജ്യത്ത് തെരഞ്ഞെടുപ്പ് കമ്മീഷന്റെ ഭാഗത്തുനിന്നുള്ള ഇത്തരം നടപടികൾ ഗുരുതരമായ വിഷയമാണെന്നും പ്രിയങ്ക പറഞ്ഞു. സുതാര്യമായ തെരഞ്ഞെടുപ്പ് ഇല്ലെങ്കിൽ ജനാധിപത്യം നിലനിൽക്കില്ല. ജനവിധിയെ അട്ടിമറിക്കാൻ തെരഞ്ഞെടുപ്പ് കമ്മീഷൻ കൂട്ടുനിൽക്കുന്നുവെങ്കിൽ അത് രാജ്യത്തോടുള്ള വഞ്ചനയും ഗുരുതരമായ നടപടിയുമാണെന്നും വിഷയത്തിൽ അടിയന്തര അന്വേഷണം വേണമെന്നും അവർ ആവശ്യപ്പെട്ടു.
അതേസമയം, തെരഞ്ഞെടുപ്പ് കമ്മീഷനെ ചുറ്റിപ്പറ്റിയുള്ള നിലവിലെ വിവാദത്തിൽ കമ്മീഷൻ തന്നെ വിശദീകരണം നൽകിയിട്ടുണ്ട്. ആഭ്യന്തര ചർച്ചകളിലെ വ്യത്യസ്ത അഭിപ്രായങ്ങളും നിരീക്ഷണങ്ങളും സാധാരണ നടപടിക്രമത്തിന്റെ ഭാഗമാണെന്നും കഴിഞ്ഞ ഒരു വർഷത്തെ തീരുമാനങ്ങൾ മുഴുവൻ കമ്മീഷന്റെയും ഏകകണ്ഠമായ അംഗീകാരത്തോടെയാണെന്നുമാണ് കമ്മീഷന്റെ നിലപാട്.