ന്യൂഡൽഹി: കോക്രോച്ച് ജനതാ പാർട്ടി (സിജെപി) സ്ഥാപകൻ അഭിജീത് ദീപ്കെയ്ക്കും അദ്ദേഹത്തിന്റെ അനുയായികൾക്കുമെതിരെ ഗുരുതര ആരോപണങ്ങളുമായി സോഷ്യൽ മീഡിയ ഇൻഫ്ലുവൻസർ ഫൈസാൻ അൻസാരി രംഗത്ത്. മഹാരാഷ്ട്രയിൽ വെച്ച് അഭിജീത് ദീപ്കെയുടെ നേതൃത്വത്തിൽ തനിക്കെതിരെ ക്രൂരമായ മർദനം നടന്നുവെന്നാരോപിച്ച് ഫൈസാൻ അൻസാരി ഡൽഹി ഡിസിപിക്ക് രേഖാമൂലം പരാതി നൽകി.
പരാതിയിൽ, മഹാരാഷ്ട്രയിലെ പുണെയിലും ഔറംഗാബാദിലും വെച്ചാണ് ആക്രമണം നടന്നതെന്നും, ഇതുമായി ബന്ധപ്പെട്ട് രണ്ട് കേസുകൾ നിലവിലുണ്ടെന്നും അൻസാരി വ്യക്തമാക്കുന്നു. ആക്രമണത്തിന് പിന്നിൽ അഭിജീത് ദീപ്കെയാണെന്നതിന് വ്യക്തമായ തെളിവുകളുണ്ടെന്നും, അദ്ദേഹത്തെ ഉടൻ അറസ്റ്റ് ചെയ്യണമെന്നും ഡൽഹി പോലീസിനോട് ആവശ്യപ്പെട്ടു.
സ്വന്തം രാഷ്ട്രീയ നേട്ടങ്ങൾക്കായാണ് ദീപ്കെ പ്രവർത്തിക്കുന്നതെന്നും അൻസാരി ആരോപിച്ചു. സമീപകാലത്ത് ഡൽഹിയിൽ പ്രതിഷേധം നടത്തിയ ആക്ടിവിസ്റ്റ് സോനം വാങ്ചുക്കിനെ കരുതൽ തടങ്കലിലാക്കിയ ഡൽഹി സർക്കാരിന്റെയും പോലീസിന്റെയും നടപടിയെ അദ്ദേഹം പ്രശംസിക്കുകയും, ആ ഇടപെടൽ തലസ്ഥാനത്തെ ക്രമസമാധാന നില സംരക്ഷിക്കാൻ സഹായിച്ചുവെന്നും അഭിപ്രായപ്പെട്ടു.
അതേസമയം, രാജ്യത്തെ പരീക്ഷാ ക്രമക്കേടുകൾക്കെതിരെ സിജെപി നടത്തുന്ന പ്രതിഷേധങ്ങളെ ബംഗ്ലാദേശിലെയും നേപ്പാളിലെയും ഭരണകൂട വിരുദ്ധ സമരങ്ങളുമായി താരതമ്യം ചെയ്യുന്നത് അഭിജീത് ദീപ്കെ തള്ളി. തങ്ങളുടെ സമരങ്ങൾ പൂർണമായും മഹാത്മാ ഗാന്ധിയുടെ അഹിംസാ മാർഗ്ഗം പിന്തുടരുന്നതാണെന്നും, പോലീസിന്റെ മർദനമേറ്റിട്ടും വിദ്യാർഥികൾ ജന്തർ മന്ദിറിൽ സമാധാനപരമായി പ്രതിഷേധിച്ചുവെന്നും അദ്ദേഹം പറഞ്ഞു.
സിജെപിയുടെ പ്രതിച്ഛായ തകർക്കാൻ ലക്ഷ്യമിട്ടാണ് ഇത്തരം ആരോപണങ്ങളും തെറ്റായ താരതമ്യങ്ങളും പ്രചരിപ്പിക്കുന്നതെന്നും അഭിജീത് ദീപ്കെ ആരോപിച്ചു.