തിരുവനന്തപുരം: ജോലി തേടുന്നവർക്ക് അവസരം. സമഗ്ര ശിക്ഷാ കേരളയുടെ (എസ്എസ്കെ) ജില്ലാ പ്രോജക്ട് ഓഫീസുകളിലും 168 ബി.ആർ.സി.കളിലുമായി വിവിധ തസ്തികകളിൽ 602 ഒഴിവുകൾ. സിവിൽ എഞ്ചിനീയർ, കമ്പ്യൂട്ടർ പ്രോഗ്രാമർ, അക്കൗണ്ടന്റ്, ഡ്രൈവർ, ഡാറ്റാ എൻട്രി ഓപ്പറേറ്റർ തുടങ്ങിയ തസ്തികകളിലാണ് നിയമനം. അപേക്ഷകൾ 2026 സെപ്റ്റംബർ 15ന് വൈകിട്ട് അഞ്ചിന് മുമ്പ് ലഭിക്കണം.
സിവിൽ എഞ്ചിനീയർ തസ്തികയിലേക്ക് ബി.ടെക് സിവിൽ യോഗ്യതയുള്ളവർക്ക് അപേക്ഷിക്കാം. കമ്പ്യൂട്ടർ പ്രോഗ്രാമർ തസ്തികയിലേക്ക് ബി.ടെക് (സി.എസ്/ഐ.ടി/ഇ.സി.ഇ), എം.സി.എ, അല്ലെങ്കിൽ എം.എസ്.സി കമ്പ്യൂട്ടർ സയൻസ്/ഐ.ടി. യോഗ്യത വേണം.
ഡാറ്റാ എൻട്രി ഓപ്പറേറ്റർ തസ്തികയിലേക്ക് പ്ലസ് ടു അല്ലെങ്കിൽ പ്രീ-ഡിഗ്രി വിജയിച്ചവർക്കാണ് അവസരം. ഇതിനൊപ്പം കമ്പ്യൂട്ടർ ആപ്ലിക്കേഷൻ അല്ലെങ്കിൽ ഡാറ്റാ എൻട്രി ഡിപ്ലോമ/സർട്ടിഫിക്കറ്റ് ഉണ്ടായിരിക്കണം. ഇംഗ്ലീഷിലും മലയാളത്തിലും കമ്പ്യൂട്ടർ വേഡ് പ്രോസസിങ് അറിയുകയും വേണം. അക്കൗണ്ടന്റ് തസ്തികയിലേക്ക് ബി.കോമും ടാലി പരിജ്ഞാനവും ആവശ്യമാണ്.
ഡ്രൈവർ തസ്തികയിലേക്ക് ഏഴാം ക്ലാസ് വിജയവും ലൈറ്റ് മോട്ടോർ വെഹിക്കിൾ (എൽ.എം.വി) ലൈസൻസും ബാഡ്ജും വേണം. ഓഫീസ് അറ്റൻഡന്റ്, നൈറ്റ് വാച്ച്മാൻ തസ്തികകളിലേക്കും ഏഴാം ക്ലാസ് വിജയിച്ചവർക്ക് അപേക്ഷിക്കാം. എന്നാൽ ബിരുദം നേടിയവർക്ക് ഈ തസ്തികകളിലേക്ക് അപേക്ഷിക്കാൻ കഴിയില്ല.
ബി.ആർ.സി. തലത്തിൽ എം.ഐ.എസ് കോ-ഓർഡിനേറ്റർ, അക്കൗണ്ടന്റ്, ഡാറ്റാ എൻട്രി ഓപ്പറേറ്റർ തുടങ്ങിയ തസ്തികകളിലേക്കും ഒഴിവുകളുണ്ട്. എം.ഐ.എസ് കോ-ഓർഡിനേറ്റർ തസ്തികയിലേക്ക് ബി.ടെക്/എം.എസ്.സി കമ്പ്യൂട്ടർ സയൻസ് അല്ലെങ്കിൽ എം.സി.എ യോഗ്യത വേണം. അക്കൗണ്ടന്റിന് ബി.കോമും ടാലി പരിജ്ഞാനവും ആവശ്യമാണ്. ഡാറ്റാ എൻട്രി ഓപ്പറേറ്റർ തസ്തികയിലേക്ക് പ്ലസ് ടു/പ്രീ-ഡിഗ്രിയും കമ്പ്യൂട്ടർ ആപ്ലിക്കേഷൻ അല്ലെങ്കിൽ ഡാറ്റാ എൻട്രി ഡിപ്ലോമ/സർട്ടിഫിക്കറ്റും വേണം.
പൊതുവായ പ്രായപരിധി 40 വയസ്സാണ്. നിലവിൽ എസ്എസ്കെയിൽ കരാർ അടിസ്ഥാനത്തിൽ ജോലി ചെയ്യുന്നവർക്ക് സർവീസ് കാലാവധി കണക്കാക്കി പരമാവധി 50 വയസ്സുവരെ പ്രായ ഇളവ് ലഭിക്കും.
അപേക്ഷ സമർപ്പിക്കാനുള്ള അവസാന തീയതി: 2026 സെപ്റ്റംബർ 15, വൈകിട്ട് 5 മണി.
കൂടുതൽ വിവരങ്ങൾക്ക് വിജ്ഞാപനം സന്ദർശിക്കുക.
https://ssakerala.in/download/notification.pdf